Levɩɩ məlsɔɔ thɔ̃
3
1 Yɛkɛ Aarɔ̃ na Mʋɩjɩɩ mǝlsɔ dabɔɔkɛ Thãgba Kɔ̃tɩn n mɩɩnanɩ Mʋɩjɩ Sɩnayɩ gɔ̃gʋɔnnɔ. 2 Aarɔ̃ɔ bikũusɔɔ isɔ ha gɩrɛ: Nadabɩ, kɛ dɔnɩ ɔɔ caca bikuun na Abihu na Eleajaar na Ɩtamaar. 3 Wɛr dɔ Aarɔ̃ɔ bikũusɔɔkɛ wɩ pɛrnɩ niin dɩ wɩ do bonɩ jidara, dɩ wa n do bonɩ ji thɔma. 4 Sɩ Nadabɩ na Abihu kɔɔ khiire Thãgba Kɔ̃tɩnɩ ƴɛra Sɩnayɩ bǝ̃ kparara ɔbɔɔkɛ wɩ tini dɔɔkɛ Thãgba Kɔ̃tɩn na sona', a lona Thãgba ƴɔɔ. Wa kɔɔ hana bikona ga. Eleajaar na Ɩtamaar n dʋɔn bonɩ ji thɔma dɩ awɩ thɩ Aarɔ̃ na n hɩɩn wɩ.5 Thãgba Kɔ̃tɩn mɩɩnanɛ Mʋɩjɩ ayɩ: 6 Kpa Levɩɩ mǝlsɔ ɛna a hana Aarɔ̃ bonɩ jidaar wa n buluu thɔmana. 7 Wa n dor thɔmaakɛ wɩ pɛnɩ Aarɔna, wa n dona Ɩjɩrayɛl bɩsana fɛʋʋ thɔ̃ Thãgba cãa wa ƴɛbʋrɔ, wa n cʋʋ thɔmaakɛ telenenɩ Thãgba cãa waa. 8 Wɛr na n hɩnɛ Thãgba cãa wa thɔ̃ do thɩ̃be fɛw wa n dona thɔmaakɛ Ɩjɩrayɛl bɩsana na n donɩ, wa n cʋʋna Thãgbaa kẽkẽ wa thɔma. 9 Gɛr gɩ gba Levɩɩ mǝlsɔ a hana Aarɔ̃ na ɔɔ bikũusɔ Ɩjɩrayɛl bɩsanaa irǝ, wɩ do Aarɔ̃ɔ bubulsɔ khorr. 10 Pɩɛr Aarɔ̃ na ɔɔ bikũusɔ wa n do awɩ bonɩ ji thɔ̃, a tibilɩɩkɛ na dɔnɩ bonɩ jidaara' tɔ danɔ wɩ kʋɔ. 11 Thãgba Kɔ̃tɩn bire mɩɩna Mʋɩjɩ wo ayɩ: 12 Nɩ hɩnɛ mɛrɛɛ thɛthɛ phire Levɩɩ mǝlsɔ Ɩjɩrayɛl bɩsanana dɩ wɩ dee Ɩjɩrayɛl bɩsanaa caca bikũusɔ fɛʋʋkɛ wɩ kɔnɩ. Ɩ̃da Levɩɩ mǝlsɔ do. 13 Ɩ̃da caca bɩsana do. A fʋna wireekɛ mɩ kʋʋrnɩ Ejipitidaraa caca bɩsana, mɩ gbaar Ɩjɩrayɛl bɩsanaa caca kũubisɔ fɛw, tɩbɩlaa caca kũubisɔ na nʋmaa caca dakosɔ dɩ wɩ do ɩ̃da. Mer dʋɔn Thãgba Kɔ̃tɩn.
Levɩɩ mǝlsɔɔ caca ther
14 Thãgba Kɔ̃tɩn mɩɩnanɛ Mʋɩjɩ Sɩnayɩ bǝ̃ kparara ayɩ: 15 Therra Levɩɩ mǝlsɔ cɔ kana cɔ kana, thɩ kʋ̃ɔ thɩ kʋ̃ɔ, kuminə fɛʋʋkɛ hananɩ sɩpo bɩɛl a jʋʋna. 16 Dɩ Mʋɩjɩ ther wɩ otirǝ mɔna Thãgba Kɔ̃tɩn kɔɔ sʋʋraanɩ. 17 Yɛkɛ Levɩɩ bikũusɔɔ isɔ: Gɛɛrsɔ̃, Kehatɩ na Merarɩ. 18 Gɛɛrsɔ̃ɔ bikũusɔɔ isɔ ha gɩrɛ mɔ̃ awɩ thɩ kɔ̃sɔ hanɩ: Lɩbɩnɩ na Sɩmeɩ. 19 Kehatɩɩ bikũusɔɔ isɔ ha gɩrɛ mɔ̃ awɩ thɩ kɔ̃sɔ hanɩ: Amɩram na Ɩsaar na Hebʋrɔ̃ na Ujɩɛl. 20 Merarɩɩ bikũusɔɔ isɔ ha gɩrɛ mɔ̃ awɩ thɩ kɔ̃sɔ hanɩ: Malɩ na Musɩ. Wɛr dɔ Levɩɩ mǝlsɔɔ thɩ kɔ̃sɔ mɔ̃ awɩ cɔ kasɔ hanɩ.
21 Gɛɛrsɔ̃ dʋɔn Lɩbɩnɩɩ məlsɔ na Sɩmeyɩɩ məlsɔɔ thɩ kɔ̃tɩ̃. Wɛr dʋɔn Gɛɛrsɔ̃ɔ mǝlsɔɔ thɩ kɔ̃sɔ. 22 Wɩrɛ wɩ thernɩ awɩ thɩ̃thɩɩn, kɛ dɔnɩ kuminə fɛʋʋkɛ hananɩ sɩpo bɩɛl a jʋʋna, wɩ har gbɩlanɩ makoɲɔ na taamɔy (7 500). 23 Gɛɛrsɔ̃ɔ mǝlsɔɔ thɩ kɔ̃sɔ n jɛ Thãgbaa kẽkẽ wa khiro wi lõ paar. 24 Layɛlɩ bikuun Elɩasafɩ dʋɔn awɩ kɔ̃tɩ̃. 25 Thɔmaakɛ wɩ ha wɩnɩ Thãgba cãa waw dʋɔn; wɛr na n hɩnɛ Thãgbaa kẽkẽ wa, na kẽkẽ gborõbireekɛ n thierǝǝni, na Thãgba cãa wa lõfonɔ kẽkɩɩn, 26 na Thãgbaa kẽkẽ wa gbasa kẽkẽ gborõbeekɛ diǝni Thãgbaa kẽkẽ wara na bonɩ ji paara, na gbasa lõfonɔ kẽkɩɩn na dakha ga pɛ̃sɔ fɛw.
27 Kehatɩ dʋɔn Amɩramɩ məlsɔ na Ɩsaarɩ məlsɔ na Hebʋrɔ̃ɔ məlsɔ na Ujɩɛlɩ mǝlsɔɔ thɩ kɔ̃tɩ̃. Wɛr dɔ Kehatɩɩ mǝlsɔɔ thɩ kɔ̃sɔ. 28 Wɩ therre kuuminə fɛʋʋkɛ hananɩ sɩpo bɩɛl a jʋʋna dɩ wɩ ha gbɩlanɩ makõther na taamaadõ (8 600), kɛ wɩ pɛrnɩ wa n dɔ thɔma sãasɩ paar. 29 Wɩ n jɛr Thãgbaa kẽkẽ wa gɛllɔ ka wire na n jalnɩ dɩ pɛ ɲɔ̃bɩlã. 30 Ujɩɛlɩ bikuun Elɩsafã dʋɔn awɩ kɔ̃tɩ̃. 31 Kehatɩɩ mǝlsɔ n hɩnɛ ʋlfɛ khɛɛsʋʋ na Thãgba buru tabal na dɔ carã dɛ̃ɛ paar na bonɩ ji paarsɔ na thɩ̃beekɛ hanɩ sãasɩ paar na du vaar kẽkɩɩn. Wɛr hɩna thɔma fɛʋʋkɛ telenenɩ ga thɩ̃sɔɔle. 32 Levɩɩ mǝlsɔɔ kɔ̃tɩ̃ yʋ dʋɔn Eleajaar, Aarɔ̃ bonɩ jidaarɩ bikuun gɩ. Ɔr n hɩnɛ wɩrɛ n dɔnɩ thɔma sãasɩ paar. 33 Merarɩ dʋɔn Malɩɩ məlsɔ na Musɩɩ məlsɔɔ thɩ kɔ̃tɩ̃. Wɛr dɔ Merarɩɩ mǝlsɔɔ thɩ kɔ̃sɔ. 34 Wɩrɛ wɩ thernɩ awɩ thɩ̃thɩɩn, kɛ dɔnɩ kuuminə fɛʋʋkɛ hananɩ sɩpo bɩɛl a jʋʋna, har gbɩlanɩ maadõ na taaɲɔ (6.200). 35 Abɩhayɩlɩ bikuun Surɩɛl dʋɔn awɩ kɔ̃tɩ̃. Wɩ n jɛr Thãgbaa kẽkẽ wa gɛllɔ ka wire na n jalnɩ dɩ pɛ ɲɔ̃bɔɔ. 36 Merarɩɩ mǝlsɔ n hɩnɛ: Thãgbaa kẽkẽ wa thɩr pɛna na agɩ ɓalãɓɔsɔ, na thɩr gbuunǝ na agɩ jǝǝdasɔ, na thɩ̃bi kpɩɩsɔ fɛʋʋkɛ hanɩ le a ɓanɔ. Wɛr n hɩna thɔma fɛʋʋkɛ telenenɩ ga thɩ̃sɔɔle. 37 Wɛr n hɩnɛ dakha Thãgbaa kẽkẽ wa gbasa thɩr gbuunǝ na agɩ jǝǝdasɔ na agɩ kpasɔ na agɩ pɛ̃sɔ fɛw. 38 Mʋɩjɩ na Aarɔ̃ na Aarɔ̃ɔ bikũusɔ n jɛ Thãgba cãa wa lõfonɔ ƴɛ thɩ̃thɩɩn, wi phã paar. Wɛr n cɔɛ Thãgba cãa wa thɔma Ɩjɩrayɛl bɩsanaa irǝ. A tɩɩ khɩɩkɛ na dɔnɩ bonɩ jidaara' tɔ dã le wɩ kʋɔ. 39 Levɩɩ mǝlsɔ fɛʋʋkɛ Mʋɩjɩ na Aarɔ̃ thernɩ thɩ kʋ̃ɔ thɩ kʋ̃ɔ mɔna Thãgba Kɔ̃tɩn kɔɔ sonɩ, kuuminə fɛʋʋkɛ hananɩ sɩpo bɩɛl a jʋʋna har gbɩlanɩ der paar kpelẽ yeɲɔ (22 000).
Caca bee birse
40 Thãgba Kɔ̃tɩn sor Mʋɩjɩra ayɩ: Therra caca be fɛw kɛ dɔnɩ kuuminə, kɛ hananɩ sɩpo bɩɛl a jʋʋna Ɩjɩrayɛl bɩsanaa thɩ̃thɩɩn. Kherra wɛr fɛʋʋ i. 41 Agɩpɩ gba Levɩɩ mǝlsɔ a debana Ɩjɩrayɛl bɩsanaa caca kũubisɔ fɛw, wɩ do mɛr Thãgba Kɔ̃tɩnɩda. Gba dakha Levɩɩ mǝlsɔɔ nʋ̃sɔ a debana Ɩjɩrayɛl bɩsanaa caca nʋ̃sɔ fɛw wɩ do ɩ̃da. 42 Dɩ Mʋɩjɩ therre caca kuuminə fɛw Ɩjɩrayɛl bɩsanaa thɩ̃thɩɩn mɔna Thãgba Kɔ̃tɩn kɔɔ sʋʋraanɩ. 43 Caca kuuminǝ fɛʋʋkɛ wɩ thernɩ, kɛ dɔnɩ kuuminə fɛʋʋkɛ hananɩ sɩpo bɩɛl a jʋʋna, wɩ har gbɩlanɩ der paar kpelẽ yeɲɔ na taaɲɔ na kpalãther yʋɔr yẽther (22 273). 44 Dɩ Thãgba Kɔ̃tɩn so Mʋɩjɩra ayɩ: 45 Gba Levɩɩ mǝlsɔ a birsenena Ɩjɩrayɛl bɩsanaa caca kũubisɔ fɛw, wɩ do mɛr Thãgba Kɔ̃tɩnɩda. Gba dakha Levɩɩ mǝlsɔɔ nʋ̃sɔ a birsenena Ɩjɩrayɛl bɩsanaa caca nʋ̃sɔ fɛw wɩ do ɩ̃da. Mɛr dʋɔn Thãgba Kɔ̃tɩn. 46 Sɩ mɔ̃ fa birsenɩ Ɩjɩrayɛl bɩsanaa caca kuuminǝ taaɲɔ na kpalãther yʋɔr yẽther (273), kɛ wɩ jɔnanɩ Levɩɩ mǝlsɔ, 47 tea tɩɩ bɩɛlla sikile mũsũ be yemɔy, mɔ̃ sãasɩ pa sikile mũsũ mɩɛ nʋɔ hanɩ, kɛ dɔnɩ gera kpelẽ. 48 Gba mũsumoolera a hana Aarɔ̃ na ɔɔ bikũusɔ gɩ do caca kũubir wele Ɩjɩrayɛl bɩsana jɔnanɩ Levɩɩ mǝlsɔɔ birse mũsũ. 49 Dɩ Mʋɩjɩ teere mũsumoolera, wɩ birsenanɩ Ɩjɩrayɛl bɩsanaa caca kuminǝǝkɛ wɩ jɔnanɩ Levɩɩ mǝlsɔ. 50 Dɩ mũsumoolera a teenɩ fɛw Ɩjɩrayɛl bɩsanaa caca kuuminǝnə har sikile mũsũ be gbɩlanɩ tãather na kpalãther yemɔy (1365) mɔna sãasɩ pa sikile mɩɛ nʋɔ hanɩ. 51 Dɩ Mʋɩjɩ gbaar birse mũsumoolera a ha Aarɔ̃ na ɔɔ bikũusɔ, mɔna Thãgba Kɔ̃tɩn kɔɔ sʋʋraanɩ.