Thɩ hɩɩr yɛna \ref Det 15. 1-11
25
1 Thãgba Kɔ̃tɩn sor Mʋɩjɩra Sɩnayɩ gɔ̃gʋɔna ƴũu ayɩ: 2 «Mɩɛnɛ Ɩjɩrayɛl bɩsana a sɔ war: "Ɔbɔɔkɛ na lonɩ dɩɩraakɛ ma ha nɩnɩ, thɩɩ teenanɛ a na n hɩɩr mɛr Thãgba Kɔ̃tɩnɩ i dʋbɩra. 3 Yɛna maadõo bɩnɔ, fa kʋʋl afɩ lɛ, a na diir, dɩ yɛna maadõo bɩnɔna dakha, fa gbɛ̃ɛsɩ afɩ dɩvɛ̃ thɩrsɔ a na khabɩrɩ gɩ, a na gba afɩ lɛ thɩ̃. 4 Sɩ yɛna makoɲɔ yɩɛra, hɩɩr yɩɛr biləni ga do thɩɩra. Hɩɩr yɩɛr gɩ mɛr Thãgba Kɔ̃tɩnɩ i dʋbɩra. Fa n kʋʋl afɩ lɛ ga yɛɛle a diirə'. Fa n gbɛ̃ɛsɩ afɩ dɩvɛ̃ thɩrsɔ a khabɩra'. 5 Fa n kha thɩ̃ peraakɛ jɛnɩ thɩɩra a sa'. Fa n khʋ̃ dɩvɛ̃ɛkɛ sɩɛnɩ dɩvɛ̃ thɩraraakɛ fa gbɛ̃ɛsɩnɩ a khabɩraa ga, gɩdonɩ thɩɩ hɩɩr yɛ gɩ biləni. 6 Sɩ na n khor thɩ̃ peraakɛ phonɩ dɩbara lɔɔsɔ thɩɩ hɩɩr yɛraale a se, nɛrɛ na anɩ thɔ̃daar kũusɔ na anɩ thɔ̃daar khɛrsɔ na anɩ paadarasɔ na kpakpal hʋ kasɔɔkɛ na gbunənɩ anɩ cɔ, 7 na anɩ nʋ̃sɔ, narakɛ hɔ̃ nʋmaakɛ hanɩ anɩ dʋɔ; dɩɩ dɩko na haanɛ wɩ.Jibile yɩɛr
8 Nɩ thera hɩɩr yɛna makoɲɔ: kɩrʋ dʋɔn yɛna makoɲɔ der paar makoɲɔ, dɩ hɩɩr yɛna makoɲɔ der paar makoɲɔɔle na gbɛbɩrɛ a na ha yɛna kpalaɲɔ yʋɔr phe bire. 9 Yɩɛrɩ makoɲɔ sɩporɩ wire yʋɔr wirə, kɛ dɔnɩ so hɛl wi kɔ̃tɩ̃ɩ, nɩ ʋna banake ʋnɛ phãphãphã gɩ tigi anɩ dʋɔ fɛw. 10 Nɩ lea yɛna kpalaɲɔ yʋɔr yɩɛr a thɩnɛɛ kpɩɩ a do mɛr Thãgbaada. Nɩ hulene dɩbara 'lir dɩdarara ɓibi. Gɛr na dʋɔn nar Jibile. Tibil wo tibil n kɛra a birə gba ɔɔ thɩ̃ hɩnanɛ; tibil wo tibil n kɛra a birə ɔɔ thɛthɛɛ cara. 11 Yɛna kpalaɲɔ yʋɔr yɩɛrɩle, anɩ jibile yɛ gɩ: Na n diir thɩ̃a', na n kha thɩ̃ peraakɛ phonɩ dɩbara lɔɔsɔ a sa', na n khʋ̃ dɩvɛ̃ɛkɛ sɩɛnɩ dɩvɛ̃ thɩraraakɛ na gbɛ̃ɛsɩnɩ a khabɩraa ga, 12 gɩdonɩ jibile yɩɛr gɩ, na n hɩnɛɛ a do nar yɩɛrɩkɛ leanɩ a thɩɩn kpɩɩ a do ɩ̃da, sɩ nɩ punone a kho thɩ̃ peraakɛ phonɩ dɩbara lɔɔsɔ a se.
13 Jibile yɩɛraale, tibil wo tibil n birə kɛra a gba ɔɔ thɛthɛɛ thɩ̃ hɩnanɛ. 14 Ado na dolõ thɩɩ anɩ omɩra, agɩbo thɩɩ nɩ n thɩɩraa, tibil bɩɛlakɛ na n kho ɔɔ oma'. 15 Ado fa dolõ agɩbo ado fa the thɩɩ, kɔɔ thera pɩpɩɩ jibile yɩɛrɩkɛ kɔɔ kanɩ, sa jɛ mɔ̃ fa thenɩ afɩ omɩra sɩ gɩ mɩɛ kha; ɔr dakha n ther yɛ nʋɔɔkɛ fa gbanɩ thɩ̃ɛ a na cʋʋna sɩ jibile yɛ phaa n dã sɩ a dolõ far. 16 Ado yɛ nʋɔ sɩrɛ a jɔr ɔmɛ̃ fa the dɩ ga khɩɩr. Sɩ ado yɛ nʋɔ na sɩ a jɔra', ɔmɛ̃ fa wur the nʋɔ dakha; gɩdonɩ gɩ hʋrɛ yɛ nʋɔɔkɛ fa gbanɩ thɩ̃ɛ gɛr a n dolõ far. 17 Tibil bɩɛlakɛ nɛrɛra, na n kho ɔɔ oma'. Nɩ hanana maar mɛr anɩ Thãgbara, gɩdonɩ mɛr dʋɔn Thãgba Kɔ̃tɩn anɩ Thãgba.
18 Na n cʋɛ ɩ̃ so, a na kpana ɩ̃ jɔfʋsɔɔra, dɩ na toore dɩɩra ba na ha ɩɩ. 19 Dɩɩ na n ha nɛr dɩkɔ nɩ kho na n hi, nɩ tooraa dakha ba na ha ɩɩ. 20 Agakpaan na n sor: “A sa kʋʋla', dɩ sa kha thɩ̃a', aɲe sa kho yɛna makoɲɔ yɩɛraale ya?” 21 Mɛrɛ ma bɔna nɛr yɛna maadõ yɩɛraale, dɩ thɩɩ na 'laarɛ yɛna yẽtherɩ dɩko. 22 Yɛna makõther yɩɛra na diir thɩ̃ɛ, sɩ dikor ciirə na hãalerakɛ na n kho gɩ jalna waa gɩ dana yɛna yʋɔr phe bire yɩɛra, phaphapha ɔɔ dikor n dã gɩ 'li daciirəəlera nɩ hananɩ dɩ na n kho.
Thɩɩ na cɔ dolõ jɔfʋ
23 Thɩɩ na hana gɩ dolõ khorr vʋ̃ʋ gɩ do gɩ pɩra'; gɩdonɩ mɛr hɩna thɩɩ, sɩ nɛrɛ fɛw kpakpala na hʋ ka nɩ do a too ɩ̃ dʋɔ. 24 Paar wo paarɩkɛ na toonɩ dɩɩraakɛ na gbanɩ, nɩ pɩɛr jɔfʋʋkɛ wa n birsenanɩ thɩɩ. 25 A bʋɔ fʋ afɩ omɩ dɩ tha thʋnɔ a kur ɔɔ thɩ a dolõ, ntɛɛkɛ dɔnɩ ɔɔ kpɩ̃ɩ bɩnɔ n jala a birə birsene gɩrɛra ɔɔ omɩra dolonɩ. 26 Sɩ ado ntɛ na hana ɔɔ tibil bɩnɔ, kɛ hananɩ hʋɛ a na pɔ na birsə', sɩ dɩ 'lɛ punone a na birsena, 27 ntɛ n thera yɛ nʋɔɔkɛ sɛnɩ sɩ jibile yɛ phaa n dã, sa birsene mũsũ nʋɔɔkɛ teananɩ a hana ʋrɛ kɔɔ thɛnɩ, sa birə gba ɔɔ thɩ. 28 Dɩ ado ntɛ na hana thɩ̃ɛ a na birsena ga, ga toore ʋrɛ thɛnɩɩ ɲɔ̃kɔɔ a na dana jibile yɩɛr. Agɩpɩ a na faarɛ mɛ̃ a na ha dadaar dɩ a na bir na kɛr na gba ɔɔ thɩ. 29 A tibil dolõ cʋɔrɩkɛ dɔnɩ cɔ paar, dɩ kɔ̃tɩɩnaakɛ wɩ mɩnɩ gʋʋ a kpalalɔ, yɛ bɩɛl biləni ga cʋʋ, sɩ da yɩ hʋɛ a na bir na birse cʋɔrɩle, gɩ fʋna ɔɔ dolõ bɔɔ. Cʋɔrɩlee birse jɔfʋ dʋɔn yɛ bɩɛl dɩbara. 30 Sɩ ado cʋɔrɩlera hanɩ dɩ kɔ̃tɩɩnaakɛ wɩ mɩnɩ gʋʋ a kpalalɔ, wa birsee ɔbɔɔkɛ yɛ biləni dana', ntɛɛkɛ thɩɛnɩ ɔr hɩna khorr vʋ̃ʋ, na ɔɔ məlsɔ, ntɛ na hana a 'laa cʋɔrra jibile yɩɛra 'lo bã. 31 Sɩ ado cɔnaakɛ hanɩ dɩ biirə gɩ, kɛ wa mɩnɩ gʋʋ a kpalalɔa', jɔfʋ bɩɛla gɩ hana na thɩɩsɔɔkɛ wɩ n dolonɩ dɩɩra. Wa punone a na birse gɩ bɔɔ wo bɔɔ fɛw. Dɩ a tibil the gɩ dakha sɩ jibile yɩɛr dã, ntɛ na ther sɩ na 'laa. 32 Sɩ Levɩɩ məlsɔɔ dɩsɔ wer, na awɩ cɔsɔɔkɛ wɩ hananɩ le, wer hananɛ hʋɛ bɔɔ fɛw a na bir na birse awɩ cɔsɔ. 33 A tibil the cʋɔr Levɩɩ məlsɔɔra, adorakɛ alãkha Levɩ kpɩɩ gɩ, dɩ jibile yɩɛr dã, ntɛ na ther cʋɔraale, na dɩɩraale sɩ na ha Levɩ, kɛ kɔɔ hɩnanɩ cʋɔr; gɩdonɩ Levɩɩ məlsɔɔ cɔsɔɔkɛ hanɩ Levɩɩ məlsɔɔ dɩsɔɔra dʋɔn awɩ thɩ̃ hɩnanɛ dɩbara, kɛ wɩ hananɩ Ɩjɩrayɛl bɩsanaa thɩ̃thɩɩn. 34 Lɩɛsɔɔkɛ diəni awɩ dɩsɔɔra, ga puno na dolõa', gɩdonɩ awɩ thɩ̃ hɩnanɛ gɩ kpẽgelẽe.
Jɔfʋ thɩ̃ peminena
35 A bʋɔ fʋ afɩ omɩɩkɛ khonə fɩnɩ, kɛ kɔɔ hana fɩnɩ helʋ, dɩ a hana thɩ̃ɛa', a kpakpal gɩ, a hʋ ka gɩrakɛ a too le, buloo, gɩ do nɔɔ a puno a too a khunə fɩ. 36 Fa n ƴaalaa khora'. Fa n tɔ dɛɛnaa ga. Na ma mɛr afɩ Thãgba, gɩ do nɔɔ afɩ omɩ n too a khunə fɩ. 37 Fa n pemʋʋ mũsumo sa bir na ƴaalɔ khora'. Fa n pemʋʋ dɩkɔ sa bir na ƴaalɔ dadɛɛna ga. 38 Mɛr dʋɔn Thãgba Kɔ̃tɩn, afɩ Thãgba. Mɛr te nɩ Ejipiti dɩɩra a thena, ɩ̃ ha nɩ Kanãa dɩɩ, ɩ̃ do anɩ Thãgba.
Jɔfʋ, tɩɩ birserera
39 A bʋɔ fʋ afɩ omɩɩkɛ khonə fɩnɩ dɩ dolõ far ɔɔbara, fa n pɩɛraa dee thɔma ga. 40 Dɔ a ho far paadaar, na hʋ ka kpakpal a na n do fɩ thɔma jibile yɩɛr n dana. 41 Ga bɔɔle fa haarɛ hʋɛ mɛ̃ na ɔɔ bɩsãsɔ a kɛr a bir ɔɔ cara a bir a gba ɔɔ thɩsɔɔ thɩ. 42 Ɩ̃ thɔ̃dara ha Ɩjɩrayɛl bɩsana, kɛ mɩ tini Ejipiti dɩɩra a thena, gɛr gɩ tibil na n dolõ wɩ mɔ̃ wɩ n dolonɩ dea ga. 43 Fa n hʋɔlaa gbõgolonena ga. Na ma mɛr afɩ Thãgba. 44 Ado na ƴaal dee, agɩbo thɔ̃daar khɛr, nɩ jala ca kpalalaakɛ diə narnɩ a thɛ. Wɛra na the dee agɩbo thɔ̃daar khɛr a na hɩ̃. 45 Nɩ punone dakha a the kpakpal hʋ kaakɛ hanɩ anɩ thɩ̃thɩɩnɩ bɩsãsɔ, dɩ wɩ do nar dea, agɩbo nɩ the awɩ məlsɔɔkɛ wɩ kɔnɩ anɩ dʋɔ, wɩ do anɩda. 46 A na hala', nɩ faa wɩ anɩ bɩsãsɔraakɛ na kpaanɛnɩ anɩ khiro gɩ do awɩ khĩdi thɩ̃, na awɩ thɩ̃ hɩnanɛ. Wɛr na fʋrɔ wɩ do nar dea khorr. Sɩ ado Ɩjɩrayɛl bɩsanaakɛ dʋɔnɩ anɩ omɩsɔ gɩ, tibil na n hʋɔl ɔɔ omɩra na gbõgolona'.
47 Ado kpakpalɩkɛ hanɩ afɩ dʋɔ agɩbo hʋ ka kpakpal gɩ a ɩ̃ a le, sɩ dɩ afɩ omɩɩkɛ khonəənɩ ha bʋɔra a dolõ ɔɔbara kpakpalaalera, agɩbo ɔɔ məl ʋkhara gɩ, agɩbo hʋ ka kpakpalaale gɩ, 48 a punone a 'lɛ birsere. Ɔɔ omɩ ʋkha bɩɛl punone a birsee. 49 Ɔɔ thɩɩ õkuun agɩbo ɔɔ thɩɩ õkuunɩ bi, agɩbo wo ɔɔ tibil bɩnɔ punone a birsee. Dɩrakɛ ado ɔr thɛthɛ 'lɛ punone, a punone a birse ɔɔbara. 50 Ɔr na ʋrɛra thɩɛnɩ n thera yɛ nʋɔ; yɩɛraakɛ a dolonaanɩ ɔɔbarara a danana jibile yɩɛrɩkɛ na kpaanɛnɩ. Dɩ yɛ nʋɔɔkɛ sɛnɩ, ga mũsũ nɔ wa birse na 'laa. Paadaarɩ wi bɩɛl thɔ̃ lɩmɩ nɔ wa mɩɛna a na jɩ yɩɛrɩ mũsũ nɔ. 51 Ado yɛ nʋɔ sɩrɛ a jɔr sɩ jibile yɩɛr n dã, a birsene gɩ thɔɔ mũsũ nʋɔɔkɛ ɔɔ kɔ̃tɩnna kɔɔ thenaanɩ. 52 Sɩ ado yɛ nʋɔ na sɩ a jɔr, sɩ jibile yɩɛr n dã ga, a thera sa birsene mũsũ yʋʋkɛ mãkhanɛnɩ na yɛ nʋɔɔkɛ sɛnɩ a 'laanɛ. 53 Sɩ ɔbɔɔkɛ a kɔɔ hanɩ ɔɔ kɔ̃tɩ̃ɩ ɲɔ̃kɔɔ da n dʋʋ thɔma, dɔ a gbaa a hʋʋraa paadaarɩkɛ wɩ n lɩmɩnɩ yɩɛra. Na n tu ɔɔ kɔ̃tɩ̃ na n hʋɔlaa gbõgolonena anɩ yiroə'. 54 Ado aa puno na hʋ caar dɩɩdɩɩle a birse ɔɔbara ga, sɩ dɩ jibile yɩɛr dã, a na ther dɩphã ɔɔ dee dora, ɔr na ɔɔ bɩsãsɔ.
55 Mɛra dɩbara Ɩjɩrayɛl bɩsana do thɔ̃dara. Ɩ̃ thɔ̃dara wɛ, kɛ mɩ tini Ejipiti dɩɩra. Mɛr dʋɔn Thãgba Kɔ̃tɩn anɩ Thãgba." »