Dɔ carã dɛ̃ɛ paar
24
1 Thãgba Kɔ̃tɩn sor Mʋɩjɩra ayɩ: 2 «Sɔ Ɩjɩrayɛl bɩsanana wɩ pɔna olɩvɩ nĩ tɛnanɛɛkɛ bʋɔnɔnɩ wɩlwɩlwɩl wɩ ha fɩ, gɩ do nɔɔ dɔ carãasɔ n hana niin ga n lɩ bɔɔ fɛw. 3 Aarɔ̃ n gbɛba dɔ carãasɔɔra bɔɔbɔɔ, le mɛr Thãgba cãa wa bɩnɔ, du vaar kẽkẽ ƴɛbʋrɔ, kɛ kɛanɩ khɛɛsʋʋraakɛ hananɩ nɔ bɩɛl ʋlfɛ thɩmɩɩr, gɩ do nɔɔ ga n lɩ bɔɔ fɛw, dʋɔrɔ a dana duuro mɛr Thãgba Kɔ̃tɩnɩ ƴɛbʋrɔ. Nɛrɛ na anɩ məlsɔɔ jɔfʋ gɩ waa khorr. 4 A dɛɛnɛ dɔ carãasɔɔra, dɔ carã dɛ̃ɛ paara ƴũu, kɛ wɩ cʋʋnanɩ dɛ haar, ga n lɩ mɛr Thãgba Kɔ̃tɩnɩ ƴɛbʋrɔ bɔɔ fɛw.Thãgba buru
5 Gba mɩ̃ phuu a cʋɛna buru yʋɔr yeɲɔ. Buru bɩɛl 'lẽ'lee mɩ̃ na har kilə maadõ. 6 Cʋra burura jɔrɔnɛ yeɲɔ. Jɔrɔ̃ bɩɛla, buru be maadõ fa dɛ̃ɛ tabalɩlala wɩ cʋʋnanɩ dɛ haar, le mɛr Thãgba Kɔ̃tɩnɩ ƴɛbʋrɔ. 7 Pɩɛr dakha latɩkolo ɓurore buru jɔrɔnɛna fɛw bɩɛlbɩɛl gɩ ho bonɩ thiinə, gɩ do jɩ̃jɩna thɩ̃ɛ mɛr Thãgba Kɔ̃tɩnɩ ƴɛbʋrɔ. 8 Hɩɩr wire fɛw, dɔ na n debɩ buruulera, ga n hale mɛr Thãgba Kɔ̃tɩnɩ ƴɛbʋrɔ bɔɔ khorr. Dɔ gɩ do Ɩjɩrayɛl bɩsanaa kpam khorr wa n hɩɩn bɔɔ fɛw. 9 Aarɔ̃ na ɔɔ bikũusɔ na hɩna buruulera. Wɩ khɔ gɩ pa sãasɩ paar gɩdonɩ thɩ̃ khaa gɩ na sobɔr, kɛ wɩ tini gɩrɛraakɛ wɩ n thiini dɔɔra mɛr Thãgba Kɔ̃tɩnɩ ƴɛbʋrɔ. Awɩ jɔfʋ gɩ khorr wa n hɩɩn.»
Sor heene Thãgba nɩɩr sopuurə na sopuu caar dɩɩdɩɩra.
10 Wi bɩɛl Ɩjɩrayɛl bɩsã bɩɛl gɩ dɩ ɔɔ nɩ do Ɩjɩrayɛl khɛr, sɩ ɔɔ thɩ do Ejipitidaar. Dɩ a pɔr le Ɩjɩrayɛl bɩsanaa thɩ̃thɩɩn. Dɩ mɔ̃ wɩ thenɩ kha na Ɩjɩrayɛl bɩsã bɩɛl, sʋʋ ɩɩrɛ Ɩjɩrayɛl khɛrɩ bikuunaale na Ɩjɩrayɛl bɩsã bɩɛlaale, le jɛw. 11 Dɩ Ɩjɩrayɛl khɛrɩlee bikuun kpɛr Thãgbaa, a nɩɩrʋ. Dɩ wɩ fʋʋrɛ a jalna Mʋɩjɩra. Kuunilee nɩɩ i n dʋɔn Selomɩtɩ; Dɩbɩrɩɩ bikhɛr gɩ, a the Dãa cara. 12 Dɩ wɩ khaanʋʋnɛ bɔɔbɔɔ dɩ wa n pɩɛrna gɩrɛɛkɛ Thãgba Kɔ̃tɩnɩ thɛthɛ na sonɩ na ɔɔ nɔ.
13 Dɩ Thãgba Kɔ̃tɩn sor Mʋɩjɩra ayɩ: 14 «Te kuunilera nɩrɛ mɩnɩ, le jɛw a thɛna khuirə. Wɩrɛ fɛʋʋkɛ nɩɛnɛnɩ dɩ nɩɩrna mɩ n dɛ̃ɛ awɩ ɲɛ̃ ɔɔ yʋɔ sɩ Ɩjɩrayɛl bɩsana fɛw n dʋʋrʋ na bokana wɩ kʋ. 15 Agɩpɩ fɩ mɩɛ Ɩjɩrayɛl bɩsana, fɩ so war: "Tibil wo tibilikɛ na nɩrɛnɩ ɔɔ Thãgba ntɛɛ yʋɔ puure ha. 16 Tibil wo tibilikɛ na nɩrɛnɩ mɛr Thãgba Kɔ̃tɩn, nɩ kʋɔ. Ɩjɩrayɛl bɩsana ɓibi na dʋrɛɛ na bokana a na kʋ. A kpakpal ha ntɛ, a dʋɔdaar gɩ, sa nɩɩr mɛr Thãgba Kɔ̃tɩn, nɩ kʋɔ. 17 A tibil be tibil a kʋ, nɩ kʋɔ. 18 A tibil be tibili nʋ̃ a kʋ, ntɛ na lɩmɩnɛ nʋ̃ yire. 19 A tibil pɛ tibilə taan, nɩ pɩɛraa taana, mɔna a cʋʋnɩ oti. 20 A ntɛ kha tibil paar, nɩ lɩmaa kharra oti. A ntɛ khoro tibil yire, nɩ lɩmaa yi khororera oti. A ntɛ kha tibil ɲɩnɛ, nɩ lɩmaa ɲɩ̃ khaara oti. Nɩ pɛ ntɛra tã ca dɔɔkɛra 'lɩm a pɛnɩ ɔɔ alãkha tibilə. 21 A tibil be nʋmɩ a kʋ, a birsene nʋ̃ yire, sɩ a tibil be tibil a kʋ nɩ kʋɔ. 22 Kpakpala woo, dʋɔdara woo, jɔfʋ ca bɩɛlɩlera gɩ. Mɛr dʋɔn Thãgba Kɔ̃tɩn anɩ Thãgba." »
23 Dɩ Mʋɩjɩ gba mɩɛ Ɩjɩrayɛl bɩsana ɔmɛ̃, dɩ wɩ ti kuunilera jɛw nɩrɛnɩ Thãgba, a thena khuirə a dʋʋrʋ na bokana a kʋ. Dɩ Ɩjɩrayɛl bɩsana cʋʋrɛ gɩrɛ fɛʋʋkɛra Thãgba Kɔ̃tɩn kɔɔ sonɩ Mʋɩjɩra.