JƆFƲ ƖJƖRAYƐL BƖSANAA KPA JƐ WI KƆ̃TƖ̃SƆƆRA
Hɩɩr wi kpa jɛr
23
1 Thãgba Kɔ̃tɩn sor Mʋɩjɩra ayɩ: 2 «Mɩɛnɛ Ɩjɩrayɛl bɩsana aa mɩ sor ayɩ: "Gɩrɛ dʋɔnɩ ɩ̃ kpa jɛ kɔ̃tɩ̃sɔ na ʋmɔ̃ bɔɔ ga n hanɩ, gɛr dʋɔn kpa jɛ kɔ̃tɩnaakɛ na n cʋʋnɩ ɩ̃ i dʋbɩra. 3 Wire maadõ dʋɔn thɔ̃ do wire. Sɩ wire makoɲɔdaara, hɩɩr wire gɩ. Nɩ hanana kpa jɛ kɔ̃tɩ̃ɩ ɩ̃ i dʋbɩra. Na n cʋʋ thɔ̃ bɩɛlakɛ ga wiila', gɩdonɩ mɛr Thãgba Kɔ̃tɩnɩ hɩɩr wi gɩ paar wo paarɩkɛ na hanɩ.4 Nɩ yɛ kɛ mɛr Thãgba Kɔ̃tɩnɩ kpa jɛ kɔ̃tɩ̃sɔ wo, kɛ dʋɔnɩ kpa jɛ kɔ̃tɩnaakɛ na n cʋʋnɩ agɩ bɔsɔɔra.
Pakɩ na buruukɛ na hananɩ tabɩɩraa fɛtɩ.
5 Yɩɛrɩ caca sɩporɩ wire yʋɔr yenã wirə dʋɔr birə bɔɔ, Pakɩ kpa jɛr na hale mɛr Thãgba Kɔ̃tɩnɩ i dʋbɩra. 6 Sɩ wire yʋɔr yemɔy wirera sɩpor bɩɛlaalera, gɛr na dʋɔn buruukɛ na hananɩ tabɩɩraa fɛtɩ mɛr Thãgba Kɔ̃tɩnɩ i dʋbɩra. Buruukɛ na hananɩ tabɩɩra na kho a na cʋʋna wire makoɲɔ. 7 Caca wirera na hananɛ kpa jɛ kɔ̃tɩ̃ɩ ɩ̃ i dʋbɩra. Na n cʋʋ thɔ̃ bɩɛllakɛ ga wiila'. 8 Bonɩ thiinə na n ji mɛr Thãgba Kɔ̃tɩnna wire wo wire gɩ dana wire makoɲɔɔle. Sɩ wire makoɲɔ wirera na hananɛ kpa jɛ kɔ̃tɩ̃ɩ wo ɩ̃ i dʋbɩra. Na n cʋʋ thɔ̃ bɩɛllakɛ ga wiila'." »
Jʋ pha li kpa jɛr
9 Thãgba Kɔ̃tɩn sor Mʋɩjɩra ayɩ: 10 «Sɔ Ɩjɩrayɛl bɩsanana aa mɩ sor ayɩ: "Ɔbɔɔkɛ na lonɩ dɩɩraakɛ ma ha nɩnɩ, a na kha le jɔ, nɩ kɔɔ jalana jʋ pha lire anɩ jʋraakɛ na khanɩ a hana bonɩ jidaar. 11 Bonɩ jidaar n gba jʋ pha lireelera a jɛna mɛr Thãgba Kɔ̃tɩnɩ ƴɛbʋrɔ hɩɩr cɔ wire gɩ do nɔɔ ɩ̃ tee gɩ. 12 Ga wiilera na jɛnanɩ jʋ lireele nɩ je bonɩ thiinə mɛr Thãgba Kɔ̃tɩnna na yɛ bɩɛl bana ɓolʋ, kɛ na hananɩ taana'. 13 Nɩ jenə dakha mɩ̃ phuu, kilə maadõ, kɛ na gbʋrnanɩ niin, nɩ thii dɔɔra ga n hʋ̃ mɛr Thãgba Kɔ̃tɩn daw. Nɩ ɓananɔ dakha dɩvɛ̃ litiri bɩɛl na dakuru. 14 Ado wireele 'lɩm na dã pɩ, dɩ nɩ pɔna mɛr anɩ Thãgbaa khaarda ke dɔnɩ jʋ pha lire a 'laa pa', na n kho ga buru, dɩ ga bi cɩɩna gɩ, dɩ ga jʋ hu ga. Nɛrɛ na anɩ məlsɔɔ jɔfʋ gɩ khorr paar wo paarɩkɛ na hanɩ.
Lɛ thɩ̃ gba kpa jɛr
15 A fʋna hɩɩr kɔ̃tɩ̃ cɔ wire, kɛ dɔnɩ wireekɛ na jɛnanɩ jʋ lire ɩ̃ ƴɛbʋrɔ, nɩ fɔ a thera jɩmasɩ makoɲɔ biləni. 16 Nɩ thera wire kpalaɲɔ yʋɔr jɩmasɩ makoɲɔɔlee bɩnɔ kɛ na dɔnɩ ɲɛ̃be makoɲɔɔ hɩɩr kɔ̃tɩ̃ cɔ wi sɩ nɩ bir nɩ ji mɛr Thãgba Kɔ̃tɩnna bonɩ phaa wo. 17 Nɩ hanana buru yeɲɔ, kɛ na thenanɩ anɩ pa, gɩ do gɩrɛ na jɛnanɩ ɩ̃ ƴɛbʋrɔ. Mɩ̃ bʋɔ kilə yẽther har buru bɩɛl. Nɩ pɩɛr tabɩɩr a hɛ. Gɛr dʋɔn lɛ thɩ̃ gba bonɩɛ mɛr Thãgba Kɔ̃tɩnna. 18 Nɩ ɓananɔ burusɔɔraale, yɛ bɩɛl banake ɓola makoɲɔ, kɛ na hananɩ taana', na nake ɓolʋ bɩɛl, na banakena yeɲɔ, na mɩ̃ phuu na dɩvɛ̃ gɩ mɩɛ kha. Nɩ thiə gɩ fɛw dɔɔra ga n hʋ̃ mɛr Thãgba Kɔ̃tɩn daw. 19 Nɩ hanana dakha wo bʋkɩɩr bɩɛl, kɛ na jinə marnɩ so hɛl bonɩɛ, na yɛ bɩɛl bana ɓola yeɲɔ, kɛ na jinə marnɩ 'likha bonɩɛ. 20 Bonɩ jidaar n gba nʋmaalera na caca thɩ̃ pha burusɔɔra fɛw a jɛna mɛr Thãgba Kɔ̃tɩnɩ ƴɛbʋrɔ, nakha bana ɓola yeɲɔɔlera, a pɛ gɩ mɛr Thãgba Kɔ̃tɩnɩ ƴɔɔ, agɩpɩ bonɩ jidaar hɩna. 21 Ga wiilera na hananɛ kpa jɛ kɔ̃tɩ̃ɩ ɩ̃ i dʋbɩra. Na n cʋʋ thɔ̃ bɩɛllakɛ ga wiila'. Nɛrɛ na anɩ məlsɔɔ jɔfʋ gɩ khorr paar wo paarɩkɛ na hanɩ. 22 Ɔbɔɔkɛ na n khanɩ anɩ jʋ lɔɔ, nɩ sɛ dɩkhãa pa lɛ nʋɔra a faa; na n kha ga. Na n kpɛ dakpɛnanɛɛkɛ sɛna'. Nɩ faa gele a hana bɔkɔ, na kpakpala. Mɛr dʋɔn Thãgba Kɔ̃tɩn anɩ Thãgba." »
Kãkar kɔ̃tɩ̃ kpa jɛ wire
23 Thãgba Kɔ̃tɩn sor Mʋɩjɩra ayɩ: 24 «Sɔ Ɩjɩrayɛl bɩsanana aa, mɩ sor ayɩ: "Yɩɛrɩ makoɲɔ sɩporɩ caca wirə, na do narɛ hɩɩr wire biləni, kɛ na n jɩnanɩ. Nɩ ʋna tutuu wire phãphãphã, gɩdonɩ na hananɛ kpa jɛ kɔ̃tɩ̃ɩ ga wiile ɩ̃ i dʋbɩra. 25 Na n cʋʋ thɔ̃ bɩɛllakɛ ga wiila'. Nɩ je mɛr Thãgba Kɔ̃tɩnna bonɩ thiinə." »
So hɛl kpa jɛ wi kɔ̃tɩ̃ɩ
26 Thãgba Kɔ̃tɩn sor Mʋɩjɩra wo ayɩ: 27 «Yɩɛrɩ makoɲɔ sɩporaalera, ɔɔ wire yʋɔr wirə na dʋɔn so hɛl wi kɔ̃tɩ̃ɩ. Nɩ hanana kpa jɛ kɔ̃tɩ̃ɩ ɩ̃ i dʋbɩra. Nɩ wurə anɩbara na nɔ lir, a jənə bonɩ thiinə mɛr Thãgba Kɔ̃tɩnna. 28 Na n cʋʋ thɔ̃ bɩɛlakɛ ga wiila', gɩdonɩ so hɛl wi kɔ̃tɩ̃ɩ gɩ, kɛ wa hɛlnɩ anɩ so mɛr Thãgba Kɔ̃tɩn, anɩ Thãgbaa ƴɛbʋrɔ. 29 Tibil wo tibilikɛ na wurənɩ ɔɔbara na nɔ lir ga wiila', wɩ hɛla ntɛ ɔɔ toora a faa. 30 Tibil wo tibilikɛ na bɔnɩ sɩ na cʋʋ dɩkhaa thɔ̃ ga wiile, ma bũburoone ɔɔ too thɩ̃thɩɩn. 31 Na n cʋʋ thɔ̃ bɩɛlaka'. Nɛrɛ na anɩ məlsɔɔ jɔfʋ gɩ khor paar wo paarɩkɛ na hanɩ. 32 Hɩɩr wire ga do nar biləni. Nɩ wurə anɩbara na nɔ lir. A fʋna sɩporɩlee wire yʋɔr phe birera dʋɔrɔ, a na jalna na dana ɔɔ dɩwɩlɔ dʋɔrɔ nɩ hɩnɛ hɩɩr wireele.»
Wa too kpa jɛr \ref The 29. 12-40
33 Thãgba Kɔ̃tɩn sor Mʋɩjɩra wo a yɩ: 34 «Sɔ Ɩjɩrayɛl bɩsanana aa, mɩ sor a yɩ: "Yɩɛrɩ makoɲɔ sɩporara, ɔɔ wire yʋɔr yemɔɩra, gɛr na dʋɔn wa too fɛtɩ mɛr Thãgba Kɔ̃tɩnɩ i dʋbɩra gɩ dana wire makoɲɔ. 35 Caca wirera, na hananɛ kpa jɛ kɔ̃tɩ̃ɩ ɩ̃ i dʋbɩra. Na n cʋʋ thɔ̃ khena ga wiila'. 36 Wire makoɲɔɔ bɩnɔ, nɩ je mɛr Thãgba Kɔ̃tɩnna bonɩ thiinə. Sɩ makõther wirera na hananɛ kpa jɛ kɔ̃tɩ̃ɩ ɩ̃ i dʋbɩra; dɩ nɩ je mɛr Thãgba Kɔ̃tɩnna bonɩ thiinə. Kpa jɛ kɔ̃tɩ̃ɩ ga do nar na sobɔr. Na n cʋʋ thɔ̃ khena ga wiila'. 37 Gɛr dʋɔn mɛr Thãgba Kɔ̃tɩnɩ fɛtɩ kɔ̃tɩ̃sɔ. Kpa jɛ kɔ̃tɩna gɩ, na n ji mɛr Thãgba Kɔ̃tɩnna bonɩ thiinəsɔ, na 'likha bonɩɛsɔ, kɛ na ɓanɔnɩ mɩ̃ phuu na dakha dɩvɛ̃. Nɩ cʋɛ kpa jɛ dɔɔ ɔɔ bɔra oti. 38 Na n je ga bonɩsɔɔkɛra a na ɓana hɩɩr wi bonɩɛsɔraakɛ nɩ n kɔɔ jini mɛr Thãgba Kɔ̃tɩnna, na anɩ khaarda bonɩsɔ fɛw na anɩ nɔ hɛl bonɩsɔ fɛw, na dakha bonɩɛ fɛʋʋkɛ thɛnɩ anɩ ƴaala, kɛ na jini mɛr Thãgba Kɔ̃tɩnna.
39 Yɩɛrɩ makoɲɔ sɩporɩ wire yʋɔr yemɔy wirəəle, ɔbɔɔkɛ na khanɩ anɩ jʋ na pɩ anɩ dʋɔ, nɩ cʋɛ fɛtɩ mɛr Thãgba Kɔ̃tɩnɩ i dʋbɩra a cʋɛna wire makoɲɔ. Caca wirera na wire makõther wirera kɛ dɔnɩ pɩpɩɩ wire, hɩɩr wire gɩ biləni. 40 Na fɔnɩ caca wirera, nɩ gba thɩr bi bɔy, kɛ sɛnɩ jɩrkpɩrɩɩ, na kalã jɛ̃ɛ, na thɩr jɛ̃ɛkɛ hananɩ faa lukpuruu, na po nɩ thɩr jɛ̃ɛ a kãkanɛna mɛr Thãgba Kɔ̃tɩn anɩ Thãgbaa ƴɛbʋrɔ, gɩ dana wire makoɲɔ. 41 Yɩɛr wo yɩɛr fɛw na n cʋɛ fɛtɩ caarɩkɛra mɛr Thãgba Kɔ̃tɩnɩ i dʋbɩra gɩ dana wire makoɲɔ. Nɛrɛ na anɩ məlsɔ fɛʋʋ jɔfʋ gɩ khorr. Na n cʋɛ gɩ yɩɛrɩ ɲẽbe makoɲɔ sɩpora. 42 Na n cɔ waw, nɛr Ɩjɩrayɛl bɩsana fɛw, a cʋɛna wire makoɲɔ, 43 gɩ do nɔɔ anɩ məlsɔɔkɛ n kpaanɛnɩ n jɩ, dɩ ɔbɔɔkɛ mɩ kɔɔ ti nɩnɩ Ejipiti dɩɩra a thena pɩ, waʋsɔ mɩ kɔɔ cʋʋ nɩ dɩ na n cɔ. Mɛr dʋɔn Thãgba Kɔ̃tɩn anɩ Thãgba." »
44 Dɩ Mʋɩjɩ mɩɛrɛ Ɩjɩrayɛl bɩsana Thãgba Kɔ̃tɩnɩ kpa jɛ kɔ̃tɩ̃sɔɔra ɔmɛ̃.