Jɔfʋ bonɩ ji dɩko thɩmɩɩra.
22
1 Thãgba Kɔ̃tɩn sor Mʋɩjɩra ayɩ: 2 «Mɔ̃ Aarɔ̃ na ɔɔ bikũusɔ na fʋnɩ sɩ wa kpɔ̃kpɔrɔ̃ ɩ̃ i phuə', mɩɛnɛ wɩ, wa n jã thɩ̃ khaasɔɔraakɛ Ɩjɩrayɛl bɩsana n tini ɩ̃ ti. Mɛr dʋɔn Thãgba Kɔ̃tɩn.3 Sɔ war ayɛ: "Anɩ mələ fɛw, bonɩ jidaar wo bonɩ jidaarɩkɛ bisenenɩ jɔfʋ hʋɛra sa thar Ɩjɩrayɛl bɩsanaa thɩ̃ khasɔraakɛ wɩ n tini dɩ wa n ha mɛr Thãgba Kɔ̃tɩn, nɩ hɛla ntɛɛle ɩ̃ bonɩ ji thɔmana a faa. Mɛr dʋɔn Thãgba Kɔ̃tɩn.
4 Ntɛɛkɛ Aarɔ̃ɔ mələ na hananɩ tomɩ lo khoo, agɩbo khɛr khoo, na hana hʋɛ a na kho bonɩ ji thɩ̃ khaasɔ, sɩ gɩ do aa kɔɔ phʋɔl ɔɔbara ɓoa' ga. Mɛna gɩ ha na Aarɔ̃ɔ məl ʋrɛ na thaanɩ tibiləəkɛ thaanɩ khirera na Aarɔ̃ɔ məl ʋrɛ sɩnã n faarɔnɩ, 5 na Aarɔ̃ɔ məl ʋrɛ na thaanɩ thɩɛnaakɛ n haalɛnɩ na bɩnɛ, na ɔɔ məl ʋrɛ na thaanɩ tibiləəkɛ biseneni jɔfʋ hʋɛra agɩbo ɔɔ məl ʋrɛ wele na tharɔnɩ a bisere jɔfʋ hʋɛra. 6 Aarɔ̃ɔ məl ʋrɛ na thaanɩ gelela na toore na biserera gɩ dana dʋɔrɔ. A na kho bonɩ ji thɩ̃ khaasɔ, sɩ gɩ do aa kɔɔ hʋ ɲʋɔn ɓoa' ga. 7 A wire lõ pɩ, ntɛ phure mɛ̃ jɔfʋ hʋɛra. A punone dɩphã a bir kho bonɩ ji thɩ̃ khaasɔ, gɩdonɩ gɛr dʋɔn ɔɔ dɩko. 8 Bonɩ jidaar na hana hʋɛ a na kho nʋmɩɩkɛ khenɩ, agɩbo nʋ̃ kpɩɩ kʋnɩ, a ƴɔ̃ƴɔɔnɔ ɔɔbara ga. Mɛr dʋɔn Thãgba Kɔ̃tɩn. 9 Bonɩ jidara na n jɩɛ hɩɩn ɩ̃ jɔfʋsɔ, gɩ do nɔɔ wa n kpɔ̃kpɔrɔ̃ gɩ, a heeno sor dɩbara, a khiirə'. Mɛr dʋɔn Thãgba Kɔ̃tɩn, kɛ lea wɩnɩ kpɩɩ puurera dɩ wɩ phu. 10 Tɩɩ khɩɩ bɩɛlakɛ na n kho bonɩ ji thɩ̃ khaa ga. Bonɩ jidaarɩ kpakpalɩkɛ dɔnɩ hʋ ka, narakɛ ɔɔ paadaar na n kho bonɩ ji thɩ̃ khaa ga. 11 Sɩ ado dee gɩ dɩ the na mũsumo, agɩbo dee gɩ, kɛ wɩ kɔnɩ ɔɔ cɔ, a punone a kho bonɩ jidaarɩ dɩko. 12 Sɩ a bonɩ jidaarɩ bikhɛr he tɩɩ khɩɩ, aa hana hʋɛ a na kho gɩrɛ wɩ tini kɛ dʋɔnɩ bonɩ ji thɩ̃ khaasɔa'. 13 Sɩ ado khikhɛrʋ ha bonɩ jidaarɩ bikhɛr dɔɔ, agɩbo ɔɔ ko fagʋʋrɛ sɩ aa hana bɩsaana', dɩ kɛr bir ɔɔ thɩɩ cɔ mɔ̃ a kɔɔ donɩ biire, a punone a kho ɔɔ thɩɩ dɩko. Sɩ tɩɩ khɩɩ bɩɛlakɛ na n khoa'. 14 A tibil khɩɩ dɩ, a kho bonɩ ji thɩ̃ khaa, ntɛ n birsene thɩ̃doo nɔ sa birə tɩnɛnɛ ɔ nɔra tɩnɛ paar yemɔy a gba tɩnɛ pa bɩɛl a dɛbarɔ a hana bonɩ jidaar.
15 Bonɩ jidara na n kpɔ̃kpɔrɔ̃ bonɩ ji thɩ̃ khaasɔɔkɛ Ɩjɩrayɛl bɩsana n tini awɩ khaardasɔɔra a ha mɛr Thãgba Kɔ̃tɩnna'. 16 Ga hor wa tor Ɩjɩrayɛl bɩsana dɩɩ. Dɩ wa 'lɛr sor ado wɩ kho awɩ thɛthɛɛ bonɩ ji thɩ̃ khasɔ. Mɛr dʋɔn Thãgba Kɔ̃tɩn kɛ lea wɩnɩ kpɩɩ puurera wɩ phu." »
Jɔfʋ bonɩ ji nʋmana
17 Thãgba Kɔ̃tɩn sor Mʋɩjɩra ayɩ: 18 «Sɔ Aarɔ̃ na ɔɔ bikũusɔɔra, na Ɩjɩrayɛl bɩsana fɛʋra gɩrɛ mɩ sonɩ ayɩ: "Ado tibil Ɩjɩrayɛl bɩsanana, agɩbo kpakpalaakɛ hanɩ Ɩjɩrayɛl bɩsanaa thɩ̃thɩɩn ƴaal a ji mɛr Thãgba Kɔ̃tɩnna bonɩ thiinə, ado nɔ hɛl bonɩɛ gɩ, agɩbo bonɩɛ gɩɩkɛ thɛnɩ ntɛɛ ƴaala, 19 ado ntɛ ƴaalɛ ɩ̃ tea ɔɔ bonɩ, a hanana nʋ̃kʋʋrɩkɛ, na hananɩ taana': a na gɩ, a banaa gɩ, a bʋ gɩ. 20 Na n ji mar bonɩɛ yuurəkɛ na nʋmɩɩkɛ hananɩ taana', a mɛ̃ ga, ma tee anɩ bona'. 21 Ado tibil ƴaal a ji mɛr Thãgba Kɔ̃tɩnna 'likha bonɩɛ: a nʋ̃ kɔ̃tɩ̃ɩ gɩ, a nʋ̃ yɩra gɩ, nɔ hɛl bonɩɛra, agɩbo bonɩɛraakɛ thɛnɩ ntɛɛ ƴaala, ntɛ n hanana nʋmɩɩkɛ na hananɩ taana', ado a n ƴaalɛ ɩ̃ tea ɔɔ bonɩ. Tã buurəkɛ na n haaraa ga. 22 Na n jinə nʋ̃ yaarʋ, dɩ nɔkʋɛ gɩ, dɩ ʋrɛ kuronɩ dɩkha ga. Agɩbo nʋmɩɩkɛ hananɩ bãgɩlã, agɩbo jẽkpoo gɩ, dɩ thaan ga. Na n jinə nʋ̃ wele bonɩ thiinə yuurəkɛ bonɩ ji paara, mɛr Thãgba Kɔ̃tɩnna ga. 23 Fɩ punone wer a jinə ga nʋ̃sɔɔle, a na gɩ, a banaa gɩ, a hana tomɩr ɓã ʋkha dɩɩ gbaan a jɔ kha, khaarda bonɩɛ, sɩ ma tee gɩ nɔ hɛl bonɩɛra ga. 24 Na n ji bonɩɛ yuurəkɛ mɛr Thãgba Kɔ̃tɩnna na nʋmɩɩkɛ kpulobe maalnɩ, agɩbo kpulobe cʋɔrnɩ, agɩbo ʋrɛɛ kpulobi wɩ fʋʋrnɩ gɩ, dɩ ʋrɛɛda wɩ kurnɩ ga. Na n cʋʋ gele yuurəkɛ anɩ dʋɔa'. 25 Na n tee nʋ̃ ca wele kpakpalala yuurəkɛ gɩ do dikorɩkɛ na pɔnanɩ mɛr anɩ Thãgbaa bonɩ ji para ga. Mɔ̃ dɩkha kur warnɩ, wɩ hananɛ taan. Ma tee nɩ nʋ̃ ca wela'." »
26 Thãgba Kɔ̃tɩn sor Mʋɩjɩra wo ayɩ: 27 «A nʋmɩ kɔ̃ dabuu, a na gɩ, a banaa gɩ, a bʋ gɩ, dɔ a cʋʋ wire makoɲɔ ɓo na ɔɔ nɩ, sɩ a fʋna wire makõther wirera nɩ punone jinə bonɩɛ dɩ mɛr Thãgba Kɔ̃tɩn tee mɔna bonɩ thiinə n hanɩ. 28 Sɩ na n kperẽ nʋmɩ: na, agɩbo banaa, agɩbo bʋ, danɩɩ na ɔɔ dabu wi bɩɛl a kʋʋra'. 29 Ɔbɔɔkɛ na n jini bonɩɛ nɩ fʋɔrna mɛr Thãgba Kɔ̃tɩn, nɩ je mɔ̃ gɩ teenanɩ, ɩ̃ puno ɩ̃ tee. 30 Wi bɩɛlɩlera na kho ga nʋ̃. Na n sɩ dɩkha a faa gɩ wɩl dɩɩa'. Mɛr dʋɔn Thãgba Kɔ̃tɩn.
31 Na n kpa ɩ̃ fɩlsɔɔra, a na cʋɛ gɩ oti. Mɛr dʋɔn Thãgba Kɔ̃tɩn.