Jɔfʋ bonɩ jidaraa cʋʋ para
21
1 Thãgba Kɔ̃tɩn sor Mʋɩjɩra ayɩ: «Sɔ bonɩ jidarara, kɛ dɔnɩ Aarɔ̃ɔ bikũusɔ gɩrɛ mɩ sonɩ ayɩ: "Bonɩ jidaar na n thar khirira, adorakɛ ɔɔ tibil gɩ a bise ɔɔbara jɔfʋ hʋɛra ga; 2 gɩ do ɔɔ omɩ bɩnɔ ha ntɛ: ɔɔ nɩ, na ɔɔ thɩ na ɔɔ bikuun, na ɔɔ bikhɛr, na ɔɔ õkuun, 3 na dakha ɔɔ õkhɛr ʋrɛ na hɛnɩ kuun pɩ a the lõ cɔ ka kpɩɩra ga, we wer a punone a bisero ɔɔbara jɔfʋ hʋɛra. 4 Mɔ̃ a donɩ kɔ̃tɩn ɔɔ toora, aa teena a bise ɔɔbara a kpɔ̃kpɔrɔ̃ cʋʋrɩkɛ a hanana'. 5 Bonɩ jidaar na n kpu yʋʋ, agɩbo a bel nɔkhuusi bilə bilə, agɩbo a lɩɩrɛ tomɩr gɩ nɩna dɩ yilẽbera a ha ga. 6 Wɩ dɔ tɩɩ phuusɔ mɛr awɩ Thãgbara. Wa n kpɔ̃kpɔrɔ̃ mɛr awɩ Thãgbaa iə'. Mɔ̃ wɩ donɩ wɩrɛ n jenɩ mɛr Thãgba Kɔ̃tɩn, awɩ Thãgbara bonɩɛɛkɛ wɩ n thiini dɔɔra, kɛ dʋɔnɩ ɩ̃ dɩko dɔ wɩ phu. 7 Wa n gba khɛr bɔdɛl a hea'. Wa n gba khɛrɩkɛ kɔɔ jɛnɩ kuuna'. Wa n he khɛr faana ga, gɩdonɩ tɩɩ phuu bonɩ jidaar do mɛr ɔɔ Thãgbara. 8 Gba bonɩ jidaar a do far tɩɩ phuu, gɩdonɩ ɔr n gbaan mɛr afɩ Thãgbaa bonɩɩkɛ dʋɔnɩ dikorɩkɛ fɩ n 'laanɩ da n ha mɩ. Gɛr gɩ, dɔ a do far tɩɩ phuu, gɩdonɩ mɛr Thãgba Kɔ̃tɩn, kɛ lea nɩnɩ puurera nɩ phu, mɩ phure. 9 A bonɩ jidaarɩ bikhɛr cʋʋ bɔdɛl thɔma a ƴɔ̃ƴɔ̃ɔ ɔɔbara, ɔɔ thɩra a pɛ yicuru. Wɩ thiəə dɔɔra.10 Bonɩ jidaarɩkɛ 'lɛnɩ kɔ̃tɩɩnɛ ɔɔ omɩsɔɔra, kɛ wɩ pɛnɩ niin yʋɔ, a pɩɛraa gbõdaar dʋʋr da n to gbõdaar kẽkena, aa ha yilẽbera, sɩ a na n faa yʋ biirə'; a na n ɓəər kẽkena ga. 11 A na n thar khirera ga. A na n biserakɛ ɔɔbara jɔfʋ hʋɛra, dɩ ɔɔ thɩɩ khirə gɩ, dɩ ɔɔ nɩɩ khirə ga. 12 A na n the mɛr Thãgba cãa waw gɩ ho a na kpɔ̃kpɔrɔnɛ mɛr Thãgba cãa waa ga, gɩdonɩ wɩ pɩɛraarɛ niin dɩ do gbõdaar. Mɛr dʋɔn Thãgba Kɔ̃tɩn. 13 Dɔ a he khebirikɛ na jɛnɩ kuuna'. 14 A na n gba khikhɛrʋ, dɩ khɛr faana gɩ, dɩ khɛr bɔdɛl gɩ, dɩ khɛrɩkɛ kɔɔ jɛnɩ kuun ga. Sɩ ɔɔ caa thɩ̃thɩɩn a na he khebirikɛ na jɛnɩ kuuna'. 15 Gɩ do nɔɔ a na kɔ̃ ca kpalʋ a na yaa ɔɔ mələ ga. Mɛr dʋɔn Thãgba Kɔ̃tɩn, kɛ leaanɩ kpɩɩ puurera dɩ phu." »
Jɔfʋʋkɛ n nɛnanɩ mɔ̃ bonɩ jidaar teenanɩ a hana tomɩra.
16 Thãgba Kɔ̃tɩn sor Mʋɩjɩra ayɩ: 17 «Mɩɛnɛ Aarɔ̃ ayɛ: "Fɛr Aarɔ̃ɔ məl wo məlikɛ na kpaanɛnɩ, tibilikɛ hananɩ taan tomɩra na n wɔrɔ̃ bonɩ ji paar a do mar bonɩ ji thɔma ga. 18 Tibil wo tibilikɛ hananɩ taan tomɩra: yaarʋ, nɔkʋɛ, na ntɛɛkɛ ɔɔ mɩ̃ka dɩnɩ, na ntɛɛkɛ ɔɔ tomɩ dɩkhãa pa gbaanɩ a jɔ kha; 19 na tibilikɛ khanɩ nɔɔ, agɩbo ɲɔ̃ɔ, 20 na tibilikɛ thɛnɩ gune, na tibilikɛ sʋʋrnɛnɩ, na tibilikɛ hananɩ yi phulole yiro, na tibilikɛ hananɩ jẽkpoo, na tibilikɛ hananɩ jɩla, na tibilikɛ kpulobe cʋɔrnɩ, wele fɛw, wa n wɔrɔ̃ la'. 21 Tibil wo tibilikɛ thɛnɩ Aarɔ̃ bonɩ jidaarɩ mələ sa hana taan tomɩra, a na n wɔrɔ̃ bonɩ ji paar a ji mɛr Thãgba Kɔ̃tɩnna bonɩɛɛkɛ wɩ n thiini dɔɔra ga. Taanɩle ntɛ hananɩ dɔ kɩrʋ, a na n wɔrɔ̃ le ɩnɩ n do mar bonɩ ji thɔma ga. 22 Sɩ ntɛ punone a na kho mɛr Thãgbaa diko wer, kɛ dɔnɩ bonɩ ji thɩ̃ khaasɔ na bonɩ ji thɩ̃ kha kpɩɩsɔ dakha. 23 Sɩ ntɛ na n wɔrɔ̃ pa phu lõfonɔ kɩ̃kɩɩn, dɩ bonɩ ji paar ga; gɩdonɩ a hananɛ taan tomɩra; gɛr gɩ a na n kpɔ̃kpɔrɔ̃ ɩ̃ pa phusɔɔa'. Mɛr dʋɔn Thãgba Kɔ̃tɩn. Mɛr lea gɩ kpɩɩ puurera dɩɩ phu." » 24 Dɩ Mʋɩjɩ mɩɛrɛ Aarɔ̃, na ɔɔ bikũusɔ, na Ɩjɩrayɛl bɩsana thɩmɩaalera fɛw.