So heene puu cʋʋ caar dɩɩdɩɩra
20
1 Thãgba Kɔ̃tɩn sor Mʋɩjɩra ayɩ: 2 «Sɔ Ɩjɩrayɛl bɩsanana ayɛ: "Ntɛɛkɛ nɛr Ɩjɩrayɛl bɩsanana, agɩbo kpakpalalaakɛ hanɩ anɩ thɩ̃thɩɩn na 'laanɛnɩ ɔɔ bɩsã ʋkha bɩɛl Mɔlɛkɩ thɩlɩ bonɩra, wɩ kʋɔ. Dʋɔdara n dʋrɛɛ na bokana a kɔ. 3 Mɛrɛ thɛthɛrakɛ, ma kɛrɛ ƴɩɛ na ee ntɛɛle a na helʋ ɔɔ too thɩ̃thɩɩn a na faa, gɩrɛraakɛra a 'laanɩ ɔɔ bɩsã ʋkha bɩɛl Mɔlɛkɩ thɩlɩ bonɩra; a bise mɛr Thãgba cãa waa jɔfʋ hʋɛra, a kpɔ̃kpɔrɔna ɩ̃ i phu. 4 A dʋɔdara jɩ gbobɩ sa bo pɛ ntɛraakɛra 'laanɛnɩ ɔɔ bɩsã ʋkha bɩɛl Mɔlɛkɩ thɩlɩ bonɩra, a wa kʋʋa', 5 mɛrɛ ma kɛrɛ ƴɩɛ na ee ntɛ na ɔɔ thɩ kɔ̃ a na hɛl wɩ awɩ too thɩ̃thɩɩn a na faa ɔr na wɩrɛ fɛʋʋkɛ kpaaraanɩ a ƴɔ̃ƴɔ̃ɔ awɩbara Mɔlɛkɩ thɩl jirərə.6 Ado tibil kɛr ƴɩɛ a pɛ wɩrɛraakɛ n kpɩɛnɩ khe, na bʋradararaakɛ n sɔnɩ gɩrɛ na dananɩ ƴɛkʋʋlɔ, a ƴɔ̃ƴɔ̃ɔ ɔɔbara na wɛr, ma kɛrɛ ƴɩɛ na ee ntɛ, a na helʋ ɔɔ too thɩ̃thɩɩn a na faa. 7 Nɩ lea na puure a pho, gɩdonɩ mɛr dʋɔn Thãgba Kɔ̃tɩn anɩ Thãgba.
8 Na n hɩnɛ ɩ̃ jɔfʋsɔ a na cʋɛ gɩ oti. Mɛr dʋɔn Thãgba Kɔ̃tɩnɩkɛ lea nɩnɩ puurera nɩ phu.
9 Tibil wo tibilikɛ na sɔnanɩ ɔɔ thɩ, agɩbo ɔɔ nɩ, wɩ kʋɔ. Ɔr sɔna ɔɔ thɩ, agɩbo ɔɔ nɩ; gɛr gɩ ɔɔ yʋɔra ɔɔ tɔmɩn na heen.
10 A tibil phɩna khɛrɩkɛ dʋɔnɩ kũudaar, kɛ dɔnɩ ɔɔ alãkha tibili khɛr, wɩ kʋɔ, ɔr na khɛr dɔɔra fɛw. 11 A tibil phɩna ɔɔ thɩɩ khɛr, a pɛ ɔɔ thɩra yicuru wɩ kɔ ntɛɛle, ɔr na khɛr dɔɔra fɛw. Awɩ yʋɔra awɩ tɔmɩn na heen. 12 A tibil phɩna ɔɔ bikuuni khɛr, wɩ kʋrɛ wɩ, wɛr yeɲɔra fɛw. Wɩ cʋʋrɛ kpɔ̃kpɔrɔ̃ kɔ̃tɩ̃ɩ ka. Awɩ yʋɔra awɩ tɔmɩn na heen. 13 A kuun phɩna alãkha kuun mɔ̃ wɩ n phɩnanɩ khɛr, wɛr fɛw cʋʋrɛ puure dɩɩ kpal ka, wɩ kʋrɛ wɩ. Awɩ yʋɔra awɩ tɔmɩn na heen. 14 A tibil kperẽ nɩrɛ na bikhɩ̃ɛ fɛw a he, cʋʋ pa puu gɩ a kpal ka. Wɩ thiə ntɛ na khɛrara fɛw dɔɔra na yire, gɩ do nɔɔ cʋʋ pa puu caarɩle na n halerakɛ anɩ thɩ̃thɩɩna'. 15 A tibil phɩna nʋmɩ, wɩ kʋɔ, sa kɔ nʋ̃ dɔɔle a faa. 16 A khɛr 'laa ɔɔbara nʋmɩna dɩ jʋʋnʋ, nɩ kɔ khɛr dɔɔle na nʋmɩna. Nɩ kʋrɛ wɩ fɛw. Awɩ yʋɔra awɩ tɔmɩn na heen. 17 A tibil gba ɔɔ õkhɛr, kɛ thɩ bɩɛl kɔna wɩnɩ, agɩbo nɩ bɩɛl kɔna wɩnɩ a he, dɩ wɩ phɩ̃ kha, yicur thɩ̃ɛ gɩ. Wɩ hɛla wɩ awɩ too yiro a faa. Kuun dɔɔle, ɔɔ yʋɔ gɩ ha, gɩdonɩ ɔr phɩnana ɔɔ õkhɛr. 18 A tibil phɩna khɛrɩkɛ hanɩ ɔɔ sɩpora, dɩ wɛr fɛw gbɛbɩ a yɩ tɔmɩn, wɩ hɛla wɛr yeɲɔra fɛw awɩ too thɩ̃thɩɩn a faa. 19 Fa n phɩna afɩ nɩɩ õkhɛr dɩ afɩ thɩɩ õkhɛr ga, gɩdonɩ afɩ nɩ, agɩbo afɩ thɩɩ kpɩ̃ɩ bɩnɔ gɩ. Wɩrɛ n cʋɛnɩ thale, awɩ yʋɔ puure ha. 20 A tibil phɩna ɔɔ thɩɩ õkuunɩ khɛr, agɩbo ɔɔ nɩɩ õkuunɩ khɛr ɔɔ thɩɩ õkuuna, agɩbo ɔɔ nɩɩ õkuuna a pɛr yicuru. Kuunna na khɛrɩle fɛw, awɩ yʋɔ sopuu ha. Wa hana bɩsaan sɩ na khiirnə ga. 21 A tibil tee ɔɔ õkuunɩ khɛr a he, kpɔ̃kpɔrɔ̃ cʋʋrɛ gɩ. Ɔɔ õkuuna a pɛr yicuru. Wa hana bɩsaan ga.
22 Na n cʋɛ ɩ̃ so fɛw a na kpana ɩ̃ jɔfʋsɔɔra ɔmɛ̃. Thale na dɔ nɔɔ dɩ dɩɩkɛra mɩ n jalna nɩnɩ gɩrɛ ɩ̃ pɛr, na bo na'. 23 Na n kpa ca wɩrɛɛkɛ ma weelenɩ anɩ ƴɛbʋrɔɔ jɔfʋsɔɔra ga; gɩdonɩ ga cʋʋ pasɔɔkɛra wɩ n kɔɔ cʋʋ dɩɩ thʋ̃ yaa mɩ. 24 Gɛr gɩ dɩ̃ so nar ayɩ: Nɛr na hɩna awɩ dɩ. Ma ha nɛr awɩ dɩra dɩ na hɩ̃. Dɩɩ gɩɩkɛ naƴɩlɛ̃ na thʋʋr hini dɩ ga n cel. Mɛr dʋɔn Thãgba Kɔ̃tɩn anɩ Thãgba. Mɛr lea nɩ kpɩɩ gɩ̃ɩ casɔɔra. 25 Na n jɩɛ ɔ lee paarsɔraakɛ hanɩ nʋ̃ phuusɔ na nʋ̃ bisesɔɔ thɩ̃thɩɩn jɔfʋ hʋɛra, na 'lomin phuusɔ na lomin bisesɔɔ thɩ̃thɩɩn jɔfʋ hʋɛra, gɩ do nɔɔ na n ƴɔ̃ƴɔ̃ɔ anɩbara ga nʋ̃sɔraale, dɩ ga lomĩsɔraale gɩ, agɩbo dɩ thɩ̃ yɩraraakɛ fɛw gɩ, kɛ n kpaarɛnɩ thɩɩra ga. Mɩ kɔɔ mãa hɛl war kpɩɩ a so nar wɩ bisere jɔfʋ hʋɛra. 26 Nɩ dɔ mar tɩɩ phuusɔ gɩdonɩ mɛr Thãgba Kɔ̃tɩn, mɩ phure. Mɩ lee ner kpɩɩ gɩ̃ɩ casɔɔra nɩ dɔ ɩ̃da.
27 Ado tibil hale, a kuun gɩ a khɛr gɩ dɩ kpɛ khe, agɩbo ntɛ n bor dɩ so gɩrɛ na dananɩ ƴɛkʋʋlɔ, nɩ kʋrɛ wɩ. Nɩ dʋrɛ wɩ na bokana a kʋrɛ. Awɩ yʋɔra awɩ tɔmɩn na heen." »