BONƖ JI SƐBƐ 19

Mɔ̃ Thãgba phuu too teenanɩ wɩ hana sa fʋɔrɛɛ

1 Thãgba Kɔ̃tɩn sor Mʋɩjɩra ayɩ: 2 «Sɔ Ɩjɩrayɛl bɩsanana ɓibi gɩrɛ mɛr Thãgba Kɔ̃tɩn sonɩ ayɩ: "Nɩ pho gɩdonɩ mɛr Thãgba Kɔ̃tɩn anɩ Thãgba mɩ phure. 3 Nɛrɛ fɛw bɩɛlbɩɛl, na n cɔ anɩ thɩ na anɩ nɩ. Na n hɩnɛ ɩ̃ hɩɩr wisɔ. Mɛr dʋɔn Thãgba Kɔ̃tɩn anɩ Thãgba.

4 Na n bir kɛr ƴɩɛ pɛ thɩlala ga. Na n hɩl ther a cʋʋ gɩ dɔ thãgba ga. Mɛr dʋɔn Thãgba Kɔ̃tɩn anɩ Thãgba. 5 Ɔbɔɔkɛ na n jini 'likha bonɩɛ mɛr Thãgba Kɔ̃tɩnna; nɩ dɔ gɩ tee kha gɩ do nɔɔ ɩ̃ tee gɩ. 6 Bonɩ ji wireelera, na bonɩ cɔ wire na kho ga nʋ̃, sɩ a gɩ bir sɩ a cɔ balãther wirera nɩ thiə dɔɔra faa. 7 A ntɛ bo sa kho balãther wireraale ga dor bonɩ nʋ̃ kʋɛ a kho dɩ ma tee ntɛɛ bona'. 8 Ntɛɛkɛ na bɔnɩ sɩ na kho ga nʋ̃ʋle, ɔɔ yʋɔ puure ha, gɩdonɩ a kpɔ̃kpɔrɔnɛ thɩ̃ɛɛkɛ wɩ hanɩ mɛr Thãgba Kɔ̃tɩn. Ntɛɛle wɩ hɛlaa ɔɔ toora a faa.

9 Ɔbɔɔkɛ na n khanɩ jɔ anɩ dʋɔ, nɩ sɛ dɩkhãa pa lɛ nʋɔra a faa; na n kha ga. Na n kpɛ jʋ diinəsɔɔkɛ nɩ faana'. 10 Fa n kpɛ dakha dɩvɛ̃ jaarɛsɔɔkɛ sɛnɩ afɩ dɩvɛ̃ thɩrsɔɔra ga. Fa n kɛr bir a uul beekɛ jaalɛna'. Faa gele a hana bɔdara, na kpakpala. Mɛr dʋɔn Thãgba Kɔ̃tɩn anɩ Thãgba.

11 Na n yuə', na n sõso na pɛ kha ga; na n fɩɩl kha ga. 12 Na n we ɩ̃ i a ʋlfɛna sõso ʋlfɛra'; gɩdonɩ ga kpɔ̃kpɔrɔnɛ mɛr afɩ Thãgbaa i. Mɛr dʋɔn Thãgba Kɔ̃tɩn.

13 Fa n hʋɔl afɩ alãkha tibilə ga. Fa n phʋʋnʋa'. Fa n do paadaarɩ lɩmɩ n wɩl dɩɩ afɩ ɲɔ̃kɔɔa'. 14 Fa n nɩɩr nʋʋrʋa'. Fa n pɛ nɛ baradaa yaarʋʋ ƴɛbʋrɔ, kɛ na cʋgɛɛnɩ a bara ga. Hanana maar mɛr afɩ Thãgbara. Mɛr dʋɔn Thãgba Kɔ̃tɩn.

15 Anɩ so gʋʋr para, na n kɩɩl gõgolõ kɩɩla'. Fa n bo pɛ bɔdaara, ɔɔ bɔdaar dora ga. Fa n tee pɛ nũfera, ɔɔ nũfe dora dakha ga. Sɩ na gʋrɛ tɩbɩlaa so ga n telẽ. 16 Fa n kʋɛ afɩ too irə'. Fa n pɛ afɩ alãkha tibilə sõso bɩɩ mɔlɔ a khiroə'. Mɛr dʋɔn Thãgba Kɔ̃tɩn. 17 Fa n laar afɩ omɩ le haara ga. Sɩ na naarɛɛ, gɩ do nɔɔ fa n heen sopuu gɩ do ɔr dɔ nɔɔa'. 18 Fa n tiir helʋa'. Fa n pɛ afɩ too bɩnɔa'. Na afɩ alãkha tibil mɔ̃ fɩ nanɩ afɩ thɛthɛ. Mɛr dʋɔn Thãgba Kɔ̃tɩn.

19 Na n kpa ɩ̃ jɔfʋsɔɔra. Fa n kperẽ nʋ̃ caar yeɲɔ, kɛ hanɩ dɩɩdɩɩ wɩ jʋnɛ kha ga. Fa n ɲaɲaan thɩ̃ diir caar yeɲɔ, a diir afɩ lɔɔa'. Fa n to kɩ̃kɩɩnɩkɛ wɩ gbɛbɩnɩ kẽkẽ caar yeɲɔ a bɛba'.

20 Ɔbɔɔkɛ tibil phɩnanɩ dee khɛrɩkɛ dɔnɩ kuun kpɩɩ wɛdaar, sɩ wa birsee pa', dɩ aa the dee dʋʋra dakha ga, wa 'lɛr sor mɔ̃ jɔfʋ sonɩ; sɩ wa kʋʋr wa', gɩdonɩ khɛr na the dee dʋʋra pa'. 21 Kuunile na hananɛ banakɩɩr a na pɔna mɛr Thãgba Kɔ̃tɩnɩ ƴɛbʋrɔ, le mɛr Thãgba cãa wa lõfonʋɔra gɩ do so gbɛbɩ bonɩdaa. 22 Dɩ bonɩ jidaar na phʋɔlɛ ntɛ na so gbɛbɩ bonɩ banakɩɩrɩle wɩ jinəni bonɩɛra le mɛr Thãgba Kɔ̃tɩnɩ ƴɛbʋrɔ ɔɔ sopuurəəkɛra a cʋʋnɩ dɩ a na 'lɛr sopuu hɛlɛ.

23 Ɔbɔɔkɛ na lonɩ Kanãa dɩɩra, a na diir thɩr caar dɩɩdɩɩ fɛw, kɛ n sɛnɩ be, nɩ gba agɩ bisɔɔkɛ ga senɩ gɩ do nar thɩ̃ khaa. Yɛna yẽthera nɩ gba gɩ, gɩ do nar thɩ̃ khaa; na n kho ga. 24 Balanã yɩɛra nɩ gba agɩ bisɔɔra ɓibi a hana mɛr Thãgba Kɔ̃tɩn na fɔfʋɔr ɓol kɔ̃tɩ̃ɩ. 25 Sɩ balamɔy yɩɛra dɩphã gɛr na n khoro agɩ bisɔ. Dɩ na yɩrɛ anɩ thɩrsɔ ga n jɩɩ se. Mɛr dʋɔn Thãgba Kɔ̃tɩn anɩ Thãgba.

26 Na n kho nʋʋnɩkɛ hananɩ tɔmɩn bɩnɔa'. Na n cʋʋ sɩdumonə'. Na n ƴaal bʋraa ga. 27 Na n bel yʋʋ bilə bilə a finə ga. Na n bel nɔkhuusi bilə bilə a finə ga. 28 Na n lɩɩrɛ anɩ tomɩr te khirə gɩ nɩna dɩ yilẽbera nɩ ha ga. Na n yɩr thɩ̃ɛ anɩ tomɩra' ga. Mɛr dʋɔn Thãgba Kɔ̃tɩn.

29 Fa n tɔ afɩ bikhɛr a pɛ thɩl ji bɔdɛl cʋʋrɛra a na n cʋʋ bɔdɛl thɔma thɩl ƴɔɔ a ƴɔ̃ƴɔɔnʋ, dɩdara ɓibi n gɔ wɩ lõ ga bɔdɛl cʋʋra dakhaba thɔma n hi dɩɩa'. 30 Na n hɩnɛ ɩ̃ hɩɩr wisɔ; a na cɔna ɩ̃ kẽkẽ wa phu. Mɛr dʋɔn Thãgba Kɔ̃tɩn.

31 Na n bir kɛr ƴɩɛ pɛ wɩrɛraakɛ n kpɩɛnɩ khe, dɩ bʋradararaakɛ n sɔnɩ gɩrɛ na dananɩ ƴɛkʋʋlɔ ga. Na n hana wɩ ƴaalɛ, gɩ ho na bisere jɔfʋ hʋɛra anɩbara na wɛra'. Mɛr dʋɔn Thãgba Kɔ̃tɩn anɩ Thãgba. 32 Ɩrɛ jɩlɛ yʋsũu bulodaarɩ ƴɛbʋrɔ a dʋbaa. Hanana cʋʋr tɩɩ kpɛɛnɛna. Hanana maar mɛr afɩ Thãgbara. Mɛr dʋɔn Thãgba Kɔ̃tɩn.

33 A kpakpal pɔ a gbũ nar anɩ dʋɔ, na n phʋʋnʋa'. 34 Nɩ fɔ kpakpalɩkɛ pʋɔnɩ a gbũ anɩ thɩ̃thɩɩn a ho anɩ ca bɩnɔ gɩ. Nɩ naanɛɛ mɔ̃kɛ nɩ nanɩ anɩ thɛthɛ. Na n jɛna dakha mɔ̃ nɩ kɔɔ donɩ kpakpala Ejipiti dɩɩra dɩɩ ha. Mɛr dʋɔn Thãgba Kɔ̃tɩn anɩ Thãgba.

35 Na n cʋʋ gõgolõ cʋʋrɛ yuurəkɛ anɩ so gʋʋr para na anɩ thɩ̃ mɩɛ para na pɔ̃ɔ na anɩ thɩ̃ dʋbɩ mɩɛdara na anɩ thɩ̃ bi mɩɛdara. 36 Nɩ hanana thɩ̃ kpɛdaasɔɔkɛ telenenɩ. Nɩ dɔ thɩ̃ dʋbɩ mɩɛdaa n telẽ, thɩ̃ bi mɩɛdaa n telẽ; thɩ̃ ɲɔ̃ mɩɛdaa n telẽ. Mɛr dʋɔn Thãgba Kɔ̃tɩn anɩ Thãgba, kɛ te nɩnɩ Ejipiti dɩɩra a thena. 37 Na n cʋɛ ɩ̃ so fɛw, a na kpana ɩ̃ jɔfʋsɔɔra fɛw, a na cʋɛ gɩ oti. Mɛr dʋɔn Thãgba Kɔ̃tɩn." »