Herɩkɛ na bʋɔnɔna'.
18
1 Thãgba Kɔ̃tɩn sor Mʋɩjɩra ayɩ: 2 «Sɔ Ɩjɩrayɛl bɩsanana ayɛ: "Mɛr dʋɔn Thãgba Kɔ̃tɩn anɩ Thãgba. 3 Na n cʋʋ gɩrɛɛkɛ n cʋɛnɩ Ejipiti dɩɩra, kãakɛ nɩ kɔɔ toona'. Dɩ na n cʋʋ dakha gɩrɛɛkɛ n cʋɛnɩ Kanãa dɩɩra, kãakɛ mɩ n jalna nɩna'. Na n kpa awɩ fɩla ga. 4 Na n kpa ɩ̃ jɔfʋsɔɔra, a na cʋɛna ɩ̃ so. Na n hɩnɛ gɩ bɔɔbɔɔ; gɩdonɩ mɛr dʋɔn Thãgba Kɔ̃tɩn anɩ Thãgba. 5 Na n cʋɛ ɩ̃ so, a na kpana ɩ̃ jɔfʋsɔɔra. Tibilikɛ n hɩnɛ gɩnɩ a na hana garɛ yire. Mɛr dʋɔn Thãgba Kɔ̃tɩn.6 Tibil bɩɛlakɛ nɛrɛra na n thar khɛrraakɛ wɩ donanɩ omɩna, a phɩnaa ga. Mɛr dʋɔn Thãgba Kɔ̃tɩn. 7 Fa n phɩna afɩ na', ga dor yicuruu fɩ pɛ afɩ thɩra. Afɩ nɩ gɩ. Fa n phɩnaa ga. 8 Fa n phɩnanakɛ afɩ thɩɩ khɛr ʋkha ga; ga dor yicuruu fɩ pɛ afɩ thɩra. 9 Fa n phɩna afɩ õkhɛrɩkɛ thɩ bɩɛl kɔna nɩnɩ, agɩbo ʋrɛ nɩ bɩɛl kɔna nɩnɩ, adorakɛ na ha kha cʋɔrɔaa ga. 10 Fa n phɩna afɩ bikuuni bi, agɩbo afɩ bikhɛrɩ bə', ga dor afɩbara fɩ pɛr yicuruu. 11 Fa n phɩna afɩ thɩɩ bikhɛra', gɩdonɩ thɩ bɩɛl kɔna nɩ dɩ afɩ õkhɛr gɩ. 12 Fa n phɩna afɩ thɩɩ õkhɛra', gɩdonɩ thɩrɛ a do far. 13 Fa n phɩna afɩ nɩɩ õkhɛra', gɩdonɩ afɩ nɩ gɩ. 14 Fa n phɩna afɩ thɩɩ õkuunɩ khɛr, a pɛr afɩ thɩɩ õkuuna yicuruə', gɩdonɩ afɩ nɩ bu gɩ. 15 Fa n phɩna afɩ bikuunɩ khɛra', gɩdonɩ afɩ bikuuni khɛr gɩ. 16 Fa n phɩna afɩ õkuunɩ khɛra', ga dor yicuruu fɩ pɛr afɩ õkuuna. 17 Fa n kperẽ nɩrɛ na bikhɩ̃ɛ a na phɩna, agɩbo nɩrɛ na ɔɔ bikuuni bikhɛr gɩ, dɩ ɔɔ bikhɛrɩ bikhɛr gɩ a na phɩna ga; gɩdonɩ wɩ wɔrɔnɛ kha jɔɔ ka; kpɔ̃kpɔrɔ̃ cʋʋrɛ gɩ. 18 Fa n gba afɩ khɛrɩ õkhɛr ɔbɔɔkɛ afɩ khɛr hananɩ yirə'. Fa pɛ warɛ gbugi.
19 Fa n phɩna khɛr bɔɔraakɛ a yɩnɩ ɔɔ sɩpor dɩɩ cʋgʋʋ dɩ bise jɔfʋ hʋɛra ga. 20 Fa n phɩna afɩ alãkha tibili khɛra'; gɩdonɩ na bisere jɔfʋ hʋɛra. 21 Fa n 'laa afɩ bɩsã bɩɛlakɛ wɩ thiə Mɔlɛkɩ thɩlɩ i dʋbɩ bonɩra ga. Fa n kpɔ̃kpɔrɔ̃ mɛr Thãgba Kɔ̃tɩnɩ iə'. Mɛr dʋɔn Thãgba Kɔ̃tɩn. 22 Fa n phɩna alãkha kuun, mɔ̃ wɩ n phɩnanɩ khɛra'. Kpɔ̃kpɔrɔ̃ cʋʋrɛ gɩ a kpal ka. 23 Fa n phɩna nʋmɩ wo nʋmɩ kpɩɩraka'. Fa n bise afɩbara jɔfʋ hʋɛra na ɔra'. Khɛr na n 'laa ɔɔbara yuurəkɛ nʋmɩna a jʋʋnʋa'; kpɔ̃kpɔrɔnɛ gɩ, a kɔ̃tɩ̃ ka.
24 Na n bise anɩbara jɔfʋ hʋɛra yuurəkɛ na ga cʋʋ pasɔɔkɛ bɩɛllaka'; gɩdonɩ gɛra ca wɩrɛ ma weelenɩ gɩrɛ anɩ ƴɛbʋrɔ n cʋʋ a bise awɩbara jɔfʋ hʋɛra. 25 Dɩ dɩɩ thɛthɛrakɛ biləni thʋ̃ bise jɔfʋ hʋɛra. Gɛr dɔ nɔɔ dɩ̃ ɩɩrna wɩ dɩɩ do awɩ puurə dɔ nɔɔ, dɩ dɩɩ bo ɔɔ toora a faa. 26 Na n cʋɛ ɩ̃ so, a na kpana ɩ̃ jɔfʋsɔɔra, nɛr dʋɔdara, na kpakpalaakɛ hanɩ anɩ thɩ̃thɩɩn. Na n cʋʋ ga thɩ̃ puusɔɔle bɩɛlaka'. 27 Ga thɩ̃ puu casɔɔlera tɩbɩlaakɛ kʋlɛ nɩnɩ ƴɩɛ a too dɩɩrara n cʋʋ, dɩ dɩɩ bise jɔfʋ hʋɛra. 28 Nɩ jɩɛ hɩɩn dɛ! Na n bisee wo a bo nɩ mɔna a bonɩ ca wɩrɛ kʋlɛ nɩnɩ ƴɩɛ a tooraa ga. 29 Ntɛɛkɛ na cʋɛnɩ ga thɩ̃ puu wo thɩ̃ puu casɔɔkɛ bɩɛl, wɩ hɛla ntɛɛle ɔɔ too thɩ̃thɩɩn a faa. 30 Na n hɩnɛ gɩrɛ mɩ n so narnɩ. Na n kpaan fil puu caarsɔraale bɩɛl 'lẽ'lenakɛ, kɛ n cʋɛnɩ dɩɩraale ɔbɔɔkɛ na danɩ le paa ga. Na n bise anɩbara jɔfʋ hʋɛra na ga cʋʋ pa casɔɔla'. Mɛr dʋɔn Thãgba Kɔ̃tɩn anɩ Thãgba." »