Jɔfʋ paaraakɛ dɩbara teananɩ bonɩ jir.
17
1 Thãgba Kɔ̃tɩn sor Mʋɩjɩra: 2 «Sɔ Aarɔna na ɔɔ bikũusɔɔra, na Ɩjɩrayɛl bɩsanana fɛw gɩrɛ mɛr Thãgba Kɔ̃tɩn sonɩ ayɩ: 3 "Ado Ɩjɩrayɛl bɩsaan kʋ nʋmɩ, jɛw agɩbo jɛ khuirə, a na gɩ, a banaa gɩ, a bʋ gɩ, 4 sɩ aa jalna mɛr Thãgba cãa wa lõfonʋɔra a jinə bonɩɛ mɛr Thãgba Kɔ̃tɩnna, le mɛr Thãgba Kɔ̃tɩnɩ kẽkẽ wa ƴɛbʋrɔa', ma lʋʋrɛ ntɛraale tɔmɩn dɔɔ gɩrɛraakɛ a deernɩ thɩ̃ yiree tɔmɩn. Wɩ hɛla ntɛɛle ɔɔ too thɩ̃thɩɩn a faa." 5 Gɩ har mɛ̃, gɩ do nɔɔ Ɩjɩrayɛl bɩsana na n jiir bonɩɛ na nʋma hʋɔnɔ baba ga, sɩ wa n pɔna bonɩ jidaara, le mɛr Thãgba cãa wa lõfonʋɔra, mɛr Thãgba Kɔ̃tɩnɩ ƴɛbʋrɔ, wa n jinə mɛr Thãgba Kɔ̃tɩnna 'likha bonɩɛ. 6 Bonɩ jidaar n gba ga tɔmɩn a deer mɛr Thãgba Kɔ̃tɩnɩ bonɩ ji para ƴũu, le mɛr Thãgba cãa wa lõfonʋɔra, sɩ a thii niin, kɛ na n hʋnanɩ mɛr Thãgba Kɔ̃tɩn daw. 7 Ɩjɩrayɛl bɩsana na bir na ji bonɩɛ bʋke thãgbasɔɔra, kɛ wɩ n kɔɔ jironɩ kpɔ̃kpɔrɔ̃ bonɩɛsɔ 'lo bã. Khorr jɔfʋ ga do war, wɛr na awɩ məlsɔ. 8 Sɔ war ayɛ: "Ado Ɩjɩrayɛl bɩsaan agɩbo kpakpal ʋkha, kɛ hanɩ awɩ thɩ̃thɩɩn gɩ, a ƴaal a ji bonɩ thiinə, agɩbo bonɩ dɩkha gɩ, 9 sɩ aa pɔna mɛr Thãgba cãa wa lõfonʋɔra a jinə bonɩɛ mɛr Thãgba Kɔ̃tɩnna ga, wɩ hɛla ntɛɛle ɔɔ toora a faa."Jɔfʋ tɔmɩn thɩmɩɩra
10 Ado Ɩjɩrayɛl bɩsaan, agɩbo kpakpalɩkɛ hanɩ awɩ thɩ̃thɩɩn, kho tɔmɩn wo tɔmɩn, ma faa ntɛɛla', ma hɛlʋʋlɛ ɔɔ too thɩ̃thɩɩn a na faa; 11 gɩdonɩ tɔmɩna thɩ̃ tinəne fɛʋʋ yi ha. Bonɩ jirə dɩbara mɩ hanɩ tɔmɩn gɩ do anɩ yi phʋɔlda; gɩdonɩ tɔmɩn dʋɔn gɩrɛ n phʋɔlɛnɩ yire. 12 Gɛr gɩ dɩ̃ so nɛr Ɩjɩrayɛl bɩsanana ayɩ: "Nɛrɛ a gbana kpakpalɩkɛ hanɩ anɩ thɩ̃thɩɩn, tɩɩ bɩɛlakɛ na n kho tɔmã'." 13 A Ɩjɩrayɛl bɩsaan gɩ, a kpakpalaakɛ hanɩ anɩ thɩ̃thɩɩn gɩ a jal hɔ̃ kpaarʋ, a 'lɛ nʋmɩ, agɩbo 'lomin khonanɛ gɩ, a kʋ, ntɛ n kurəə ulebire, a deere tɔmɩn a thero thɩn; 14 gɩdonɩ thɩ̃ tinəne fɛʋʋkɛ hananɩ yire, thɩ̃doo tɔmɩnana ɔɔ yi ha. Gɛr gɩ dɩ̃ so nɛr Ɩjɩrayɛl bɩsanana ayɩ: "Na n kho thɩ̃ tinə bɩɛlakɛɛ tɔmã', gɩdonɩ thɩ̃ tinəne fɛʋʋ yi, thɩ̃doo tɔmɩnana gɩ ha. A ntɛ kho tɔmɩn wɩ hɛlaa a faa."