JƆFƲ PHURI BILO
So hɛl wi kɔ̃tɩ̃ɩ.
16
1 Ɔbɔɔkɛ Aarɔ̃ɔ bikona yeɲɔɔkɛ kɔɔ lonanɩ Thãgba Kɔ̃tɩnɩ ƴɛbʋrɔ khiirni dɩɩ karɔ pɩ, Thãgba Kɔ̃tɩn mɩɩnanɛ Mʋɩjɩ. 2 Thãgba Kɔ̃tɩn sʋʋraarɛ ayɩ: «Sɔ afɩ õkuun Aarɔna a na n ha na lõ sãasɩ pa phuu bɩnɔ bɔɔ fɛw, du vaar kẽkẽ bilo so hɛl pa ƴɛbʋrɔ, kɛ dɔnɩ ʋlfɛ khɛɛsʋ thirə'. A mɛ̃ ga, a na khire, gɩdonɩ mɩ n nɩnanɛ ɩ̃ɩbara le dɩkhãa bɔɔ ndɔlɔ̃paara so hɛl paara ƴũu.3 Yɛkɛ mɔ̃ Aarɔ̃ na n lonɩ sãasɩ pa phuurə. A hanana nake ɓolʋ, gɩ do so hɛl bonɩdaa, na banakɩɩr gɩ do bonɩ thiinədaa. 4 A tɔ bonɩ ji gbɔɔlɔ̃ɔkɛ wɩ lenanɩ lɛ̃, a saana khursisɔɔkɛ wɩ lenanɩ lɛ̃, a khɩma pel khɩmɩdaa a parana yʋ pardaakɛ wɩ lenanɩ lɛ̃; kɛ dɔnɩ bonɩ ji kẽkena, ɔbɔɔkɛ a hʋnɩ ɲʋɔn pɩ. 5 Ɩjɩrayɛl bɩsana n hanaa bʋkena yeɲɔ gɩ do so hɛl bonɩdaa, na banake bɩɛl gɩ do bonɩ thiinədaa. 6 Aarɔ̃ n kɔɔ jenə ɔɔ so hɛl nake ɓola bonɩɛ, a phʋɔlɛna ɔɔ thɛthɛ, na ɔɔ cɔdara ɓo. 7 Agɩpɩ a gba bʋkena yeɲɔɔle a ɛna mɛr Thãgba Kɔ̃tɩnɩ ƴɛbʋrɔ le mɛr Thãgba cãa wa lõfonʋɔra. 8 A lɛ lɩɩ bʋkena yeɲɔraalera a te ʋrɛ dɔnɩ mɛr Thãgba Kɔ̃tɩnɩ bonɩda kpɩɩ, na ʋrɛ teananɩ a do Ajajɛlɩda 9 Bʋke ʋrɛ lɩɩ na tini da do mɛr Thãgba Kɔ̃tɩnɩda, ɔr Aarɔ̃ na jinə so hɛl bonɩɛ. 10 Sɩ bʋke ʋrɛ lɩɩ na tini da do Ajajɛlɩda, mɛr Thãgba Kɔ̃tɩnɩ ƴɛbʋrɔ na thɩɩnʋ, a do sopuu hɛldaa kɛ wa weenɩ na faa bə̃ kparara a do Ajajɛlɩda.
11 Aarɔ̃ n kɔ ɔɔ so hɛl nake ɓola, a jenə bonɩɛ, a phʋɔlɛna ɔɔ thɛthɛ, na ɔɔ cɔdara ɓo. 12 A gba latɩkolo iidaa a te bonɩ ji dɔkhãbeekɛ hanɩ mɛr Thãgba Kɔ̃tɩnɩ ƴɛbʋrɔ a hie, a kpɛna latɩkolo ɓurore ɲɔ̃kor he yeɲɔ phi, a gbɛba fɛw a kpãasɛnɛna du vaar kɩ̃kɩɩn, a lona sãasɩ pa phuurə. 13 A gba latɩkolo ɓuroreele a deere dɔkhãberara le mɛr Thãgba Kɔ̃tɩnɩ ƴɛbʋrɔ, latɩkolo ɓuro isiirile n bananɩ n thi so hɛl paarɩkɛ hanɩ nɔ bɩɛl ʋlfɛ khɛɛsʋʋra ƴũu, gɩ do nɔɔ a na khə'. 14 Agɩpɩ a gba nake tɔmɩna a ɓɛna ɲɔ̃bire a jɛba so hɛl pa ƴɩɛra, ka eenenɩ wi phã paar, a birə ɓɛna ɲɔ̃birera wo a jɛba ɲɛ̃be makoɲɔ so hɛl pa ƴɩɛra. 15 Agɩpɩ a kɔ Ɩjɩrayɛl bɩsanaa so hɛl bʋke a gba tɔmɩn a kpãasɛnɛna du vaar kɩ̃kɩɩn, a lonana sãasɩ pa phuurə. Mɔ̃ a cʋʋnanɩ nake tɔmɩn, a cʋɛna bʋke tɔmɩnɩle ɔmɛ̃. A jɛba so hɛl paara ƴũu, na so hɛl pa ƴɩɛra.
16 Thale a na cʋʋ gɩ do a phʋɔlɛ sãasɩ pa phuu Ɩjɩrayɛl bɩsanaa thɩ̃ biseraakɛ cʋgɛɛnɩ dɩ bise jɔfʋ hʋɛra dɩɩ do awɩ dɩpasɔ, na awɩ sopuusɔ dɔ nɔɔ. A cʋɛ ɔmɛ̃ na mɛr Thãgba cãa waa; gɩdonɩ awɩ pa a ha, wɛr tɩɩ bisesɔɔ thɩ̃thɩɩn. 17 A fʋna bɔɔkɛ Aarɔ̃ na lonɩ sãasɩ pa phuurə a na n phʋɔlʋ, gɩ dana bɔɔkɛ a na thenɩ, tibil na n hale mɛr Thãgba cãa wa bɩnɔa'. Aarɔ̃ na phʋɔlɛ ɔɔbara, na ɔɔ cɔdara, a phʋɔlna Ɩjɩrayɛl bɩsana fɛw. 18 Agɩpɩ a thɛ a tɔ pɔ bonɩ ji paaraakɛ hanɩ le mɛr Thãgba Kɔ̃tɩnɩ ƴɛbʋrɔ a phʋɔlɛɛ. A gba nake tɔmɩna, na banake tɔmɩna a pɩɛr bonɩ ji pa ʋmana gɛlɔ gɛlɔ a fenə. 19 A ɓɛ tɔmɩna na ɲɔ̃bire a jɛba bonɩ ji paarara ɲɛ̃be makoɲɔ, a phʋɔlɛɛ gɩ do Ɩjɩrayɛl bɩsanaa dɩpasɔ dɔ kɩrʋ, a pɩɛ mɛr Thãgba ƴɔɔ.
20 Aarɔ̃ n kɔɔ phʋɔlɛ sãasɩ pa phuurə na mɛr Thãgba cãa waa, na bonɩ ji paar a pɛ ɓo, sa kpa bʋke ʋrɛ sɛnɩ dɩphã a pɔna. 21 A dɛɛnɛ ɔɔ ɲɛ̃ yeɲɔ fɛw bʋkɩɩrɩlee yʋɔ sa cana Ɩjɩrayɛl bɩsanaa dɩpasɔ fɛw, na awɩ sopuusɔ fɛw, na awɩ nũ nʋʋrsɔ fɛw a pɩɛr bʋkɩɩrɩlee yʋɔ; agɩpɩ a pɩɛr tibil bɩɛlɩkɛ wɩ phiirnɩ ga irə a weguu a jalna bə̃ kparara a faa. 22 Dɩ bʋkɩɩrɩle na gbaar awɩ sopuusɔɔra ɓibi ɔɔ yʋɔ, a na jalna bə̃ kparara ɔbɔɔkɛ wa weguunɩ na faa bə̃ kparara.
23 Agɩpɩ Aarɔ̃ n birə lona mɛr Thãgba cãa wa bɩnɔ a fʋrɛ le lɛ̃ kẽkenasɔɔkɛra a tonɩ ɔbɔɔkɛ a n kɔɔ lonɩ sãasɩ pa phuurə. 24 Agɩpɩ a hɔ ɲʋɔn sãasɩ paar sa tɔ ɔɔ bonɩ ji kẽkẽ kpɩɩsɔ a thɛ a je ɔɔ bonɩ thiinə, na Ɩjɩrayɛl bɩsanaa bonɩ thiinə; a phʋɔlɛ ɔɔ thɛthɛ, a phʋɔlɛna Ɩjɩrayɛl bɩsana. 25 Agɩpɩ a tire so hɛl bonɩ nʋmɩnaa nĩ a thiə bonɩ ji paara ƴũu.
26 Sɩ ʋrɛɛkɛ na weanɩ Ajajɛlɩ bʋke, ntɛ n cɔcɔɔnɛ ɔɔ kẽkẽsɔ, a hɔna ɲʋɔn ɓo sa lona jɛw. 27 Sɩ so hɛl nakɩɩr, na so hɛl bʋkɩɩrɩkɛ wɩ gbanɩ agɩ tɔmɩ̃sɔ a lona sãasɩ pa phuurə a hɛlna sor, wɩ gba agɩ nʋ̃ jɛw, a thɛna khuirə a thiə: lʋʋ, na nʋʋn, na pɩba ɓibi. 28 Ʋrɛɛkɛ na thiə gɩnɩ, a cɔcɔɔnɛ ɔɔ kẽkẽsɔ, a hɔna ɲʋɔn, agɩpɩ dɩphã ntɛ n lõ jɛw.
29 Jɔfʋ gɩɩkɛ pɩɛrnɩ khorr nɛrɛra: yɩɛrɩ sɩpora makoɲɔɔ wire yʋɔrɩ wirə, nɩ wurə anɩbara na nɔ lir, nɛr dɩdara na kpakpalaakɛ hanɩ anɩ thɩ̃thɩɩn na n do thɔ̃ bɩɛlaka', 30 gɩdonɩ ga wiile wa phʋɔl nɛr, a na hɛl nar anɩ so. Dɩ anɩ sopuu fɛw na hɛl narɛ mɛr Thãgba Kɔ̃tɩnɩ ƴɛbʋrɔ. 31 Hɩɩr wire ga do nar biləni, nɩ wur anɩbara na nɔ lir. Jɔfʋ gɩ khorr.
32 Phʋɔlɛɛlera, bonɩ jidaarɩkɛ wa pɛrnɩ niin yʋɔ a na pɩɛraa da dee ɔɔ thɩ bonɩ jidaar thɔmana, ɔr na cʋɛ gɩ. A a na cʋʋ, a tɔ bonɩ ji kẽkenaakɛ dɔnɩ lɛ̃daa. 33 A phʋɔlɛ sãasɩ pa phuu, na mɛr Thãgbaa cãa wa, na bonɩ ji paar, a phʋɔlɛna bonɩ jidara na Ɩjɩrayɛl bɩsana fɛw. 34 Jɔfʋ gɩɩkɛ pɩɛrnɩ khorr nɛrɛra. Yɩɛr wo yɩɛra fɛw, dɔ Ɩjɩrayɛl bɩsana ɓibi n 'lɛ phʋɔlɛ awɩ sopuusɔɔra fɛw.» Dɩ Aarɔ̃ cʋʋrɛ gɩrɛra Thãgba Kɔ̃tɩn kɔɔ sonɩ Mʋɩjɩra.