Jɔfʋ kuunaakɛ hananɩ khɛr khoo.
15
1 Dɩ Thãgba Kɔ̃tɩn sor Mʋɩjɩ na Aarɔna: 2 «Nɩ sɔ Ɩjɩrayɛl bɩsanana ayɛ: "A khɛr khoo fʋ kuun, kuun dɔɔle bisere jɔfʋ hʋɛra, dɩɩ do khɛr khoolera dɔ nɔɔ. 3 Khɛr khoolera cʋɛ ntɛ dɩ bise jɔfʋ hʋɛra. A gɩ n faarɛ ntɛra yo, a ga n faa ntɛra gaa yo, sɩ ntɛ bisere jɔfʋ hʋɛra. 4 Phɩ̃ pa dɔɔraakɛ ʋrɛ hananɩ khɛr khoora na phɩnɩ, na too pa dɔɔraakɛ a na toonɩ gɩ bisere jɔfʋ hʋɛra. 5 Tibilikɛ na thaanɩ ntɛɛ phɩ̃ para, a cɔcɔɔnɛ ɔɔ kẽkẽsɔ, a hɔna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 6 Ntɛɛkɛ na tɔɔnɩ too paaraakɛ ʋrɛ hananɩ khɛr khoora kɔɔ toonɩ na cɔcɔɔrɛ ɔɔ kẽkẽsɔ, a na hʋna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 7 Ntɛɛkɛ na thaanɩ ʋrɛra hananɩ khɛr khoora, a cɔcɔɔnɛ ɔɔ kẽkẽsɔ, a hɔna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 8 Ado ʋrɛ hananɩ khɛr khoora cɩr ɲɔ̃thɩɩn a pɛ tibiləəkɛ phonɩ, ntɛ n cɔcɔɔnɛ ɔɔ kẽkẽsɔ, a hɔna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 9 Thɩ̃ jʋ̃ʋda too paar wo, too paaraakɛ ʋrɛ hananɩ khɛr khoora toonɩ a kpaar, gɩ bisere jɔfʋ hʋɛra. 10 Tibilikɛ na thaanɩ thɩ̃ɛ wo, thɩɛnaakɛ ʋrɛ hananɩ khɛr khoora na tooronɩ, ntɛ bisere jɔfʋ hʋɛra gɩ dana dʋɔrɔ. Dɩ ntɛɛkɛ na gbaanɩ thɩ̃ doora, a na cɔcɔɔrɛ ɔɔ kẽkẽsɔ, a na hʋna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 11 Dɩ a ʋrɛ hananɩ khɛr khoora na hul ɲɛ̃ɛa', sa thar tibilə, ntɛ n cɔcɔɔnɛ ɔɔ kẽkẽsɔ, a hɔna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 12 Ado ʋrɛ hananɩ khɛr khoora thar thɔ̃ do thɩɛnaakɛ dɔnɩ jadaa, wɩ cʋɔrɛ faa. Sɩ ado thɔ̃ do thɩ̃ɛɛkɛ dɔnɩ thɩrdaa gɩ, wɩ cɔcɔɔnɛ na ɲʋɔn.13 Ɔbɔɔkɛ ʋrɛ hananɩ khɛr khooraa kho pɩnɩ, a pɩɛrɛ wire makoɲɔ sa phʋɔlɛ. Agɩpɩ a cɔcɔɔnɛ ɔɔ kẽkẽsɔ, a hɔna ɲɔ bunəne dɩ a na phure. 14 Wire makõther wirera, ntɛ n hanana pubə yeɲɔ agɩbo kʋlãpubə yeɲɔ a jalana mɛr Thãgba Kɔ̃tɩnɩ ƴɛbʋrɔ, le mɛr Thãgba cãa wa lõfonʋɔra a hana bonɩ jidaar. 15 Bonɩ jidaar n gba bɩɛl a do so hɛl bonɩdaa, sɩ bɩɛl n do bonɩ thiinədaa. Bonɩ jidaar n phʋɔlɛ ntɛ le mɛr Thãgba Kɔ̃tɩnɩ ƴɛbʋrɔ thɩ̃dooraakɛra thɩɛraanɩ.
16 Ɔbɔɔkɛ sɩnã thenɩ tibilə, ntɛ n hɔ ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 17 A gɩ pɛ kɩ̃kɩɩna, agɩbo lʋʋra, wɩ cɔcɔɔnɛ gɩ na ɲʋɔn. Sɩ gɩ bisere jɔfʋ hʋɛra gɩ dana dʋɔrɔ. 18 Ado kuun na khɛr phɩ̃ kha, wɩ hɔ ɲʋɔn. Sɩ wɩ bisere jɔfʋ hʋɛra gɩ dana dʋɔrɔ.
Jɔfʋ khɛraakɛ yɛnɩ ɔɔ sɩpor.
19 A tɔmɩn na faa khɛra dɩɩ do ɔɔ sɩpora a ha, a bisere jɔfʋ hʋɛra; a tɔɔ wire makoɲɔ a na n tharɔa'. Ntɛɛkɛ na thaaraanɩ ntɛ bisere jɔfʋ hʋɛra dakha gɩ dana dʋɔrɔ. 20 Phɩ̃ pa dɔɔraakɛ khɛrɩle na phɩnɩ, na thɩ̃ɛ wo thɩɛnaakɛ a na toonɩ ɔɔ sɩpo yɩ bɔɔle, gɩ bisere jɔfʋ hʋɛra. 21 Ntɛɛkɛ na thaanɩ ɔɔ phɩ̃ para, ntɛ n cɔcɔɔnɛ ɔɔ kẽkẽsɔ, a hɔna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 22 Ntɛɛkɛ na thaanɩ thɩ̃ dooraakɛ khɛrɩle na toonɩ ntɛ n cɔcɔɔnɛ ɔɔ kẽkẽsɔ, a hɔna ɲʋɔn. Sɩ ntɛ bisere jɔfʋ hʋɛra gɩ dana dʋɔrɔ. 23 Ado dɩkha hale phɩ̃ paara, agɩbo too paaraakɛ a toonɩ, ntɛɛkɛ na thaanɩ thɩ̃ dooraale, ntɛ bisere jɔfʋ hʋɛra gɩ dana dʋɔrɔ. 24 A kuun phɩna khɛr sɩ dɩɩ do ɔɔ sɩpo yɩ wi gɩ dɩ tɔmɩn maa, a bisere jɔfʋ hʋɛra dakha gɩ dana wire makoɲɔ. Dɩ phɩ̃ pa dɔɔraakɛ kuunile na phɩnɩ gɩ bisere jɔfʋ hʋɛra.
25 Khɛrɩkɛ n yɛnɩ ɔɔ sɩpo dɩ tɔmɩn n faaraa a cʋʋna wi jɔjʋɔ, dɩɩ ka wi nʋɔɔkɛ ɔɔ sɩpor n kɔɔ cʋʋnɩ, agɩbo tɔmɩn n faaraa sɩ ga do ɔɔ sɩpo a ya', a bisere jɔfʋ hʋɛra, mɔna a n kɔɔ yɩnɩ ɔɔ sɩpo dɩɩ ha, gɩ dana bɔɔ yemɔ̃ɔkɛ ga gbanɩ. 26 Phɩ̃ paar wo phɩ̃ paarɩkɛ a na phɩnɔnɩ agɩbo too paar wo too paaraakɛ a na toonɩ gɩ bisere jɔfʋ hʋɛra mɔna a n kɔɔ yɩnɩ ɔɔ sɩpo dɩɩ ha. 27 Ntɛɛkɛ na thãa garnɩ ntɛ bisere jɔfʋ hʋɛra dakha. Ntɛ n cɔcɔɔnɛ ɔɔ kẽkẽsɔ, a hɔna ɲʋɔn, sɩ ntɛ bisere jɔfʋ hʋɛra gɩ dana dʋɔrɔ. 28 Ɔbɔɔkɛ ɔɔ tɔmɩn faara pɩnɩ, a na there wire makoɲɔ, gɩ ka ɓo sɩ gɩ do a phure. 29 Wire makõther wirera, a na hananɛ pubə yeɲɔ, agɩbo kʋlã pubə yeɲɔ a na jalna bonɩ jidaara, le mɛr Thãgba cãa wa lõfonʋɔra. 30 Bonɩ jidaar n gba bɩɛl a do so hɛl bonɩdaa, bɩɛl n do bonɩ thiinədaa. Dɩ bonɩ jidaar na phʋɔlʋʋlɛ le mɛr Thãgba Kɔ̃tɩnɩ ƴɛbʋrɔ, gɩ do tɔmɩnɩlera faaraanɩ a bisee jɔfʋ hʋɛra dɔ nɔɔ."
31 Thale na cʋʋ Ɩjɩrayɛl bɩsana dɩ wa hʋnɔna gɩrɛ na bisene wɩnɩ jɔfʋ hʋɛra; dɩ mɛ̃ wa mana mɛr Thãgbaa kẽkẽ waakɛ hanɩ awɩ thɩ̃thɩɩn awɩ bise, wɩ ba khiirə'.»