BONƖ JI SƐBƐ 14

Jɔfʋ tomɩr lo kho phʋɔldaara.

1 Thãgba Kɔ̃tɩn sor Mʋɩjɩra ayɩ: 2 «Yɛ gɩrɛ na dʋɔnɩ jɔfʋ tomɩr lo khodaara, dawiikɛ a na n phʋɔlnɩ. Wɩ jalanaa bonɩ jidaarɩ pa. 3 Bonɩ jidaar n thɛ jɛ khuirə a hɩnɛɛ. Ado a yɩɛ dɩɩ do tomɩr lo khoora kpɛɛraarɛ ger, 4 Bonɩ jidaar n sɔ wɩ pɔna ntɛɛ phʋɔldara, 'lomĩ ye yeɲɔ, kɛ na dɔnɩ 'lomĩ sãasɩnanɛa', na sɛɛdɩrɩ thɩr kuru, na lɛn kẽkẽ wi sɩɛ, na ɩjɔpɩ faa. 5 Bonɩ jidaar n pɩɛr wɩ kʋ 'lomĩ bɩɛl ja bʋlaala, kɛ hananɩ ɲɔ bunəne. 6 Agɩpɩ a gba 'lomĩ yireele, na sɛɛdɩrɩ thɩr kuruule, na lɛn kẽkẽ wi sɩɛɛle, na ɩjɔpɩ faale a mʋa fɛw 'lomĩ olee tɔmɩnaakɛ wɩ kʋnɩ a pɛr ɲɔ bunənenana, 7 sa jɛba ɲɛ̃be makoɲɔ ʋrɛraakɛ n phʋɔlɛnɩ tomɩr lo khoora. Agɩpɩ a sɔ ntɛra a yɛ a phure, sa dɔna 'lomĩ yireele a ubi a jal hʋɔnɔ.

8 Ntɛɛkɛra wɩ n phʋɔlnɩ n cɔcɔɔnɛ ɔɔ kẽkẽsɔ, a belana suune fɛw, a hɔna ɲʋɔn dɩ a na phure. Agɩpɩ ntɛ punone a lõ jɛw dɩphã, sɩ ntɛ n kɔɔ cɔ phiilo wire makoɲɔ ɓo, sa lona ɔɔ cɔ. 9 Wire makoɲɔ wirera a bela ɔɔ suun fɛw tomɩra: yʋsuune, na nɔkhuusi, na yisui, a bela ɔɔ suunakɛ fɛw, a cɔcɔɔna ɔɔ kẽkẽsɔ, a hɔna ɲʋɔn, dɩ a na phure. 10 Wire makõther wirera, a fɔ bana kebi ɓola yeɲɔ, kɛ na hananɩ taana' na yɛ bɩɛl bana phɩɩrbir bɩɛl, kɛ na hananɩ taana', a kpɛna mĩ bʋɔ kilə yʋɔr phe bire a gbʋrana niin gɩ do thɩ̃ bi bonɩdaa, a gbana niin litiri kuruu. 11 Dɩ bonɩ jidaarɩkɛ na phʋɔlɛnɩ ntɛra n kpaa pɔna mɛr Thãgba Kɔ̃tɩnɩ ƴɛbʋrɔ na thɩ̃ɛsɔɔlera fɛw a na ha mɩnɩ, mɛr Thãgba cãa wa lõfonʋɔra. 12 Bonɩ jidaar n gba banakebir bɩɛl, kɛ a na jinəni so gbɛbɩ bonɩɛ, na niin litiri kuruule a jɛna mɛr Thãgba Kɔ̃tɩnɩ ƴɔɔ. 13 Agɩpɩ a kɔ bana kebirə ka wɩ n kʋʋrnɩ so hɛl bonɩ nʋma na bonɩ thiinə nʋma le sãasɩ paar, gɩdonɩ bonɩ jidaar hɩna so gbɛbɩ bonɩ ji nʋʋn, na so hɛl bonɩ ji nʋʋn. Thɩ̃ khaa gɩ na sobɔr. 14 Bonɩ jidaar n gba so gbɛbɩ bonɩ ji tɔmɩna a ɓɛ pɩɛr ntɛraakɛra a n phʋɔlnɩɩ ɲɔ̃bɔ nũ fara, na ɔɔ ɲɔ̃bɔ ɲɔ̃bi kpora, na ɔɔ ɲɔ̃bɔ nɔbi kpora. 15 Agɩpɩ bonɩ jidaar n gba niin litiri kuruulera a ƴema ɔɔ thɛthɛɛ ɲɔ̃ bɩlã ɲɔ̃kora. 16 Agɩpɩ a ɓɛna ɲɔ̃bɔ ɲɔ̃bire niinikɛra hanɩ ɔɔ ɲɔ̃bɩlã ɲɔ̃kora a jɛba ɲẽbe makoɲɔ mɛr Thãgba Kɔ̃tɩnɩ ƴɛbʋrɔ. 17 Agɩpɩ bonɩ jidaar n gba niinə sɛnɩ ɔɔ ɲɔ̃kɔɔ a pɩɛr ntɛraakɛ a n phʋɔlnɩɩ ɲɔ̃bɔ nũ fara, na ɔɔ ɲɔ̃bɔ ɲɔ̃bi kpora, na ɔɔ ɲɔ̃bɔ nɔbi kpora, kãakɛra a kɔɔ pɛrnɩ so gbɛbɩ bonɩ tɔmɩn. 18 Agɩpɩ a gba nĩ gɩrɛ sɩɛraanɩ ɲɔ̃kɔɔ, a pɩɛr ntɛraakɛra a n phʋɔlnɩɩ yʋɔ, a phʋɔlɛ ntɛ a hɛlaa ɔɔ bise jɔfʋ hʋɛra mɛr Thãgba Kɔ̃tɩnɩ ƴɛbʋrɔ. 19 Agɩpɩ bonɩ jidaar n je so hɛl bonɩɛ, a phʋɔlɛ ʋrɛɛkɛra n phʋɔlɛnɩ ɔɔ jiin. Agɩpɩ a kɔ bonɩ thiinə nʋmɩ. 20 Bonɩ jidaar n gbɛba bonɩ thiinənə na thɩ̃ bi bonɩɛ a je bonɩ ji paara ƴũu, sa birə phʋɔlɛ ntɛ, dɩ a na phure.

21 Sɩ ado bɔdaar ha ntɛ, aa hana punone dɩɩ dã ga, a hanana banakebir bɩɛl dɩbara gɩ do so gbɛbɩ bonɩdaa wɩ jɛna mɛr Thãgba Kɔ̃tɩnɩ ƴɔɔ wɩ phʋɔlnaa. A hanana dakha mɩ̃ phuu kilə yẽther, kɛ wa gbʋrnanɩ niin gɩ do thɩ̃ bi bonɩdaa, na niin litiri kuru. 22 A hanana dakha pubə yeɲɔ, agɩbo kʋlã pubi yeɲɔ, mɔ̃ ntɛɛ puno hanɩ; bɩɛl n do so hɛl bonɩdaa, bɩɛl n do bonɩ thiinədaa. 23 Wire makõther wirera, ntɛ n jalana thɩ̃ɛsɔɔlera fɛw wa phʋɔlnaanɩ bonɩ jidaarɩ pa mɛr Thãgba Kɔ̃tɩn ƴɛbʋrɔ, le mɛr Thãgba cãa wa lõfonʋɔra. 24 Bonɩ jidaar n gba so gbɛbɩ bonɩ bana kebirilera, na niin litiri kuruule a jɛna mɛr Thãgba Kɔ̃tɩnɩ ƴɛbʋrɔ. 25 Agɩpɩ a kɔ so gbɛbɩ bonɩ banakebirə a gba bonɩ tɔmɩna a ɓɛ pɩɛr ntɛraakɛra a n phʋɔlnɩɩ ɲɔ̃bɔ nũ fara, na ɔɔ ɲɔ̃bɔ ɲɔ̃bi kpora, na ɔɔ ɲɔ̃bɔ nɔbi kpora. 26 Agɩpɩ bonɩ jidaar n ƴema niinə ɔɔ thɛthɛɛ ɲɔ̃bɩlã ɲɔ̃kora. 27 Agɩpɩ a ɓɛna ɲɔ̃bɔ ɲɔ̃bire niinikɛra hanɩ ɔɔ ɲɔ̃bɩlã ɲɔ̃kora a jɛba ɲẽbe makoɲɔ mɛr Thãgba Kɔ̃tɩnɩ ƴɔɔ. 28 Agɩpɩ bonɩ jidaar n ɓɛ niinə hanɩ ɔɔ ɲɔ̃kɔɔ a pɩɛr ntɛrara a n phʋɔlnɩɩ ɲɔ̃bɔ nũ fara, na ɔɔ ɲɔ̃bɔ ɲɔ̃bi kpora, na ɔɔ ɲɔ̃bɔ nɔbi kpora dapaakɛra a kɔɔ pɩɛraanɩ so gbɛbɩ bonɩ tɔmɩn. 29 Agɩpɩ a gba nĩ gɩrɛ sɩɛraanɩ ɲɔ̃kɔɔ a pɩɛr ntɛraakɛra a n phʋɔlnɩɩ yʋɔ, a hɛlaa ɔɔ bise jɔfʋ hʋɛra mɛr Thãgba Kɔ̃tɩnɩ ƴɛbʋrɔ. 30 Agɩpɩ bonɩ jidaar n jenə bonɩɛ pubəəle agɩbo kʋlã pubəəle bɩɛl, kɛ dɔnɩ gɩrɛ ntɛ 'lɛnɩ mɔ̃ ɔɔ puno hanɩ, 31 bɩɛl n do so hɛl bonɩdaa, bɩɛl n do bonɩ thiinədaa. A gbɛba gɩ na thɩ̃ bi bonɩɛ a je a pɛ ntɛraakɛra a n phʋɔlnɩ, a hɛlaa ɔɔ bise jɔfʋ hʋɛra mɛr Thãgba Kɔ̃tɩnɩ ƴɛbʋrɔ.» 32 Gɛr dʋɔn jɔfʋʋkɛ wɩ pɛrnɩ ʋrɛraakɛ wɩ n phʋɔlnɩ tomɩr lo khoora, sɩ dɩ aa hana thɩ̃ɛ dɩɩ dã mɔ̃ teananɩ ɔɔ phʋɔldara ga.

Jɔfʋ thurõphureraakɛ n hanɩ cɔ gʋʋra.

33 Thãgba Kɔ̃tɩn sor Mʋɩjɩ na Aarɔna ayɩ: 34 «Ɔbɔɔkɛ na danɩ Kanãa dɩɩra, kɛ ma ha nɩnɩ dɩ na hɩ̃, a mɩ pɛ thurõphure cɔ gʋʋra dɩɩraakɛ na hanɩ, 35 ʋrɛ hɩnanɩ cʋɔr n jala sɔ bonɩ jidaara ayɛ: Mɩ yɩrɛ dɩkha ɩ̃ cɔ, gʋʋra dɩɩ ho thurõphure. 36 Bonɩ jidaar na n kɔɔ lõ a jʋʋr thurõphurera hɩɩn ɓo sa 'laa hʋɛ wɩ deer thɩ̃a'; gɩ do nɔɔ gɩrɛ fɛʋʋkɛ hanɩ cɔ bɩnɔ na n bise jɔfʋ hʋɛra ga. Thɩ̃ɛ na deere na pɩ ɓo sɩ bonɩ jidaar n lõ a hɩɩn cʋɔrra.

37 A hɩnɛ thurõphurera gʋʋrara. Ado a yɩɛ dɩɩ do thurõphurera pɛr gʋʋrara kaar dɩɩ ho faa, agɩbo dɩɩ sɩɛr khama khama dapa, sa gbuu a lõ gʋʋra, 38 bonɩ jidaar n thɛ lõfonʋɔra sa khaanɛ lõo gɩ cʋʋ wire makoɲɔ. 39 Wire makoɲɔ wirera a kɛra birə hɩnɛ. Ado a yɩ thurõphurera dɩɩ ƴɛr cɔ gʋʋrara, 40 bonɩ jidaar n 'laanɛ hʋɛ wɩ tiir bokana, ka thurõphurera hanɩ wɩ dʋʋrna dɩ khuirə pa bise paar jɔfʋ hʋɛra wɩ faa. 41 A pɩɛr wɩ khokhoro cɔ bɩ̃ gʋʋ fɛw wɩ jalna thɩnɩle wɩ khokhoronɩ dɩ khuirə wɩ deer pa bise paar jɔfʋ hʋɛra, wɩ faa. 42 Agɩpɩ wɩ gba boka kpɩɩsɔ a tɔ boka tɩnaalee kara, a gba bʋ̃ɔ kpɩɩ a bʋlana cʋɔrra.

43 Ado wɩ tiir bokana, a khokhorona cʋɔr sa bʋl sɩ dɩ thurõphurera, borakɛ sa bir ɩɩr wo, 44 bonɩ jidaar n kɛra jala hɩnɛ wo. Ado a yɩ thurõphurera dɩɩ ƴɛr cɔ gʋʋrara ger, thurõphu puu gɩ, kɛ n manɩ, a ha cʋɔra. Cʋɔrra bisere jɔfʋ hʋɛra. 45 Wɩ wɩɛrɛ cʋɔrra: bokana, na thɩra, na bʋɔnɩkɛ wɩ bʋlnanɩ cʋɔrra, a khɩa fɛw a thɛna dɩ khuirə a faa pa bise paar jɔfʋ hʋɛra. 46 Ntɛɛkɛ na lonanɩ cʋɔraale khaan bɔɔraalera, a bisere jɔfʋ hʋɛra, gɩ dana dʋɔrɔ. 47 Ntɛɛkɛ na phɩnanɩ cʋɔrɔɔle agɩbo ntɛɛkɛ na khɔnɩ thɩ̃ɛ le a cɔcɔɔnɛ ɔɔ kẽkẽsɔ.

48 Sɩ ado bonɩ jidarra kɛr a jal hɩɩn a yɩɛ dɩɩ do wɩ bʋlnɩ cʋɔrra pɩ, thurõphurera na bir ɩɩr bã, a sɔ cʋɔrra phure, gɩdonɩ thurõphurera pɩrɛ. 49 A gba 'lominə yeɲɔ, na sɛɛdɩrɩ thɩr kuru, na lɛn kẽkẽ wi sɩɛ, na ɩjɔpɩ faa, wɩ phʋɔlna cʋɔrra. 50 A kɔ 'lomĩ bɩɛl ja bʋlaala, kɛ hananɩ ɲɔ bunəne. 51 Agɩpɩ a gba sɛɛdɩrɩ thɩr kuruulera, na ɩjɔpɩ faara, na lɛn kẽkẽ wi sɩɛra, a gbana 'lomĩ yirera fɛw a mʋa 'lomĩ olee tɔmɩnaakɛ wɩ kʋnɩ a pɛr ɲɔ bunənena, sa jɛba cʋɔrara ɲɛ̃be makoɲɔ. 52 Thale a na phʋɔl cʋɔrra na 'lomĩ tɔmɩnɩle, na ɲɔ bunəneele, na 'lomĩ yireele, na sɛɛdɩrɩ thɩr kuruule, na ɩjɔpɩ faale, na lɛn kẽkẽ wi sɩɛɛle. 53 Agɩpɩ a dɔna 'lomĩ yireele dɩ khuirə a ubi a jal hʋɔnɔ. Thale a na phʋɔl cɔ dɔɔra dɩ cʋɔrra na phu jɔfʋ hʋɛra.»

54 Gɛr dʋɔn jɔfʋʋkɛ pɩɛrnɩ tomɩr lo kho caar dɩɩdɩɩra, na barsɛ caar dɩɩdɩɩdara, 55 na thurõphu caar dɩɩdɩɩraakɛ n hanɩ kẽkenana na cɔ gʋʋsɔɔra, 56 na bãgɩlãsɔɔdara, na jɩlaadara, na palaadara. 57 Jɔfʋ gɩ, kɛ n 'laanɛnɩ dɩɩrɛ ga n nɩna, a gɩ ha thaa, gɩ bisere jɔfʋ hʋɛra; a gɩ ha thaa, gɩ phure. Gɛr dʋɔn jɔfʋʋkɛ pɩɛrnɩ tomɩr lo khodaara na thurõphudaara.