Jɔfʋ tomɩr lo khoosɔɔra.
13
1 Thãgba Kɔ̃tɩn sor Mʋɩjɩ na Aarɔna ayɩ: 2 «Ɔbɔɔkɛ tibil hananɩ bãgɩlã, agɩbo jɩla, agɩbo paal gɩ, ɔɔ tomɩr lora, dɩɩ ɩ̃ a do tomɩr lo khoo, nɩ jalana ntɛ Aarɔ̃ bonɩ jidaara, agɩbo bonɩ jidaar ʋkha Aarɔ̃ɔ bikũusɔɔra. 3 Bonɩ jidaar n jʋrɛ khoora ntɛra hananɩ ɔɔ tomɩr lorara a hɩnɛ. Ado suuneekɛ hanɩ khoora bulolole, dɩ khoo hulõ, tomɩr lo kho puu gɩ. Bonɩ jidaar n hɩnɛ ntɛ sa sʋɔraa a bisere mɔ̃ jɔfʋ sonɩ. 4 Sɩ ado paala hanɩ tomɩr lʋʋra na hulonoa', dɩ suuneekɛ hanɩ khoora na buloloa', bonɩ jidaar n khaanɛ khodaara wire makoɲɔ. 5 Wire makoɲɔraale, a hɩnɛ ntɛra wo. Ado a yɩɛ dɩ khoora na tɔ pɛra, ga ƴɛr tomɩr lʋʋra ga, bonɩ jidaar n birə khaanɛ ntɛ balaɲɔdaa, wire makoɲɔra wo. 6 Wire makoɲɔraale, bonɩ jidaar hɩnɛ ntɛra wo. Ado a yɩɛ dɩɩ do khoora phɩlɛ ga ƴɛr tomɩr lʋʋra ga, jɩla gɩ dɩbara, bonɩ jidaar n sɔ ntɛra a phure mɔ̃ jɔfʋ sonɩ. Ntɛ n cɔcɔɔnɛ ɔɔ kẽkẽsɔ, a na phure. 7 Sɩ ado ntɛ nɩnanɩ ɔɔbara bonɩ jidaar pɩ, dɩ sʋʋraa a phure, gɛr jɩlala ƴɛrɔ tomɩr lʋʋra, ntɛ n birə jala bonɩ jidaarara a nɛnaa wo. 8 Dɩ bonɩ jidaar na bire na hɩɩnʋ. Dɩ ado jɩlala ƴɛrɛ tomɩr lʋʋra, bonɩ jidaar n sʋɔraa a bisere jɔfʋ hʋɛra. Tomɩr lo kho puu gɩ.9 Ɔbɔɔkɛ tibil hananɩ tomɩr lo kho puu, nɩ jalana ntɛ bonɩ jidaara a hɩɩnʋ. 10 Dɩ ado bãgɩlã na suuneekɛ harɔnɩ bulolole, dɩ bãgɩlana lubi a kholõ, 11 tomɩr lo kho puu gɩ, a mãa ntɛɛ tomɩr lora. Bonɩ jidaar n sʋɔraa a bisere jɔfʋ hʋɛra. A na n khaan nta', gɩdonɩ gɩ yɩrrɛ dɩ ntɛ bisere jɔfʋ hʋɛra.
12 Sɩ ado khoora ther ntɛɛ tomɩr lora, a tee khodaar tomɩra koo, a fʋ yʋɔ a dana nɛɛ, dɩ bonɩ jidaar yɩ gɩ, 13 aa jɩɩ jʋʋr, a yɩɛ, dɩɩ do khoora teere ntɛɛ tomɩr koo, a sɔ khodaarara a phure; gɩdonɩ ntɛ bulolole na paara fɛw, gɩ nɩnanɛ a phure. 14 Sɩ wireekɛ nʋ̃bʋraa na yɩrnɩ jɩɛra tibili tomɩra, ntɛ bisere jɔfʋ hʋɛra. 15 Ɔbɔɔkɛ bonɩ jidaar na yɩnɩ nʋ̃bʋraa dɩ ga yɩr jɩɛra tibili tomɩra, a sɔ ntɛra, a bisere jɔfʋ hʋɛra. Gɩdonɩ nʋ̃bʋraakɛ yɩranɩ jɩɛra, bisere gɩ jɔfʋ hʋɛra. Tomɩr lo kho puu gɩ. 16 Sɩ ado nʋ̃bʋraara yɩranɩ jɩɛra debi a bulolo, a jala yɛ bonɩ jidaar. 17 Dɩ a bonɩ jidaar hɩɩnʋ a yɩɛ dɩɩ do khoora debire a bulolo, bonɩ jidaar n sɔ khodaarara a phure; ntɛ phure.
18 Ɔbɔɔkɛ phɛɛrɛ kɔɔ thanɩ tibil tomɩra, sa ɩ̃ a kpɛɛ, 19 sɩ dɩ bãgɩlã bulo thɩɩ kãakɛra phɛɛrɛra kɔɔ thaanɩ, agɩbo pal bulo gɩ, a yaana dasɩɛ, a yɩr dapara, ntɛ n jalana nɛna bonɩ jidaar. 20 Bonɩ jidaar na hɩɩnɛ ntɛ. Ado a yɩɛ dɩɩ do khoora hulone, dɩ suuneekɛ hanɩ khoorara debi a bulolo, a sɔ ntɛra tomɩr lo kho puu gɩ a yɩr phɛɛr kho pʋɔna. Ntɛ bisere jɔfʋ hʋɛra. 21 Sɩ ado bonɩ jidaar na yɩ suun bulo dɩɩ harɔa', dɩ ga hulõə', sa phɩl, a khaanɛ ntɛ wire makoɲɔ. 22 Sɩ ado paalla ƴɛrɛ tomɩr lʋʋra, bonɩ jidaar n sɔ ntɛra tomɩr lo kho puu gɩ. Ntɛ bisere jɔfʋ hʋɛra. 23 Sɩ ado paala toore dapara, aa ƴɛr pɛra', phɛɛ pʋ̃ɔ gɩ. Bonɩ jidaar n sɔ ntɛra a phure.
24 Ɔbɔɔkɛ dɔɔ luurnɩ tibil tomɩra, dɩ dɔ hɩ̃ paara lubi, sa hana paal dɩɩ bulolo, agɩbo dabulo gɩ a yaana dasɩɛ, 25 bonɩ jidaar n hɩnɛ ntɛ. Ado suuneekɛ hanɩ khoora pal bɩnɔ bulolole, sɩ dɩ paala hulõ, kho puu gɩ a yɩr luur paarɩle. Tomɩr lo kho puu gɩ. Bonɩ jidaar n sɔ ntɛra a bisere jɔfʋ hʋɛra. 26 Sɩ ado bonɩ jidaar hɩɩn aa yɩ suun bulo dɩɩ harɔa', dɩ ga hulonoa', sɩ dɩɩ do gɩ phɩlɛ, a khaanɛ ntɛ wire makoɲɔ. 27 Wire makoɲɔraale, a hɩnɛ ntɛra wo. Dɩ ado paala ƴɛrɛ tomɩr lʋʋra bonɩ jidaar n sʋɔraa a bisere jɔfʋ hʋɛra. Tomɩr lo kho puu gɩ. 28 Sɩ ado paala toore dapara, aa ƴɛr tomɩr lʋʋra a pɛra', ado a phɩlɛ, luur pa bãgɩlã gɩ. Bonɩ jidaar n sɔ ntɛra a phure gɩdonɩ luur pa pʋ̃ɔ gɩ dɩbara.
29 Ɔbɔɔkɛ kuun, agɩbo khɛr hananɩ khoo yʋɔ, agɩbo nɔtɩɛlɔ, 30 bonɩ jidaar n hɩnɛ khoora. Ado gɩ hulone, dɩ suun khamɩsɛ harɔ dʋlãa dʋlãa, bonɩ jidaar n sɔ ntɛra a bisere jɔfʋ hʋɛra. Barsɛ gɩ, kɛ dɔnɩ tomɩr lo khoo, kɛ hanɩ yʋɔ agɩbo nɔtɩɛlɔ. 31 Ado bonɩ jidaar hɩɩn a yɩɛ dɩ barsɛ khoora na hulõə', sɩ suun birə na harɔa', a khaanɛ ntɛra hananɩ barsɛ khoora wire makoɲɔ. 32 Wire makoɲɔraale, bonɩ jidaar n hɩnɛ khoora. Ado barsɛra na ƴɛra', dɩ suun khamɩsɛ na harɔa', dɩ ga hulõə', 33 ntɛ n bela yʋʋ na nɔkhuusi, sa sɛ kãakɛ barsɛra hanɩ. Agɩpɩ bonɩ jidaar n khaanɛɛ balaɲɔdaa wo wire makoɲɔ. 34 Wire makoɲɔraale, bonɩ jidaar n hɩnɛ barsɛra wo. Ado ga ƴɛr pɛr tomɩr lʋʋra ga, dɩ ga hulõə', bonɩ jidaar n sɔ ntɛra a phure. Ntɛ n cɔcɔɔnɛ ɔɔ kẽkẽsɔ, a na phure. 35 Sɩ ado wɩ sor ntɛra pɩ a yɩ a phure, sɩ dɩ barsɛra bir ƴɛr a pɛr tomɩr lʋʋra, 36 bonɩ jidaar n birə hɩnɛɛ wo. Ado gɩ ƴɛrɛ tomɩr lʋʋra a pɛr ger, bonɩ jidaar na n ƴaal bã; a suun khamɩsɛ 'li harɔ pɩ, ntɛ bisere jɔfʋ hʋɛra. 37 Sɩ ado a yɩ barsɛra, dɩ ga do gɩ tɔr pɛra', sɩ dɩ suun birə phuro, gɩ kpɛɛrɛ, ntɛ phure. Bonɩ jidaar n sʋɔraa a phure.
38 Ɔbɔɔkɛ kuun, agɩbo khɛr hananɩ ɔɔ tomɩr lora pal bulona, 39 Bonɩ jidaar n hɩnɛ ntɛ. Ado pal bulona gɩ, kɛ phɩlanɩ, khoo gɩɩkɛ na puurona', a the ntɛ tomɩr lʋʋra. Ntɛ phure.
40 Ɔbɔɔkɛ tibili yʋsũu pɩbɩnɩ, yʋ pɔlɔ gɩ; ntɛ phure. 41 A ntɛɛ yʋsũu pɩbɩ kubi bilo, yʋ pɩbɩrɛ gɩ, kɛ fɔnɩ na ƴɛbʋrɛ. Ntɛ phure. 42 Sɩ ado khoo ha yʋ pɔlɔ paara khiro, agɩbo ƴɛbʋrɔ a bulolo, a yaana dasɩɛ khama khama, tomɩr lo khoo gɩ, a yɩr yʋ pɔlɔ paar khiro, agɩbo ƴɛbʋrɔ. 43 Bonɩ jidaar n hɩnɛ ntɛ. Ado bãgɩlã lubi a bulolo, a yaana dasɩɛ khama khama khoorara, le yʋ pɔlɔ paara ƴɛbʋrɔ, agɩbo khiro, a hona khookɛ hanɩ tomɩr lʋʋra, 44 tomɩr lo kho puu ntɛ hana. Ntɛ bisere jɔfʋ hʋɛra. Bonɩ jidaar n sʋɔraa a bisere jɔfʋ hʋɛra, yʋʋra ɔɔ kho fʋʋ.
45 Ntɛɛkɛra tomɩr lo kho puu hananɩ n tɔ kẽkẽ ɓərə, a faana yʋsuune bʋla bʋla, a kɛa nʋɔra sɩ na hulene: Mɩ bisere! Mɩ bisere! 46 A ntɛɛ kho pʋɔr mɔnakɛ sɩ ga pa', ntɛ bisere jɔfʋ hʋɛra. Dɩ gɩdonɩ ntɛ bisere jɔfʋ hʋɛra, dɩbara a na n cɔ. Ntɛɛ cɔ n hana jɛ khuirə.
Jɔfʋ thurõphureraakɛ n hanɩ thɩ̃ɛsɔɔra.
47 Ɔbɔɔkɛ thurõphure hanɩ kɩ̃kɩɩnaakɛ wɩ lenanɩ lɛn agɩbo lɛ̃: 48 a kẽkẽ gborõbera gɩ, agɩbo kẽkẽ nɩɩra gɩ, kɛ wɩ lenanɩ lɛn agɩbo lɛ̃, a lʋʋra gɩ, a lo thɩ̃ dɩkhara gɩ, 49 a thurõphurera hanɩ ga thɩ̃sɔraalera ho faa, agɩbo gɩ khamɩsɛrɛ, thurõphu puu gɩ, nɩ nɛna bonɩ jidaar a hɩɩn. 50 A bonɩ jidaar jʋʋr thɩ̃ doora a hɩɩn pɩ, a khaanɔ thɩ̃ doora hananɩ thurõphurera, wire makoɲɔ. 51 Wire makoɲɔraale, a hɩnɛ thurõphurera wo. Dɩ ado thurõphurera ƴɛrɛ pɛr, a kɩ̃kɩɩna gɩ, a kẽkẽ gborõbirera gɩ, a kẽkẽ nɩɩra gɩ, agɩbo lʋʋra, agɩbo lo thɩ̃ dɩkhara, thurõphu puu gɩɩkɛ n manɩ. Thɩ̃ doo bisere jɔfʋ hʋɛra. 52 A kẽkẽ tonanɛna gɩ, a kẽkẽ gborõbirera gɩ, a kẽkẽ nɩɩra gɩ, kɛ wɩ lenanɩ lɛn agɩbo lɛ̃, agɩbo lo thɩ̃ dɩkhara gɩ, kɛ thurõphurera harnɩ, wɩ thiəə faa gɩdonɩ thurõphu puu gɩ, kɛ n manɩ, nɩ thiə thɩ̃ doora dɔɔra faa. 53 Sɩ ado bonɩ jidaar hɩɩn a yɩɛ dɩ thurõphurera na ƴɛr pɛr kẽkẽ tonanɛna, agɩbo kẽkẽ gborõbirera, agɩbo kẽkẽ nɩɩra agɩbo lo thɩ̃ dɩkharara ga, 54 a 'laanɛ hʋɛ wɩ cɔcɔɔ thɩ̃ doora thurõphurera harnɩ. Agɩpɩ a khaanɔ thɩ̃ doora wire makoɲɔ wo. 55 Agɩpɩ bonɩ jidaar n hɩnɛ thurõphurera wo kɛ wɩ kɔɔ cɔcɔɔnɩ. Aa yɩ gɩ dɩ thurõphurera na debi ƴɩɛa', adorakɛ ga ƴɛr pɛra', sɩ thɩ̃ doo bisere jɔfʋ hʋɛra. Nɩ thiəə dɔɔra a faa, a bɩnɔ gɩ kho, a khiro gɩ kho. 56 Sɩ ado bonɩ jidaar yɩɛ dɩ thurõphurera phɩlɛ ɔbɔɔkɛ wɩ cɔcɔɔnɩ pɩ, a kurə dapara a faa; a kẽkẽ tonanɛ gɩ, a kẽkẽ gborõbire gɩ, a kẽkẽ nɩɩ gɩ, a lʋʋ gɩ. 57 Sɩ ado thurõphurera bir yɩr wo kẽkẽ tonanɛnana agɩbo kẽkẽ gborõbirera, agɩbo kẽkẽ nɩɩrara, agɩbo lo thɩ̃ dɩkharara, thurõphu puu gɩ dɩ ga n ƴɛr. Nɩ thiə thɩ̃ doora hananɩ thurõphurera dɔɔra a faa. 58 A kẽkẽ tonanɛ gɩ, agɩbo kẽkẽ gborõbire gɩ, agɩbo kẽkẽ nɩɩ gɩ, a lo thɩ̃ dɩkha gɩ, kɛ kɔɔ hananɩ thurõphure dɩ wɩ cɔcɔɔ dɩɩ pɩ, nɩ birə cɔcɔɔnɛɛ balaɲɔdaa wo, a na phure.»
59 Gɛr dʋɔn jɔfʋʋkɛ wɩ pɛrnɩ thurõphureraakɛ n hanɩ thɩ̃ɛsɔɔra: a kẽkẽ tonanɛna gɩ, a kẽkẽ gborõbirera gɩ, a kẽkẽ nɩɩra gɩ, a lo thɩ̃ dɩkhara gɩ. Gɛr n nɛna ado thɩ̃ doo phure agɩbo gɩ bisere jɔfʋ hʋɛra.