Bhalʉwa wa maba ka Batesalonika
Lɨkpʉmʉka wa maba
Bhalʉwa yi nɨmʉ ɨgɨlya bata lɨkpʉmʉka limoti nɨlɔ Pɔlɔ anzɨna ndɨ mino (kʉgʉ yi ) ka bhalʉwa wa mambwa. Nɨyɔ ngbingo a ndɨ kakɨtaga, bamʉ apʉnga ndɨ kaʉgya bakilisito biyoyo kyɛ Mombukwono-dhosu Yeso kanigikugu . Ka Tesalonika, batʉ bemoti-bemoti babɨkyaga ndɨ bɛ lɨsyɛ ka Mombukwono-dhosu odhunuku (2.2). Batʉ bagɔgɔ bakakya ligubho (3.6-12). Bakaɨna bɛ kɛgʉ na ɨzangɨya, kyɛ Mombukwono-dhosu a buwobhi kodhoku.
Kʉsɔ wa bhalʉwa yi nɨmʉ, Pɔlɔ akaidhukulogo na mʉtʉʉ kakɨ. Bhaya kɛgʉ kolimogo bhɨbhʉ ka bambanzʉ. Kɛgʉ gɔnɨ kolimogo bʉkpɛkɨ-pkɛkɨ na yigyogyiso. Lísyɛ li nɨlɔ Kunzi igoku ndɛkɛ mino, bapʉtatʉ ndɛkɛ bʉnyɛ (1.5-9). Mbɨya-mbɨya yi nɨmʉ, bʉnyɛ akakpakyana ka ɔbɨlɨ bɨpɛlɛ (2.1-12). Pɔlɔ akanzɨna ko bhulyo ya bʉnyɛ abhɛ kiko kanzɨna ko bhulyo ka mʉmbanzʉ, anaka bɛ « mʉtʉ wanyɛ». A no ngu nɨyɔ akamʉmʉla bo ngu ba yasɨ ba yanyɛnyɛ. Luki limoti akpɨngbagatʉ ngu yi nɨyɔ kaimoniso bɛyɔ okwononi mino. Ngbingo yi nɨnɔ iwoniso ndɛkɛ mino bɛyɔ okwononi mino, apʉtɨkanatʉ ndɛkɛ. Luki limoti, ngbingo kanitulyonigʉ mbɛyɨ. Nɨyɔ akapa kaɨbɨkya bɛ : Ngbingo yi nɨnɔ Yeso odhoku ndɛkɛ mino mʉdɔngɔnɨ abhɛ Mombukwono ɔbɨlɨ , bomikya-bambanzʉ bibhatʉ ndɛkɛ bɛ bʉnyɛ nɨ luki tino. Kʉwa wa-gʉ-wa, bʉnyɛ kikigʉ ndɛkɛ bata no ngu.
Bhalʉwa akaʉkʉnga bakilisito bɛ bakikonitɔgʉ na mʉtamanagɨ bɛ bodhwini ka mulibo. Mʉbʉndagɨ kabʉ kakwananɨgʉ kaʉpakya kaiko na ɔbɨlɨ wa masyɛ masɨ, na kava bʉngama kabʉ ka ɔbɨlɨ.