Bhalʉwa wa maba ka Batesalonika
Yuuso
1
1 Ɨmɨ Pɔlɔ pa imoti na Silivano ɨbʉ na Timotiyo, tamumuusogito ibunu bomomosu ba Kanisa ya Tesalonika. Tamukpikilyi ibunu bhalʉwa yi nɨmʉ, Kanisa nɨyɔ ko Kunzi Obhosu na Mombukwono-dhosu Yeso-Kilisito. 2 Obhosu Kunzi na Mombukwono-dhosu Yeso-Klisito bamudukilyi ɨzɨyɔ na mazɨyɔ.Kunzi akɔtʉ ndɛkɛ ngbanga ka bambazʉ
3 Bomika-mama, tokwononi kamigisyo Kunzi ɨbhɨbha bongbingo basɨ ko bhulyo kunu. Okwononi tagyɨ bɛyɔ kyɛ bhaya kunu akopingo, na sɨpananɨsɔ nɨsɔ ma nosu lugo kunu akaidhukulogo bɛgɛyɔ. 4 Kinili, ta na bugindo ko bhulyo kunu kambwa wa Makanisa ko Kunzi, ko bhulyo ya lɨmbɛngɨ kunu lɨnda na bhaya kunu gʉtʉgʉ makaigyogyiso na kalya kumbu. 5 Masɨ nɨmɔ akowoniso bɛ Kunzi opungini kakɔ ngbanga ka bungbingbili, kyɛ yigyogyiso amuiitiso ndɛkɛ bʉkwanana kaingyo ka Bʉngama kakɨ. 6 A bɛyɔ, Kunzi a wongbingbili. Ugyogyiso ndɛkɛ batʉ basɨ nɨbɔ bakamugyogyiso bɛgɛyɔ, 7 ibunu bi nɨbɔ makaigyogyiso, amuyukumisotʉ pa imoti na ibusu. Agya ndɛkɛ bɛyɔ wa Mombukwono-dhosu Yeso ipupiso ndɛkɛ mino kʉgʉ wa lɨsyɛ pa imoti na bamalaika bo ngu kakɨ, 8 odhoku ndɛkɛ lugo wa lɨdada lo buku, ugyogyiso ndɛkɛ batʉ nɨbɔ bakyaga kamibho Kunzi na nɨbɔ bakabhaɨlyagʉ Mongoni Manza ka Mombukwono-dhosu Yeso. 9 Yigyogyiso kabʉ iko ndɛkɛ pʉtɨkana ya bɛnzɛ na bɛnzɛ, bakɨnɨgʉ ndɛkɛ miso ka Mombukwono-dhosu, ubhiso ndɛkɛ byɨ no ngu kakɨ ya ɨbhɨbha. 10 Ka lɨsyɛ li nɨlɔ odhoku ndɛkɛ mino, batʉ basɨ nɨbɔ ba ka mutili kakɨ, babhibhisotʉ ndɛkɛ na nɨbɔ babɨnɨkyana ndɨ, nɔkʉ ʉdhɨka bɨdhɛ. Ibunu gɔnɨ miko ndɛkɛ pa imoti na ɨbʉ kyɛ mobinikyononi ndɨ mongoni nɨmɔ tamʉbɨkyaga ndɨ.
11 Kinili, tikogo bongbingo basɨ kamʉkʉngʉlya. Takakʉnga Kunzi ambɛ amuitisi batʉ nɨbɔ bokwononi ka ɔbɨlɨ nɨnɔ amʉmakaga mino. Pisi ko ngu kakɨ, amusingyi kotulyoso mʉsasa kunu manza na ligubho kunu kʉsɔ wa bhaya. 12 Kiko bɛyɔ, lino ka Mombukwono-dhosu Yeso avatʉ ɨbhɨbha, na ɨyɨ amʉpatʉ gɔnɨ ɨbhɨbha. Nɨyɔ yasɨ a ɨzɨyɔ ko Kunzi na Mombukwono-dhosu Yeso.