Kabʉndaga lɨsyɛ nɨlɔ Mombukwono-dhoso odhoku ndɛkɛ mino
5
1 Bamamakɨ, kɛgʉ na ɨzangɨya bɛ namukpilyi lɨkpʉmʉka ko bhulyo lɨsyɛ ɨkanɨ ko bhulyo ngbingo yi nɨnɔ makpʉmʉka mi nɨmɔ igyonoso ndɛkɛ mino. 2 Makaibho ibunu bamombukwono-dhonu bɛ lɨsyɛ ka Mombukwono-dhosu odhoku ndɛkɛ bigbututu mʉdɔngɔnɨ bɛyɔ mʉtʉ wo kubakʉ odhogoku mino no bhiti. 3 Ngbingo yi nɨnɔ, bambanzʉ biko ndɛkɛ mino kabɨkya bɛ : « Ta ka mazɨyɔ na pa mbɛyɨ biwo », ko ngbingo yi nɨnɔ gɔnɨ nɔ, bʉnyɛ usilyo ndɛkɛ bigbututu, mʉdɔngɔnɨ abhɛ mʉzʉzʉla nɨmɔ asilyogo muko wa mʉma ka libukuti. Gʉtʉgʉ mʉmbanzʉ bemoti aka kaʉkagɨgʉ ndɛkɛ mino. 4 Bamamakɨ, luki limoti, ibunu makɛgʉ kʉsɔ wo bhiti, bɛkyɛ lɨsyɛ li nɨlɔ amusilyi ndɛkɛ bigbututu abhɛ mʉtʉ wo kubakʉ. 5 A bɛyɔ, ibunu basɨ ma batʉ ba bʉngbanganya na ba lɨsyɛ lɨsyɛ. Takɛgʉ ibusu batʉ bɔ bhiti ɨkanɨ nɨbɔ bakapagɨgʉ bʉngbanganya. 6 Kinili, takololonitɔgʉ abhɛ batʉ bagɔgɔ, luki limoti, tikini bubisi, tiko bakɨmɨnya. 7 Batʉ nɨbɔ balalaga, balalaga no bhiti, na nɨbɔ bikogo na lɨbhʉma, bomwogo no bhiti. 8 Luki limoti, ibusu ta batʉ ba lɨsyɛ lɨsyɛ, tokwononi kaiko bakɨmɨnya. Timokisyini bhaya na sɨpananɨsɔ abhɛ kutuko kwa ngwɛyɨ kaibuulyo mbanzɨ, timokisyo mʉtamanagɨ ma muukuso abhɛ sɨkpakpasʉ katibuulyogo yi. 9 Kunzi katɨpʉnagagʉ ndɨ bɛ tigyogyisi ko bhulyo ya ngbʉta kakɨ. Luki limoti, bɛ tinisoni na muukuso ko pisi ka Mombukwono-dhosu Yeso-Klisito. 10 Ɨyɨ, atikwilyogo ndɨ ibusu, kyɛ takiko gʉtʉgʉ bubisi ikanɨ bukwo, tiki ndɛkɛ na ɔbɨlɨ pa imoti na ɨbʉ ka lɨsyɛ nɨlɔ igoku ndɛkɛ mino. 11 Kinili, tumisononi mambɛngɨ, midhukulogo kongotiso bhaya kunu, mʉdɔngɔnɨ bɛyɔ mikogo mino kagya. Mʉtʉʉ na yuuso ya mulibo
12 Bamamakɨ, takamʉbɨkya ambɛ udhondisoni batʉ nɨbɔ bakagya ligubho lugo kunu, bakamukpokyoniso ko pisi ka Mombukwono-dhosu na kamʉpá mʉtʉʉ. 13 Ubhibhisogoni kʉgbɛ, miko na sɨpananɨsɔ na ɨbʉ ko bhulyo ya ligubho kabʉ. Wikoni na mazɨyɔ lugo kunu.
14 Bamamakɨ, takamʉkʉnga ambɛ ubikyoni batʉ nɨbɔ bakapagɨgʉ ligubho ambɛ bɨmɨnyɨtɔ, utumisoni nɨbɔ ba na buti ka mambɛngɨ, usingyoni batʉ nɨbɔ bakɛgʉ no ngu, wikoni na lɨmbɛngɨ lɨnda ka batʉ basɨ. 15 Wibuulyonitɔ, mʉmbanzʉ gʉtʉgʉ bemoti aka kamigisilyonitɔgʉ dhakɨ bʉnyɛ ka bʉnyɛ, luki limoti, kisoni bongbingo basɨ kagya bʉnza aka lugo kunu na ka bambanzʉ basɨ.
16 Gwoni magyagya masyɛ masɨ. 17 Lumbogoni masyɛ masɨ. 18 Mumigisilyogoni Kunzi ɨbhɨbha ka makpʉmʉka masɨ. Kunzi apaga bɛ gyogoni makpʉmʉka mi nɨmɔ kʉsɔ wa matɨkana kunu na Yeso-Kilisito.
19 Makokpingbonitɔgʉ ligubho la Lɨmbɛngɨ-Lotu. 20 Makinonitɔgʉ mʉtʉʉ ka bogyalandʉ ko Kunzi payaya. 21 Luki limoti, kpimoni makpʉmʉka masɨ, mobingisyo nɨmɔ manzanza. 22 Nyikoni mobhi ma bʉnyɛ masɨ.
23 Kunzi bɨkpɛ nɨnɔ mombukwono mazɨyɔ amuitisi batʉ botu ka bopisi ba yasɨ, obuulyogi tamanaga, lɨmbɛngɨ na nzʉyɨ kunu yasɨ, kyɛ kikonitɔgʉ na bʉnyɛ gʉtʉgʉ bumuti aka ngbingo yi nɨnɔ Mombukwono-dhosu Yeso-Kilisito igoku ndɛkɛ mino. 24 Mʉtʉ yi nɨnɔ amʉmakaga ndɨ, a mʉtʉ wa lɨngʉnʉ, ɨyɨ, otulyosotʉ lɨkpʉmʉka li nɨlɨ.
25 Bamamakɨ, tilumbilyonitɔ gɔnɨ ibusu.
26 Tilyononi, mopututonogo abhɛ bomika-muko.
27 Nakamʉkʉnga ko lino ka Mombukwono-dhosu ambɛ mutongulogoni bhalʉwa yi nɨmʉ ka batʉ basɨ nɨbɔ babhaya Yeso-Kilisito.
28 Ɨzɨyɔ ka Mombukwono-dhosu Yeso-Kilisito iki pa imoti na ibunu.