Yɨgya nɨyɔ Kunzi apaga
4
1 Ka mulibo, bamamakɨ, tamuwonisiloni ndɨ yɨgya nɨyɔ okwononi kabosilo Kunzi. A bɛyɔ, ɔbɨlɨ kunu a kʉwa kakpakyana bɛyɔ aka yɔ. Mbɨya-mbɨya wanʉ, takamʉkʉnga na kaɨtatanaga na ibunu ko lino ka Mombukwono-dhosu Yeso ambɛ widhukulogoni kʉwa asɨ kagya aka bʉnza. 2 Makaibho bɛyɔ tamʉpá ndɨ mino mʉtʉʉ nɨmɔ otukyoku ka Mombukwono-dhosu Yeso. 3 Kunzi apaga bɛ wikoni batʉ botu na nɨ makɛgʉ kagya bɨlya. 4 Mʉtʉ yɨkaka-yɨkaka iki na mukakɨ kyɛ biki na ɔbɨlɨ nɨnɔ okwononi na ɨbhɨbha, nɨnɔ abosilo Kunzi, 5 kanɨ kisigʉ kogwo ka mʉsasa manyɛ, mʉdɔngɔnɨ abhɛ bapagani nɨbɔ bakamibhogigʉ Kunzi. 6 Kabyɛnɛnɛ na mʉnzɨna mi nɨmɔ, mʉmbanzʉ gʉtʉgʉ bemoti aka kagyilyonitɔgʉ bɛngɛnɨ bʉnyɛ ikanɨ kabɔ. Tamubikyoni ndɨ, ta bata kaɨgyɨlya kamʉbɨkya ambɛ Mombukwono-dhosu ugyogyisotʉ ndɛkɛ batʉ bi nɨbɔ bakagya inguwo ya makpʉmʉka mi nɨmɔ. 7 A bɛyɔ, Kunzi katɨmakagʉ kyɛ tiki kagya lɨkpʉmʉka lanyɛ, luki limoti, kyɛ tiki botu. 8 Kinili, mʉtʉ wasɨ nɨnɔ okyi mʉtʉʉ mi nɨma, kakyigʉ mʉmbanzʉ, luki limoti, akyi Kunzi nɨnɔ amʉpága Lɨmbɛngɨ-Lotu kakɨ.9 Kɛgʉ na ɨzangɨya bɛ tamukpikilyi ka nɨlɔ ondi sɨpananɨsɔ lugo kunu, kyɛ Kunzi amuwonisoni ndɨ bɛyɔ makwanana mino kaiko na sɨpananɨsɔ lugo kunu. 10 A nɨlɔ mʉgyɨlyaga bomomonu basɨ ka iwili yasɨ ya Makedhonia. Luki limoti, bamamakɨ, takamʉkʉnga ambɛ widhukulogoni kʉwa asɨ kagya aka bʉnza. 11 Gyoni kɛkɛlɛ kaiko na mazɨyɔ. Mʉtʉ yɨkaka-yɨkaka andɨ mbɛyɨ lɨkpʉmʉka kakɨ bɨkpɛ, agya ligubho na mabɔkʉ, mʉdɔngɔnɨ bɛyɔ tamʉpá ndɨ mino mʉtʉʉ. 12 Makagya bɛyɔ, minisonotʉ na ɨbhɨbha ko miso ka batʉ nɨbɔ bakɛgʉ bakilisito. Makikigʉ bakɨgʉmya ka mʉmbanzʉ.
Yigoku ka Mombukwono-dhosu
13 Bamamakɨ, takapa ambɛ wibhoni lɨkpʉmʉka ko bhulyo ka batʉ nɨbɔ bokwogo, kyɛ makikonitɔgʉ kalya kumbu mʉdɔngɔnɨ abhɛ batʉ bagɔgɔ nɨbɔ bakɛgʉ na mʉtamanagɨ. 14 Ta na bhaya ambɛ Yeso okwotʉ ndɨ, opupo ka mbʉkʉ. Kinili, ta gɔnɨ na bhaya ambɛ Kunzi upupisatʉ ndɛkɛ ka mbʉkʉ pa imoti na Yeso batʉ nɨbɔ bokwogo ndɨ nɨ babinikyonini.
15 Kabyɛnɛnɛ na mʉtʉʉ ka Mombukwono-dhosu, tamubikyi bɛ : Ibusu bi nɨbɔ ta mbɛyɨ na ɔbɨlɨ aka kadhwɛ kʉkwakʉ Mombukwono-dhosu igoku ndɛkɛ mino, takʉkɨtagɨgʉ ndɛkɛ nɨbɔ bokwogo ndɨ. 16 Tʉkana ndɛkɛ mungbi, lɨyʉ ka ngama ka bamalaika, sɛ kʉwa nɨlɔ la sɨba ko Kunzi. Kumbuso yi, Mombukwono-dhosu bɨkpɛ osyoku kotukyoku kʉgʉ wa lɨsyɛ. Kʉwa wa, batʉ nɨbɔ bokwogo ndɨ kʉsɔ ka Yeso, biko ndɛkɛ batʉ ba mambwa kopupoku ka mbʉkʉ. 17 Kumbuso yi, ibusu bi nɨbɔ tiko ndɛkɛ na ɔbɨlɨ aka ko ngbingo yi nɨnɔ, batɨbhɨnɨka ndɛkɛ pa imoti na ɨbʉ kʉgʉ wa lɨsyɛ, kobhongonoku na Mombukwono-dhosu kʉ. Tiko kʉwa ndɛkɛ bongbingo basɨ pa imoti na Bamombukwono-dhosu kʉ. 18 Tumisononi nɛkɨ mambɛngɨ na mʉnzɨna mi nɨma.