3
1 Ka mulibo, takakwananɨgʉ ndɨ bata kabʉndɨla bɨndɨ, kinili, tɨna ndɨ bɨnza kotigolo ibusu baba ka Atene, 2 tamʉtɨkɨlya kʉwa ndɨ momosu bɛyɔ ka Timotiyo nɨnɔ agyaga ligubho ko Kunzi nɨlɔ lɨbɨkyaga Mongoni Manza ka Kilisito pa imoti na ibusu. Tamʉtɨkɨlya ndɨ kyɛ ongotisiku bhaya kunu, amutumisi mambɛngɨ kʉsɔ wa bhaya, 3 ibha mʉmbanzʉ gʉtʉgʉ bemoti aka lugo kunu kogwonitɔgʉ pʉpɔ ka yigyogyiso yi nɨyɔ. A bɛyɔ, makaibho bɨnza ibunu bamombukwono-dhonu bɛ okwononi bɛ tigyogyisi bɛyɔ. 4 Ngbingo yi nɨnɔ ta ndɨ mino ku kunu, tamʉbɨkya ndɨ kambwa aka bɛ batigyogyisotʉ ndɛkɛ. Makaibho bɨnza ambɛ yigyogyiso yi kʉwa nɨyɔ atisilyo ndɨ yɔ. 5 Kinili, kaɨna bɛ kɛgʉ ndɨ bɨnza kaiko kaɨbʉbʉndya, namʉtɨkɨlya ndɨ Timotiyo kyɛ ɨndɨ kaibho bɛyɔ bhaya kunu a kʉwa mino. Na ndɨ kabanga ambɛ yagɔgɔ Mumuyoniso amukingilogini, kiko ndɨ nɨ a bɛyɔ, ligubho kusu ɨnda ndɨ payaya. 6 Luki limoti, mbɨya-mbɨya wanʉ, Timotiyo iginiku, atɨpága mongoni manza kʉgʉ wa bhaya na sɨpananɨsɔ kunu. Atibikyi bɛ matɨtamanaga masyɛ masɨ, na bɛ ma bata na mʉsasa katɨmɨna bɛgɛyɔ ibusu ta gɔnɨ mino na imu kʉgʉ kunu. 7 Kinili, bomika-mama, gʉtʉgʉ ta ndɨ kʉsɔ wa yigyogyiso na bʉkpɛkɨ-kpɛkɨ, bhaya kunu yɔ atitumisogo ndɨ mambɛngɨ. 8 Mbɨya-mbɨya wanʉ, mambɛngɨ atisyini kyɛ mabʉmatɨkana na Mombukwono-dhosu aka. 9 Nakibhigʉ ikanɨ takwanana kamigisyo Kunzi ɨbhɨbha bʉ ko bhulyo kunu. A bɛyɔ, tabutomo na magyagya bɨdɛ kambwa kakɨ ko bhulyo kunu. 10 Talʉmbaga Kunzi na kɛkɛlɛ bhiti na lɨsyɛ kyɛ atiukwilyi pisi kaɨnana bata na ibunu na kamʉmatɨlya nɨlɔ amubwi ka bhaya.
11 Kunzi bɨkpɛ, Obhosu, pa imoti na Mombukwono-dhosu Yeso, batiukwilyi pisi kaɨnda ku kunu. 12 Mombukwono-dhosu amʉmatɨlyɨ sɨpananɨsɔ sidhingi lugo kunu na bambanzʉ bagɔgɔ basɨ, mʉdɔngɔnɨ bɛyɔ ibusu tamʉpaga mino. 13 Amungotisi mambɛngɨ kyɛ miki batʉ botu nɨ kɛgʉ wa bamuyoyiso mino kambwa ka Kunzi Obhosu, ka lɨsyɛ nɨlɔ Mombukwono-dhosu Yeso odhoku ndɛkɛ mino pa imoti na batʉ kakɨ basɨ.