2 Bakolito 11

Pɔlɔ na batʉtʉmbwa ba bɔngɔ

1 Nakamʉbɨkya ambɛ ipilyonitɔ, mʉnzɨna kamɨ kiko abhɛ mʉtʉ wa ibhikyasʉ ! Iyo, ipilyonito ! 2 Na no ibunu na imi, mʉdɔngɔnɨ bɛgɛyɔ Kunzi a mino noyu kʉgu kunu. A bɛyɔ, nabɨkya ndɨ ambɛ mavanana ndɛkɛ na mʉlʉkʉ bemoti, mʉlʉkʉ yi nɨ Kilisito. Nakapa kamumomoso kambwa kakɨ abhɛ mʉsɨka nɨnɔ kanibhigʉ lɨkpʉmʉka ka balʉkʉ. 3 Mibhotʉ bɨnza bɛyɔ nzʉka abɔ ndɨ mino Eva pisi ka bokoli. Na kʉwa na kʉbangakʉ ambɛ tamanaga kunu koputikononitɔgʉ bɛyɔ, amʉtɨka kaasanana na bungbingbili na lɨngʉnʉ nɨbɔ mo mino kʉsɔ ka Kilisito. 4 A bɛyɔ, mɨnaga makpʉmʉka masɨ bɨnza aka. Mʉmbanzʉ kodhoku kamʉbɨkya lɨkpʉmʉka ka Yeso nagɔgɔ nɨ kɛgʉ nɨnɔ ibusu tamʉbɨkyaga ndɨ lɨkpʉmʉka kakɨ, mabhaɨlya. Mikogotʉ gɔnɨ bakɨtʉlya kabhaɨlya lɨmbɛngɨ lodhi nɨ kɛgʉ nɨlɔ minisono ndɨ nolu ikanɨ kabhaɨlya mongoni manza magɔgɔ nɨ kɛgʉ nɨmɔ tamʉbɨkyaga ndɨ.

5 Wɨna sɛ, nakaɨna abhɛ batʉtʉmbwa bi nɨbɔ bakaʉbhɨbha bɔ bakɛkitogigʉ gʉtʉgʉ iki yi aka. 6 Gʉtʉgʉ bɛyɔ nanzɨnaga mino biti yɔ, luki limoti, kɛgʉ yɨpɛpɛ pisi ka yimibho. Bongbingo basɨ, tamuwonisogo yimibho yi nɨyɔ bɨngbanganya ka bopisi dhidhidhi.

7 Namʉbɨkyaga ndɨ Mongoni Manza ko Kunzi ka ɨzɨyɔ. Nisiso kyɛ ibunu minisoni na ɨbhɨbha. Ambɛ, nagya ndɨ bɨnyɛ ? 8 Ngbingo yi nɨnɔ nagyaga ndɨ mino ligubho lugo kunu, makanisa magɔgɔ mɔ ɛkalyaga ndɨ. Nɨyɔ ikogo kʉwa ndɨ abhɛ nakiko kabʉka buyi kabʉ, nanodhoku na ibu kamusingyo. 9 Wa nikogo ndɨ mino na yangya lugo kunu, nakamudhomisogigʉ ndɨ na yɨkʉkʉngya, kyɛ bomomosu nɨbɔ botukyoku ndɨ ka Makedhonia bedhulyoku ndɨ na masɨ nɨmɔ na ndɨ mino wakangya . Ka masɨ, nibuulyogo ndɨ bɛ nakamubhinikisonitɔgʉ buti kamɨ, niko asɨ kaibuulyo aka. 10 Pisi ka lɨngʉnʉ ka Kilisito nɨyɔ a kʉsɔ kamɨ, nakabɨkya bɛ : mʉtʉ gʉtʉgʉ bemoti aka kakwananɨgʉ kɛpakya kaiipo ikubhasʉ ka lɨkpʉmʉka li nɨlɔ, ka iwili yasɨ ya Akaya. 11 Ko bhulyo ɨkɨ yɔ no mino kanzɨna bɛyɔ ? A kyɛ nakamʉpagɨgʉ ? Haaa, kɛgʉ bɛyɔ, Kunzi akaibho bɛ namʉpagatʉ.

12 Nɨyɔ nakagya, nidhukulogo kagya yi aka, ibha batʉtʉmbwa bi nɨbɔ bakikonitɔ no pisi ya kɨbhɨbha bɛ bagyaga ligubho mʉdɔngɔnɨ abhɛ ibusu. 13 Batʉ bi nɨbɔ ba batʉtʉmbwa ba bɔngɔ, bagya-ligubho ba bokoli. Bɨbɔgɔ bɛ ba batʉtʉmbwa ka Kilisito. 14 Kɛgʉ lɨkpʉmʉka lɨmbanga, kyɛ Abhɨlɨ bɨkpɛ ɨbɔgɔtʉ gɔnɨ bɛ a malaika wa bʉngbanganya. 15 Kɛgʉ nɛkɨ gɔnɨ lɨkpʉmʉka lɨmbanga bagya-ligubho ka Abhɨlɨ bakɨbɔ abhɛ ba bagya-ligubho bongbingbili. Mulibo kabʉ iko ndɛkɛ mʉdɔngɔnɨ na yɨgya kabʉ.

Yigyogyiso ka Pɔlɔ abhɛ atʉtʉmbwa

16 Nakapa bata kabɨkya ambɛ, makeminonitɔgʉ abhɛ ngingi. Kiko nɛkɨ nɨ a bɛyɔ, kɛgʉ na lɨkpʉmʉka, kyɛ ɨmɨ, nɨbhɨbhɨ mbɛyɨ gɔnɨ mino. 17 Mʉnzɨna mi nɨmɔ nakanzɨna, kɛgʉ mʉnzɨna mi nɨmɔ Mombukwono-dhosu apaga, luki limoti, a abhɛ ngingi kyɛ na kaɨbhɨbha. 18 Bɛgɛyɔ batʉ budhingi bɨbhɨbhaga mino ko bhulyo makpʉmʉka ma lɨtɔmbʉ, ɨmɨ, na mbɛyɨ gɔnɨ kaɨbhɨbha bɛyɔ. 19 Ibunu ma batʉ ba yimibho, mokibyogotʉ gɔnɨ kaiko pa imoti na bongingi ! 20 A bɛyɔ, mokibyogotʉ bɛ bamubhisi bosunzu, bibo mukumbo kunu, banalyalya ka gɔngʉ kunu, bamʉmɨna payaya na bamʉbɨtaga. 21 Na na suni kabɨkya yi : takɛgʉ ndɨ ibusu no ngu yɨgya bɛyɔ !

Luki limoti, nɨnɔ aka nɔ akwanana kaɨbhɨbha ka lɨkpʉmʉka limoti, ɨmɨ nagya mʉdɔngɔnɨ bɛgɛyɔ. Nakanzɨna abhɛ ngingi. 22 Batʉ bi nɨba ba Bebhelenia ? Ɨmɨ na gɔnɨ Muebhelenia. Ba Bɛzɛlɛlɨ ? Gʉtʉgʉ ɨmɨ aka na gɔnɨ Mʉɨzɛlɛlɨ. Ba ka lɨvananza ka Abhalama ? Ɨmɨ na kʉ-gɔ-kʉ. 23 Nakanzɨna mbɨya wanʉ abhɛ mʉtʉ yi nɨnɔ kɛgʉ na mʉ : ba bagya-ligubho ka Kilisito ? Ɨmɨ, na mʉgya-ligubho kakɨ kaʉkɨtaga byɨ. Nagya ndɨ mogubho mapʉpʉ makpʉ kaʉkɨtaga ɨbʉ, begwi nganga bɨkyɔ ka bhɔlɔkɔ kaʉkɨtaga ɨbʉ, nalya bhʉma bɨsʉsʉ kaʉkɨtaga ɨbʉ, nɨgɨlyagatʉ kaɨna kukwakʉ no miso. 24 Nganga kubukumuti, Bayudha bɛtɨnatʉ ndɨ pimbo batɛkɛbɛ basaa na kʉbɔmʉ+\fr 11.24 \ft Mobiso ma Ligiliki akabɨkya bɛ\fq batɛkɛbɛ bakwanganya katʉmba limoti\ft : bakakwananɨgʉ ndɨ kakɨtaga pimbo batɛkɛbɛ bakwanganya nɨyɔ ikpikogo ndɨ kʉsɔ wa kɨtabʉ ya Tomosyo 25.3.. 25 Balʉma bɛtɨnatʉ ndɨ pimbo nganga yɨsaa. Nganga yimoti, ba ndɨ bɛ bɛmwɨ na matamʉ. Todukonotʉ ndɨ gɔnɨ na ɨngbɔlɔ nganga yɨsaa, nganga yimoti, nolipyogotʉ, nasyɛ ka lɨmbɛngɨ lo libo. 26 Ka magʉndʉ kamɨ, nabhangana ndɨ na bʉkpɛkɨ-kpɛkɨ budhingi : tumo ko mobo, bonzikabʉ, bavakʉ-kamɨ Bayudha na batʉ nɨbɔ bakɛgʉ ndɨ Bayudha. Natʉ ndɨ gɔnɨ na bʉkpɛkɨ-kpɛkɨ ka bagʉdʉ, ka basyʉngbʉ, ko libo lidhingi, na lugo ka batʉ bi nɨbɔ bɨbɔgɔ ndɨ bɛ ba Bakilisito. 27 Nagyaga ndɨ ligubho lapʉ, ngbingo nagɔgɔ nazangagatʉ ndɨ tɔtɔ. Nganga bɨkyɔ, nɨmʉkanaga ndɨ nza, mʉsasa, nɨ luki lɨlya kɛgʉ. Nigyogyisogo ndɨ na bʉdhɨ no ndumbu. 28 Nakotwogigʉ makpʉmʉka masɨ. Pa imoti na nɨyɔ, masyɛ masɨ, lɨmbɛngɨ kamɨ asyɛgɛ ndɨ kʉgʉ wa Makanisa masɨ. 29 Mʉmbanzʉ kiko mʉpɔ, ɨmɨ na mʉpɔ gɔnɨ. Mʉmbanzʉ kɨga kumbuso ka bhaya, nalyaga kumbu kʉgbɛ.

30 Kiko bɛ nɨbhɨbhɨ, nɨbhɨbha ko bhulyo bʉpɔ kamɨ. 31 Kunzi nɨnɔ wa ɨbhɨbha ka bɛnzɛ na bɛnzɛ, Abhakɨ Mombukwono-dhosu Yeso akaibho bɛ nakɛgʉ kabɨkya bɔngɔ. 32 Wa na ndɨ mino ka Dhamasiki, ko ngbingo ka ngama mudhingi bɛyɔ ka Aleta, ngama wa iwili kakɨ ubhiso ndɨ bambanzʉ ko pumi ya gʉdʉ kyɛ begwi. 33 Luki limoti, bawai-dhamɨ bɛmakya ndɨ ka mʉmbɨ, besiso ndɨ pisi ka lidhilisa na muligi bɨyɛɛɛ kunzi wa gʉdʉ, naʉkaga ndɨ.