Pɔlɔ a na ɨgyagya kaigyogyiso ko bhulyo ka Kilisito
12
1 Kɛgʉ bɨnza kaɨbhɨbha, luki limoti nidhukulogotʉ kaɨbhɨbha aka. Nakanzɨna mbɨya wanʉ ka nɨlɔ Mombukwono-dhosu ewoniso ndɨ na nɨlɔ emibhiso ndɨ. 2 Namibhotʉ mukilisito bemoti, a kʉwa byanga tɛkɛbɛ na bɨkwanganya+\fr 12.2 \fq Mukilisito bemoti \ft : Mʉtʉ yi nɨ Pɔlɔ mombukwono-dhakɨ. – \fq byanga tɛkɛbɛ na bɨkwanganya\ft : A ngbingo yi nɨnɔ Pɔlɔ a ndɨ mino ka Talasɨ ikanɨ ka Atiokiya, kambwa wa lɨgʉndʉ kakɨ la mambwa lɨbɨkyaga Mongoni Manza. wa Kunzi adokiso ndɨ kadhwɛ kʉgʉ wa lɨsyɛ kʉgbɛ. Adokiso ndɨ na nzʉyi kakɨ ikanɨ lɨmbɛngɨ aka ? Nakibhigʉ ɨmɨ, luki limoti, Kunzi mʉkaka aka nɔ akaibho. 3 Nakaibho bɛ Kunzi adokiso ndɨ alʉkʉ yi nɨnɔ kadhwɛ ka Paladhiso. Nakabɨkya bata ambɛ nakibhigʉ ikanɨ Kunzi adokiso ndɨ na nzʉyi kakɨ ikanɨ lɨmbɛngɨ aka. Nakibhigʉ ɨmɨ, luki limoti, Kunzi mʉkaka aka nɔ akaibho. 4 Kʉ ka Paladhiso, alʉkʉ yi nɨnɔ ʉkana ndɨ mʉnzɨna mʉmbanga-mbanga nɨmɔ mʉtʉ wa lɨtɔmbʉ kɨkpʉndɨgʉ kaɨgɨlya kozukogo. 5 Nakwanana kaɨbhɨbha ko bhulyo ka inguwo ya mʉtʉ yi nɨnɔ. Luki limoti, ɨmɨ, nɨbhɨbha ko bhulyo bʉpɔ kamɨ aka. 6 Nakapa kaɨbhɨbha, nakikigʉ bi abhɛ ngingi, kyɛ nabɨkya bi lɨngʉnʉ aka. Luki limoti, nakɛgʉ kapa kagya bɛyɔ kyɛ bakɛvɔnitɔgʉ abhɛ mʉtʉ mudhingi bɛyɔ bo mino kɛmɨna ikanɨ bɛyɔ bo mino kɛmʉkana. 7 Kakya bɛ nakikoni na yɨbhɨnɨka ko bhulyo makpʉmʉka mʉmbanga-mbanga nɨmɔ bewoniso ndɨ, bɛmakyatʉ ndɨ luki la mʉzʉzʉla ka nzʉyɨ. Luki li nɨlɔ a abhɛ malaika ka Abhɨlɨ nɨnɔ batikoku ndɨ kɛbhʉma kyɛ nakikonitɔgʉ na yɨbhɨnɨka. 8 Nɨtatanaga ndɨ na Mombukwono-dhosu nganga yɨsaa kyɛ ɛkʉlagɨ ka yigyogyiso yi nɨyɔ. 9 Luki limoti, esikisyo ndɨ bɛ : « Ɨzɨyɔ kamɨ yɔ okwononi na ɨwɛ. Ngu kamɨ inisogo bɨngbanganya nɨ wa kʉsɔ wa bʉpɔ. » Okwononi bɛ nɨbhɨbhɨ pisi ka bʉpɔ ibha ngu ka Kilisito iki kʉgʉ kamɨ. 10 Kinili, nogwogo magyagya kʉsɔ wa bʉpɔ, mosikoni, bʉkpɛkɨ-kpɛkɨ, yigyogyiso na ko kumbu nɨyɔ nalyaga ko bhulyo ka Kilisito. A bɛyɔ, ngbingo yi nɨnɔ no mino kʉsɔ wa bʉpɔ, a ngbingo yi nɨnɔ gɔnɨ nɔ nikogo mino no ngu.
Kʉbangakʉ ka Pɔlɔ ko bhulyo ka Bakolito
11 Nakanzɨna kʉwa abhɛ mʉtʉ wa ibhikyasʉ, ibunu bɔ meitiso bɛyɔ na mapʉpʉ. Ibunu bɔ makwanana bi kɛbhɨbha. A bɛyɔ, gʉtʉgʉ bɛyɔ nakɛgʉ mino na ɨzangɨya yi, nakɛgʉ yɨpɛpɛ kusili ka batʉtʉmbwa nɨbɔ mʉmɨnaga abhɛ batʉ ba ɨzangɨya. 12 Mogubho nɨmɔ nagya ndɨ kowoniso bɛ na atʉtʉmbwa, igyonoso ndɨ kʉ ku kunu pisi ka adalʉ mʉnda kamɨ. Mogubho mi nɨmɔ a ndɨ mokingyosi, makpʉmʉka mʉmbanga-mbanga na nɨmɔ mudhikiso nɔkʉ. 13 Luki tino lɔ nakamʉgyɨlagʉ ndɨ lanza bɛyɔ nakagyagʉ ndɨ mino ka makanisa magɔgɔ ? A asɨ ko pisi yimoti aka nɨyɔ nakamubhinikisogʉ ndɨ mino buti kamɨ. Ipilyonitɔ ka nɨlɔ !
14 Mbɨya yi nɨmʉ, nawakɨtʉlya kaɨnda bata kʉ kunu ka nganga ya yɨsaa. Makabhɨnɨkɨgʉ buti kamɨ bɛgɛyɔ. Nakɛgʉ na mʉsasa ma mukumbo kunu, luki limoti, na na mʉsasa kunu bamombukwono-dhonu. A bɛyɔ, kɛgʉ bomiki bɔ bʉkɨsɨlyaga babʉkʉta kabʉ buyi, luki limoti, nɨlɔ a ligubho ka babʉkʉta. 15 Ɨmɨ, niko na ɨgyagya kalʉpyaga masɨ nɨmɔ na nomu na kaɨpá ɨmɨ mombukwono dhakɨ ko bhulyo kunu. Kiko kanɨ namuponi kʉgbɛ bɛyɔ, mɛmʉya kʉwa bata ɨmɨ mʉmʉya ?
16 A bɛyɔ, mokwononi kabhaɨlya bɛ nakamubhinikisogʉ ndɨ ɨmɨ buti kamɨ. Luki limoti, batʉ budhingi bɨnaga abhɛ na mʉtʉ wa bɔngɔ, abhɛ ninisono ndɨ na ibunu pisi ka bokoli. 17 Ambɛ, mʉtʉ tino nɔ natɨka ndɨ kamʉbɔ, kamʉmʉla mukumbo ko lino kamɨ ? 18 Nɨtatanaga ndɨ na Tito bɛ ɨndɨ kʉ kunu, natɨka na momosu wagɔgɔ bemoti. Ambɛ, Tito amubulisyotʉ ndɨ, ava buyi kunu ? Takɛgʉ mbɛyɨ ndɨ na ɨyɨ na mʉtamanagɨ mumoti ? Takabyɛgʉ ndɨ na ɨyɨ pisi yimoti aka ? 19 Ambɛ, katʉkya ka bʉndɛlɨ masɨmaga bɛ takɨsaga kaɨsasambya bɛkyɛ tinisoni abhɛ batʉ banza ko miso kunu ? Kɛgʉ bɛyɔ ! Tanzɨnaga kambwa ko Kunzi pisi ka Yeso-Kilisito. Bomika-mama, tamʉbɨkyaga masɨ mi nɨmɔ kamupiko ka bhaya.
20 A bɛyɔ, na na kʉbangakʉ bɛ ngbingo yi nɨnɔ nosilo banʉ mino kʉ kunu, nakamutokonyonitɔgʉ nɨ kɛgʉ bɛyɔ no mino kapa. Ibunu gɔnɨ nɨ makɛminigʉ bɛyɔ mo mino kapa. Na na kʉbangakʉ kamʉtakanya kʉsɔ wa mosooni, imi, mambɛngɨ mʉkandɨkanaga, yɨgbananaga, kabʉkʉlyana makpʉmʉka, nzɨnzɨnyana, yɨbhɨnɨka na ka bʉnzɛngɛ-nzɛngɛ. 21 Na gɔnɨ na kʉbangakʉ bɛ ka lɨgʉndʉ kamɨ lagɔgɔ kʉ kunu, Kunzi kepónitɔgʉ suni kambwa kunu. Nakwanana kʉwa kalya kumbu ko bhulyo ka batʉ budhingi nɨbɔ bakaidhukulogo kagya bʉnyɛ bɛyɔ aka yɔ bagyaga ndɨ mino. Batʉ bi nɨbɔ bakonosigʉ kagya makpʉmʉka manyɛnyɛ, ba mbɛyɨ bata kʉsɔ wa mʉsʉgʉ aka, bʉdanda na kagya bɛyɔ bobhoilyi mino.