Pɔlɔ akaamalya ligubho kakɨ
10
1 Bambanzʉ babɨkyaga bɛ ɨmɨ Pɔlɔ, nikogo abhɛ mʉtʉ wa kʉbangakʉ kanɨ na lugo kunu, luki limoti, nakiko byɨ na ibunu, nanzɨnaga na dɨya. Nakamʉkʉnga pisi ka butombii na bʉnza ka Kilisito ambɛ, 2 kikiliki, makediisonitɔgʉ wa nosilo mino ku kunu. A bɛyɔ, nikotʉ mʉdɨya na batʉ nɨbɔ batamanaga bɛ tagyaga ligubho abhɛ batʉ ba lɨtɔmbʉ. 3 A lɨngʉnʉ bɛ ta bambanzʉ, luki limoti, takabhʉmanagɨgʉ abhɛ batʉ ba lɨtɔmbʉ. 4 Makpʉmʉka ma bangʉ mi nɨmɔ tabhʉmanaga na imu kɛgʉ nɨmɔ bambanzʉ botwo. Luki limoti, a nɨmɔ mo ngu ko Kunzi, akwanana kagyogyiso mumuyoniso. Takobhumoniso tamanaga yanyɛ, tobhumoniso 5 gɔnɨ lɨkpʉmʉka lasɨ la kɨbhɨbha nɨlɔ akolutono na yimibho ko Kunzi. Takoikoiso tamanaga ka bambanzʉ kyɛ babangɨ Kilisito. 6 Ngbingo yi nɨnɔ kʉbangakʉ kunu inisono mino bɨngbanganya, tiko kʉwa bakɨtʉlya kaʉpá batʉ ba mʉ mapʉ azabʉ.7 Gyoni angɛ ka makpʉmʉka ! Mʉmbanzʉ kɛbɨkya bɛ a ka mutili ka Kilisito, okwononi obhisi mʉtamanagɨ ka lɨkpʉmʉka li nɨlɨ : kiko nɨ a ka mutili ka Kilisito, ibusu ta kʉ gɔ kʉ ! 8 Kunzi atɨpá ndɨ bʉngama kamupiko kʉsɔ wa bhaya, kɛgʉ kamumigiso kumbuso. Niipogo ikubhasʉ kʉgbɛ ka lɨkpʉmʉka li nɨlɔ nɨ nakɛgʉ mino no suni. 9 Nakɛgʉ kapa ambɛ winoni abhɛ nakiko kamubongiso na babhalʉwa kamɨ. 10 A bɛyɔ, batʉ bagɔgɔ babɨkyaga bɛ : « Babhalʉwa ka Pɔlɔ ba bapʉpʉ na bo ngu, luki limoti, ɨyɨ mombukwono-dhakɨ yi kiko lugo kusu, kikogigʉ no ngu, mʉnzɨna kakɨ ikogo ma payaya gɔnɨ. » 11 Mʉtʉ yi nɨnɔ akanzɨna bɛyɔ, ibhito lɨkpʉmʉka li nɨlɨ : iki lɨkpʉmʉka nɨlɔ tokpiki nɨ ta byɨ ikanɨ nɨlɔ tagya ndɛkɛ nɨ ta kʉwa lugo kunu, kɛgʉ na budhidhidhi.
12 A bɛyɔ, takakwananigʉ bi kaipimo ikanɨ kaikingyoso abhɛ batʉ nɨbɔ bɨbhɨnɨkaga ɨbʉ bamombukwono-dhabʉ bi. Ba bongingi, bipimogo nɨ ɨbʉ aka, banikingyoso ɨbʉ bamombukwono-dhabʉ bi. 13 Ibusu, takiipigʉ kubhatʉ kakɨtaga kʉgbɛ. Luki limoti, takɨsaga kaamalya ka piki nɨnɔ aka nɔ Kunzi atɨpá ndɨ nɨnɔ akatɨtɨka kadhwɛ ku kunu. 14 Takɛgʉ kasɨda mʉlɨlɨ kusu, iko bi bɛyɔ kiko ndɨ nɨ takadhwɛgʉ ndɨ ku kunu. A bɛyɔ, ta ndɨ batʉ ba mambwa kosilo ku kunu kamʉbɨkyaga Mongoni Manza ka Kilisito. 15 Takibhibhigʉ ko bhulyo ya ligubho nɨlɔ batʉ bagɔgɔ bagya kyɛ takabuulyogo piki yi nɨnɔ aka nɔ batɨpá ndɨ. Luki limoti, ta na mʉtamanagɨ bɛ bhaya kunu idhukulogotʉ, takwanana kʉwa kagya mogubho dhidhidhi lugo kunu kabyɛnɛnɛ na piki nɨnɔ batɨkʉlya ndɨ. 16 Kʉwa wa, takwanana kabɨkyaga Mongoni Manza ka bɛwili bi nɨbayɔ byɨbyɨ-byɨ na ibunu nɨ takɛgʉ kaɨbhɨbha na masɔlɔ ma ligubho nɨlɔ batʉ bagɔgɔ bagya ndɨ ka bopiki kabʉ.