Tesa-tesa i Agur ana i Yake
30
Hitumo tesa petevai noto nidekei nTupu ka i Agur ana i Yake.“O Alatala, nalenge mpuumo nirasaiku, domo ria roso nggaroku!
2 Nadoyopa yaku pade manusia ntanina,
domo nipahaku nuapa-nuapa.
3 Ledo muni nipeguruku noto,
sampe ledo nisaniku isema Alatala.
4 Ledo ria saitoa neore hau ri suruga bo nanjili mpanjili tumai ri dunia [manguli anu nikitana hamai].
Ledo muni ria saitoa anu nompakule nombatipale poiri.
Ledo ria saitoa namala nombadika uve ri kulimu, bo ledo muni mamala tona nombabungu tasi nte kae.
Ledo ria saitoa namala nompataka pantaa-pantaa nu dunia.
Ane maria, uli ka yaku,
isema sangana bo isema sanga nu anana?”
5 Pura-pura tesa nu Alatala mpuu-mpuu nakana,
Ia nombajagai tona anu netalendu nte Ia nasimbayu eva kaliavo nombalenduti tona.
6 Nemo ratambai tesa nTupu,
ala iko ledo ratuenakaNa bo rauli topodava.
7 O PUE, poiyomo perapiku,
rongaya kuperapi nte Komiu dopame yaku mamate:
8 Nemo sampe yaku mebagiu bo modava.
Nemo sampe yaku mapakasi bara makalumana.
Dekeimo ka yaku aga anu niparaluuku.
9 Sabana, ane yaku makalumana, bara domo kusarumaka Komiu
bo aga manguli: Isema TUPU?
Bo ane yaku mapakasi, yaku bara mangangga
bo mompakadaa sanga nu Alatala nisombaku.
10 Nemo mompanavu batua ri ngayo ntona nompobatua ia,
ala ia ledo mombapindasi iko, bo iko mandasa sabana kasalamu haitu.
11 Naria tona nombapindasi tuamana,
bo ledo nombatoiya tinana.
12 Naria muni tona nisarumakana karona ledo nasala,
tapi ia nadosa bo mpuu-mpuu naruto ri panggita nu Alatala.
13 Naria muni tona nisarumakana ia mpuu-mpuu nabelo,
bo nipekirira tona ntanina ledo ria batuana.
14 Naria muni tona ntanina natuvu nangagosi mbara-mbara ntona napakasi bo tona nandasa.
Ira nasimbayu eva binata nasese anu nesaka ante ngisina natada mpo guma bara ladi
bo nangandesi pakaupu anu nisakana.
Ira nangalasi mbara-mbara ntona nipandasa,
bo tona napakasi ri dunia.
15 Topangakua nasimbayu eva linta nosumba ntimali,
ntimali-mali sumbana ledo ria kabasa-basana nombatomisi raa.
Mpengaya-ngaya anu ledo ria kabasa-basana,
naria patangaya nanguli, “Dopa nagana.”
16 Haitumo, ponturo nu malaeka ntomate,
mombine nagampa madota moana,
tana nabai paraluu uve,
bo apu njuu-njuu navaya.
17 Tona nompongeika tomana bo ledo neose nte tinana,
mboana aga rakande ntonji mpangande matepudu
bo matana rateo ntonji kalikoa.
18 Naria mpengaya-ngaya anu nipokumaakuka.
Naria patangaya ledo nipakuleku nombapaha.
19 Berimbana tonji rajawali namala nevoro ri laerava,
berimbana ule namala nenjoyo ri vatu dapala,
berimbana kapala ntasi namala nodala ri tatanga ntasi,
bo berimbana kabilasa nte randaa namala nosipokono.
20 Iveimo dala mpokainggu mombine mpobualo:
naupu nobualo, ia hau nandiu nompakagasa karona,
bo nanguli, “Yaku ledo nokainggu nadaa.”
21 Naria mpengaya-mpengaya anu nakaja ratarima ntona,
bo patangaya ledo nesua ri akala, iamo:
22 ane saito batua majadi magau,
bara tona nadoyo ntoto majadi makalumana,
23 bara mombine ledo nipokono ntona sabana ingguna ledo nabelo, tapi kaupuna noberei muni,
bara saito mombine nipobatua mangagosi nturo mombine nompobatua ia.
24 Naria mpengaya-ngaya binata nakodi mpuu ri dunia,
patangaya mpuu-mpuu natau, haitumo:
25 Soyo binata ledo naroso,
tapi nompasadia pangande tempo napane rakandena tempo nauda.
26 Pelanduk binata nakodi bo ledo naroso,
tapi novia jumuna ri dapala.
27 Nggaboro binata ledo ria magauna,
tapi nasinente nobaresi.
28 Soso ledo nakaja rasaka,
tapi naria muni ri banua nu magau.
29 Mpengaya-ngaya binata nalanggai polipana,
patangaya anu nabelo poegona nolipa, haitumo:
30 Singa, binata narosopa pade binata ntanina,
anu ledo noura nau bara nuapa ri ngayona.
31 Manu tongge bara tovau lakina nolipa nompopakita biana,
bo magau anu nolipa nompopakita kaogena ri ngayo ntodeana.
Tona nadoyo tantu mompopeumba posisala
32 Ane iko mombaoe karomu mboto, bara monia madaa,
taamakamo bo pekirikamo nuapa nipoviamu.
33 Ane susu japi ragayumiu njuu, natantu majadi mantega.
Ane onge ntona rajagurumiu, natantu mesuvu raa.
Ane rapakaraumiu rara ntona,
natantu majadi posibaga.