29
Tona mpenggani-ngganimo nipangajari, tapi batena nakaa bagana,maria tempona madaa mpuu katuvuna bo domo rapakulena mabelo mpanjili.
2 Ane tona nabelo majadi pakeni, masana mpuu rara ntodea,
tapi ane tona nadaa momparenta, mantangau mpuu todea.
3 Tona anu nompokono noto dako nte Alatala nompakasana rara ntotuana.
Tapi tona anu nipokonona hau nte mombine nompobalu karona, nompakaupu kakalumanana.
4 Ane magau manoa momparenta, maroso ngata niparentana.
Tapi ane aga doi rapekirikana, magero ngatana.
5 Isema motesa mamomi nte patuju nadaa mombatoliani singgamanusiana,
ia mboto matetoliani.
6 Tona nadaa matetoliani sabana pokainggu nipoviana,
tapi tona nabelo modade bo movoo-voo madamba.
7 Tona nabelo nisanina anu masipato majadi bagia ntona napakasi,
tapi tona nadaa ledo nipahana.
8 Topesayu nompakagado ngata,
tapi tona nanoto pompekirina mamala mompopoura rau rara.
9 Ane tona nanoto pompekirina ratangara nte tona nadoyo,
tona nadoyo aga nonasu, nepongirika bo ledo natinonto.
10 Tona nagasa rarana nipovuu mata ntopepatesi,
tapi nisaliku ntona nanoa.
11 Tona nadoyo nompopakita bilisina,
tapi tona nanoto pompekirina, nosabara bo namala nombaura rau rarana.
12 Ane riara poparenta, pakeni aga momparantaika tesa dava,
pura-pura topokarajaa ka ia majadi madaa.
13 Tona napakasi bo topepandasa nasimbayu,
sabana TUPU pura nombadekei katuvua ka ira.
14 Magau anu nanoa nombatangara tona ledo nompakule,
masae ia momparenta.
15 Peboba bo pangajari nompakanoto pekiri ntona,
tapi ngana anu nipalamba nangoseaka dotana mboto, nompakaeya tinana.
16 Ane tona nadaa mantambai kadeara, mantambai muni kadaa,
tapi tona nabelo manggita ira manavu.
17 Patudukimo anamu, jadi ira mompakatinonto raramu,
bo mompakadamba raramu.
18 Ane todea ngata ledo rakeniaka nu Alatala, magado mpuu katuvura.
Tapi masana mpuu tona anu nangoseaka Atura nu Alatala.
19 Batua ledo mamala rapatuduki aga nte tesa nggo,
sabana nau nipahanamo, ledo niparantaikana.
20 Nabelopa vai tona nadoyo,
pade tona bobompotesanamo tapi ledo nipekirina ntani ruru.
21 Isema naliu gaga pompotovena batuana dako ri kamudaname,
nompakajadi batuana haitu nakaa bagana.
22 Tona nasarau nompopeumba posisala,
bo tona nasanasu, nadea katasalana.
23 Tona nalanga rarana ledo rabila,
tapi tona naede rarana, ratoiya.
24 Isema nomporoa topangangga, nompovuu karona mboto.
Sabana ane ia menoa ri potangara, ira rahuku.
Tapi ane modava ia, ia rahuku nu Alatala.
25 Ane kita aga maeka nte manusia, masala nggadunggu kita,
tapi ane kita momparasaya TUPU, Ia mombajagai kita.
26 Nadea tona madota mangala rara ntopomparenta,
tapi aga TUPU topotangara nanoa.
27 Tona nabelo ledo nompokono tona nadaa.
Tona nokainggu nanoa nipovuu mata ntona nadaa.