28
Tona nadaa pokaingguna mangova nalai naupa ledo ria tona nombaraga ia.Tapi tona nabelo nasimbayu eva singa, ledo ria eka rarana.
2 Posimpobali ntodea ngata nompakadea pakenira,
tapi ane pakenira natau bo nanoto pompekirina, masae poparentana.
3 Tona napakasia anu nompakasusa katuvu ntona napakasipa pade ia,
nasimbayu mpo uda romba nompakagero pura tuda-tuda ri talua.
4 Tona anu nangoseaka Atura nu Alatala, nangeva tona nadaa.
Tapi tona ledo nombabila huku nu Alatala, nombabila tona nadaa.
5 Tona nadaa ledo nipahana kanoa,
tapi tona anu nangoseaka TUPU mpuu-mpuu nisanina kanoa.
6 Agina mapakasi tapi matuvu manoa,
pade makalumana tapi natenggo rara.
7 Ngana muda anu nangoseaka atura, nanoto pompekirina,
tapi ngana muda anu nosimporoa nte tona ledo nokainggu nabelo, nompakaeya totuana.
8 Tona nombatambai kakalumanana ante dala nompopobunga pakadea doina ka tona ntanina,
kakalumanana haitu raala ntona bo rapakera mombatulungi tona napakasi.
9 Ane komiu ledo mangoseaka Atura nu Alatala,
mavuu mataNa nte posambayamiu bo ledo rapetalingaiNa.
10 Isema nompakasalandala tona natuvu nanoa,
ia mboto masalandala.
Tapi tona nagasa rarana matuvu masana.
11 Tona nakalumana nirasaina ia nanoto pompekirina.
Tapi tona napakasi anu nanipi rarana, nisanina inggu ntona nakalumana haitu.
12 Ane tona nabelo majadi pakeni, pura-pura tona masana.
Tapi ane tona nadaa majadi pakeni, madea tona aga metabuni.
13 Isema mombatabuniaka pokainggu ledo nabelo, ledo masana katuvuna.
Tapi isema mombanoana bo domo rapoviana hanupa, ia rapoasi mata nTUPU.
14 Masana mpuu tona anu batena neose nte TUPU.
Tapi tona ledo nadota neose, ia rakava nu silaka.
15 Mompakaviora rara mpuu, ane tona nadaa nomparenta todea anu ledo nompakule,
nasimbayu eva singa nompopaepe suarana bara beruang mebaga.
16 Pakeni anu ledo ria noto mpekirina, mpuu-mpuu nepandasa,
tapi pakeni anu nompovuu mata pokainggu natenggo, masae momparenta.
17 Topepatesi ledo matinonto sampe ri kaupu nggatuvuna.
Ledo ria saitoa mamala mombatulungi ia!
18 Tona nagasa rarana masalama.
Tapi tona nokainggu natenggo sampesanika rakava nu silaka.
19 Isema mombakarajaa tanana magana anu rakandena,
tapi tona aga nombaraga anu ledo noguna mapakasi katuvuna.
20 Tona anu nanoa rarana manggava rasi dako nte TUPU,
tapi tona anu madota masalisa makalumana [ante dala ledo nabelo], kana rahukuNa.
21 Ledo nabelo topotangara mompelenje,
tapi naria muni topotangara nokainggu ivehaitu ala ia manggava doi sogo, nau aga sakide.
22 Tona nasina nompari-mpari nombaraga kakalumana,
tapi ledo nisanina ia aga majadi mapakasi ngena.
23 Rabilapa tona nombatuenaka pokainggu nasala,
pade tona anu aga nanguli tesa petoiya ka ia nau pokaingguna nasala.
24 Isema nompelea mbara-mbara ntotuana, bo nisarumakana pokaingguna haitu ledo madosa,
ia nireke topangangga nggaraka.
25 Tona namumusa nompopeumba posinggarau,
tapi isema nomparasaya TUPU radekeika rasi.
26 Isema nanjarumaka panggava mpekirina mboto, ia nadoyo.
Tapi isema nangoseaka pepatuduki noto dako nte TUPU, ia masalama.
27 Isema nombatulungi tona napakasi, ledo mapepa katuvuna,
tapi isema ledo nompeili tona napakasi, ia rapindasi.
28 Ane tona nadaa momparenta, rapetabunika ntona,
tapi ane ia manavu dako ri pomparentana, madea mpanjili tona nabelo.