27
Nemo motesa mangoe ka anu rapoviamiu kamailena,sabana ledo nisanimiu nuapa majadi ri eo haitu.
2 Nemo mombatoiya karomiu mboto
aginamo tona ntanina bara tona ledo nisanimiu
mombatoiya komiu.
3 Nau nantamomo vatu bo bone,
nantamopa dua nu rara nipovia ntona nadoyo.
4 Nau nandasa nantingayo tona nasarau,
tapi nandasapa mantingayo tona nasasiri.
5 Nabelopa petuenaka rauli nggamata,
pade tove aga ratabuniaka.
6 Nabelopa mantalingai pepatuduki nu roa nau tesana nompakadua rara,
pade mantalingai tesa namomi a niuli ntona nompovuu mata kita.
7 Ane tona nabosumo taina, nau manisa nipoaranamo.
Tapi tona naara, nau anu napai, narasa puramo nikandena.
8 Ane tona nalai dako ri banuana, [bara masala nggadunggu ngena]
nasimbayu eva tonji nipalaikanamo jumuna.
9 Pepatotosi nabelo niuli nu roa, nompakasana rara,
nasimbayu eva lana navangi soana, nompakasana rara nangengana.
10 Nemo mukalingasi roamu bo roa ntomamu.
Ane komiu manggava kasusa, nemo hau ri banua nu sampesuvumu nakavao,
aginamo komiu merapi tulungi nte tona nosinjori nte komiu.
11 Anaku, pegurumo ala manoto pompekirimu, haitu mompakasana raraku
ane maria tona mangulisi iko mompakaeya yaku, mamala yaku mesana ka ira.
12 Tona natau nompekiri rapetalilikana anu mompakasilaka ia,
tapi tona dopa nisanina gaga nanjaruavu, sampe ia nasala nggadunggu.
13 Alasimo pakea ntona anu nojanji mombayari inda ntona ntanina,
bo alamo mbara-mbara rapotagala indana, sampe rabayarina inda haitu.
14 Isema mpadondo mpisina manguli petabena ante suara mamangga,
ia rareke nepindasi, ledo nombadekei rasi.
15 Mombine nipokonona nosinggarau,
nasimbayu eva suara nu uve uda natiti ledo ria kaupu-upuna.
16 Isema mombataamaka mombine haitu motesa,
nasimbayu eva tona mombataamaka poiri bo mombakakamu lana.
17 Ase namala nompakatada ase ntanina,
ivesia muni tona namala nompakatada pekiri ntona ntanina.
18 Isema mompasiayu kayu mpovua, iamo mangande vuana,
bo isema mokarajaa pakabelo ka tona nompobatua ia, ia rabila.
19 Uve namala nipompevayota rapanggitata lenjeta,
ivesia muni inggu nu manusia, namala rapompeintata rarana.
20 Ledo ria kaosa rara nu manusia,
nasimbayu eva dunia ponturo malaeka ntomate ledo naponu-ponu.
21 Bulava bo salaka niuji ante apu rapompeinta kagasana
ivesia muni rara ntai nu manusia niuji ante petoiya nidekei ka ia.
22 Naupa komiu mombaboba tona nadoyo mpo tona nombayu pae,
komiu ledo mamala mompakalipo kadoyona.
23 Parantaika pakabelo bimba bo tovaumu,
pasiayu pakabelo binata patuvuamu haitu,
24 sabana kakalumana ledo maria sampe kasae-saena,
bo pomparenta magau ledo muni sampe kasae-saena.
25 Soemo kavoko ranggarava bo ri bulu.
Pasiromumo mompopea moloo mpanjili.
Kavoko nisoe raboli rapakande ka binatamu,
26 ala maria njuu bulu bimba rapovia pakeamiu
bo tovau-tovau lakina mamala rapobalu rapangali talua.
27 Susu ntovau magana majadi kandeamiu sambanua
bo kandea ka pura-pura tona nokarajaa ri banuamiu.