26
Tona nadoyo ledo mesua ri akala rabila ntona,nasimbayu eva uda bara salju ledo mesua ri akala manau ri tempo nggapane eo.
2 Pepindasi ledo mambela tona anu ledo nasala,
pepindasi haitu nasimbayu eva tonji aga nevoro hau tumai ledo netuu.
3 Tona nadoyo kana raboba,
nasimbayu eva keledai bo jara kana rasama bo racambu.
4 Ane mompesanaka tona nadoyo masindara nte kadoyona
komiu masimbayu mpo ia.
5 Ane tona nadoyo rapesanaka nasindara nte kadoyona,
rasaninamo ia tona ledo nanoto pompekirina.
6 Tona nombasuro tona nadoyo manggeni petevai,
nasimbayu eva nombakotosi kadana mboto
bo mompakasala nggadunggu karona mboto.
7 Nakaja tona nadoyo mombatesa petevai noto,
nasimbayu eva ntona napunggu nolipa.
8 Tona anu nombabila tona nadoyo,
nasimbayu eva tona nompou vatu ri suvai.
9 Ledo nakana mpetuu ane tona nadoyo mombatesa petevai noto,
nasimbayu eva tona nalimpuno nombasubiti timpo anu nombatosu palena.
10 Isema mombagaji tona nadoyo bo tona ledo nisanina,
nasimbayu eva topopana mompakabaka isema-sema noliu.
11 Tona nadoyo mombasili mpanjili kadoyona,
nasimbayu eva asu nombadila mpanjili luana.
12 Da nabelopa vai tona nadoyo,
pade tona nombasarumaka ia nanoto pompekirina.
13 Tona namau nanguli, “Naria singa, rapatesina yaku ri tatanga dala.”
Haitu akalana ala ia aga ri sou, namau rarana mokarajaa.
14 Tona namau goli hau goli tumai ri paturuna,
nasimbayu eva vamba niungge bo nitutui.
15 Tona namau nasimbayu mpo tona ranjurayamo palena,
tapi namau pura rarana mombalinjo kandea hau rangangana.
16 Tona namau nirasaina nataupa ia,
pade papitu tona anu natau nesana nte noto pompekirina.
17 Tona anu nombagalo posisala ntona ntanina,
ia nasimbayu nte tona nombasaka talinga nu asu vura anu noliu.
18-19 Tona nombadavai singgamanusiana,
anu nanguli, “Yaku aga nongei”
nasimbayu nte tobaya anu nomoreka pana apu bo pana mepakamate.
20 Ane domo ria kayu, mapayamo apu.
Ivesia muni ane topanggeni tesa domo ria, domo muni maria posinggarau.
21 Tona nipokonona nosisala nompakapane tona ntanina,
nasimbayu eva kayu bo ruti nompakarega apu.
22 Tesa nompanavu tona ntanina narasa niepe,
nasimbayu eva kandea narasa nikande.
23 Tesa-tesa namomi tapi nonia mebagiu,
nasimbayu mpo kura tana nipakagaya nte salaka.
24 Tona nepovuu mata, aga davana notesa nabelo,
tapi riara ntaina aga pebagiu.
25 Ane ia motesa mabelo nemo raparasaya,
sabana aga vuu mata naria riarana.
26 Nau berimba ia mombatabuniaka vuu matana,
tapi tona mompeinta pokainggu nadaa nipoviana.
27 Isema mombakae lovu ka singgamanusiana ia mboto manavu riarana.
Isema mombaduliaka vatu ala mombarumpisi tona ntanina, ia mboto rarumpisi vatu haitu.
28 Nombadavai tona ntanina nasimbayu nte nompovuu mata ia,
bo tesa namomi aga mepakagero.