Petevai noto ntanina nitulisi i Salomo
25
Hitu muni bara sakuya petevai noto dako nte Alatala anu nitulisi i Salomo, nipasiromu ntona anu nokarajaa ka i Hizkia, magau Yehuda.2 Alatala nibila ntona sabana anu nipoviaNa ledo nikava mpekiri manusia,
magau nibila ntona sabana ia nompakalanto anu dopa nisani ntona.
3 Ledo ria tona nompakule noukuru kandala nu tana bara kalanga nu langi.
Ivesia muni pekiri nu magau, ledo ria tona nangisanina.
4 Ragonusi ntanimo ruru salaka mombalelaka tagarana,
pade tuka salaka mamala movia salaka haitu majadi mbara magaya.
5 Popalai pura topombadekei panggava anu nadaa dako ri banua kamagaua,
pade magau manoa momparenta.
6 Nemo iko mompakalanga rara tempo mosanggani nte magau.
Nemo iko monturo ri ponturo ntomaoge.
7 Mabelopa mompopea magau mombadekei ponturo anu nibila ka iko.
Nemo-nemo iko ratuduna mombadekei ponturomu ka tona nalangapa nturona pade iko.
8 Nemo komiu kaliu-liu hau ri potangara manguli anu nipeintamiu,
sabana ane sabi ntanina makava manguli komiu nodava,
aga majadi eya matamiu bo ledo ria nuapa-nuapa mamala rapoviamiu.
9 Ane komiu mosisala ante roamiu, pakaupu mbotomo posisalamiu.
Nemo mutesa ka tona ntanina nuapa niposisalakamiu,
10 ala nemo iko rauli ntona topanggeni tesa,
bo madaamo sangamu ri mata ntodea sampe ri kaupu nggatuvumu.
11 Tesa pepatuduki nabelo niuli ri tempona, mpuu-mpuu noali,
nasimbayu eva dula salaka nirandu bulava.
12 Pepatuduki ntona nanoto pompekirina, noali mpuu ka tona anu madota mantalingaina,
nasimbayu eva dali bulava bo ramba-ramba bulava nagaya.
13 Suro niparasaya, nompakasana rara ntona nombasuro ia,
nasimbayu eva uve ranindi niinu ntoposoreaka asele mpovia tempo napane eo.
14 Tona nojanji mombadekei bara nuapa ka tona ntanina, tano ledo nidekeina,
ia nasimbayu eva ravana nagombu bo napoiri tapi ledo ria udana.
15 Ane iko mosabara bo motesa malusu,
iko mamala mombabaliki pekiri ntomaoge bo tona anu ledo nadota nangepe tesamu.
16 Ane komiu manggava manisa, nemo da maria da mukande,
nemo dagi ogena mukande, malenggavu raramu.
17 Nemo masaro gaga iko manjayo hau ri banua nu roamu,
ala nemo masau rarana bo mompovuu mata iko.
18 Ane komiu mombarai roamiu ante tesa dava,
nasimbayu eva komiu nombaboba ia, bara nombatimbe ia, bara nombapana ia.
19 Mombasarumaka tona anu ledo mamala raparasaya ri tempo nggasusa,
nasimbayu eva nanggangia ante ngisi nolejumo bo molipa ante kada nalopu.
20 Tona mompopaepe dade damba ka tona nabuku rarana,
nasimbayu eva tona nombavonjusi bajuna tempo narandi, bara nombadika anu mpoi ri bakana.
21 Ane balimiu maara taina, dekei ka ia pangande,
bo ane mabai tambolona, dekei ka ia uve rainuna.
22 Ane rapovia belo ka ia, maeya mboto matana [sabana nadaa rarana nte komiu],
bo TUPU mombadekei rasi ka komiu.
23 Poiri naranindi sumoana, biasana nanggeni uda,
ivesia muni posintutu, biasana novia rau rara.
24 Aginapa monturo saito ri kalinona,
pade mosambanua ante mombine nipokonona nosinggarau.
25 Nangepe kareba belo dako ri ngata nakavao,
nasimbayu eva uve ranindi nompakaosa bai ntambolo.
26 Tona nabelo anu nekou nte tona nadaa,
nasimbayu eva mata nu uve nagasa najadi natagara bo nakora.
27 Ledo nabelo maoge gaga mangande manisa.
Vesia muni tesa petoiya ka tona, ledo nabelo madea gaga rauli.
28 Tona ledo nipakulena nombataamaka rau rarana,
ia nasimbayu eva ngata ledo nobente, ledo nakaja rasuaki balina.