Pepatuduki noto kasapulu sasiona
24
Nemo masiriati manggita katuvu ntona nadaanemo mpuu komiu mosimporoa nte ira.
2 Ira aga nompekiri berimbana mompandasa tona
bo aga nombatesa berimbana movia kagado.
Pepatuduki noto karopuluna
3-4 Tona nanoto pompekirina, natau nompekiri bo nanipi rarana
namala nompopeangga pobanua naroso,
nadea tombi-tombina niisina mbara-mbara nagaya bo noali.
Pepatuduki noto karopulu bo sanguna
5 Tona nanoto pompekirina bo tona nadea katau ri pekirina,
nakuasapa pade tona naroso pokarona.
6 Dopame komiu hau mosieva, ala ntanimo ruru pepatotosi nakana sunju.
Ane madea tona mombadekei pepatotosi, natantumo bara padagi komiu riara mposieva.
Pepatuduki noto karopulu bo randuana
7 Ledo ria santingoa tesa ntona nadoyo tempo todea nasiromu mombatesa anu nopoko,
apa nakaja mpuu noto pompekiri rapaha ntona nadoyo.
Pepatuduki noto karopulu bo tataluna
8 Isema nasaro novia nia nadaa,
ia rauli ntona topegado.
9 Nompekirika nia nadoyo, nepakadosa.
Isema nombasayu tona ntanina, nipovuu mata ntona.
Pepatuduki noto karopulu bo kaampana
10 Tona noura rarana ri tempo kandasa,
ia tona ledo naroso.
Pepatuduki noto karopulu bo alimana
11 Tulungimo tona anu ledo masipato rahuku mate, anu nitangara ledo nanoa, ala ia rakabasaka.
Pakasalama tona anu nikeni hau ri pombahuku mate tona.
12 Nemo iko manguli ivei: “Ledo nisaniku nuapa-nuapa!”
Apa nisani nTUPU isi nu raramu.
Ia nomparantaika kita, bo nisaniNa anu nipekirikata.
Ia mombabalasi mpanjili nuapa nipoviata.
Pepatuduki noto karopulu bo aonona
13 Anaku, inumo manisa, sabana manisa haitu nabelo,
manisa anu nojeo dako ri banuana namomi mpuu.
14 Vesia muni noto dako nte TUPU nabelo ka katuvumiu,
ane rakavamiu noto haitu, mabelo katuvumiu ri eo nggapurina.
Pepatuduki noto karopulu bo papituna
15 Nemo komiu majadi mpo tona nadaa anu nompomata-mata banua ntona nabelo,
bo nombagerosi banuana.
16 Apa tona nabelo nau mpenggani-nggani manggava kasusa, da mamala mabelo mpanjili
tapi tona nadaa manggava kasusa, ledo rapakulena mabelo.
Pepatuduki noto karopulu bo uvaluna
17 Nemo masana raramu ane balimu masala nggadunggu,
bo nemo madamba ane ia manavu.
18 Sabana ri mata nTUPU pokainggumu ivehaitu nadaa,
bo domo majadi rahukuNa balimu haitu.
Pepatuduki noto karopulu bo sasiona
19 Nemo marau raramu manggita tona nadaa
bo nemo masiriati nte ira.
20 Sabana katuvura ri eo nggapurina ledo mabelo,
katuvura majadi eva poindo napaya.
Pepatuduki noto katalupuluna
21 Anaku, peosemo nte TUPU bo bilamo magau,
nemo mosimporoa nte tona nompobali ira.
22 Sabana TUPU bo magau sampesanika mombaropusi ira
bo ledo ria saitoa tona mangisani pehuku nuapa radekei nTUPU bo magau ka ira.
Pepatuduki noto ntanina
23 Naria muni pepatuduki dako nte tona nanoto pompekirina, ivei:
Tempo komiu mombatangara tona, nemo mompelenje.
24 Ane topotangara manguli tona nadaa ledo nasala,
ia rapakadaaka ntona tesa, bo todea ngata ntanina mompovuu mata ia.
25 Tapi ane topotangara mombahuku tona nasala, masana katuvuna.
Ia manggava rasi mpelabi-labi.
26 Tona nanoa pesanana,
iamo vega anu nabelo.
27 Ane mariamo pokarajaamu bo taluamu mboto,
pade mupekirika pobanua.
28 Nemo mombarai singgamanusiamu ante perai ledo nakana.
Nemo mombatesa ia ante tesa-tesa ledo nakana.
29 Nemo iko mompekiri, “Hitupa kupesava pura pokainggu nadaa nipoviana ka yaku!
Kupesava nangoseaka pokaingguna.”
30 Yaku nolipa nombaliu talua bo anggur ntona.
Tupuna namau bo ledo ria noto mpekirina.
31 Nipeintaku talua haitu napii ante kavoko karui bo jono.
Tana haitu nitutui kavoko,
bo tembo nipovalana naombosakamo.
32-34 Nangganoto bo nomparantaika haitu,
nikava mpekiriku sangu pepatuduki
nombatesaki tona namau.
Niulina mekagole-gole bo mangosanaka sampalai.
Tapi sampesanika anu niparaluuna riara nggatuvuna eo-eo domo ria
bo ia najadi napakasi.
Ia najadi eva tona naupu nipangangga
bo niagosi ntona mbara-mbarana.