Pepatuduki noto kaaonona
23
Ane iko ragaga mangande singgani-nggani nte tomaoge,nemo majulompa, toramo isema ia.
2 Nau iko tona naoge nangande,
taamakamo dota raramu mangande maoge.
3 Nemo madota gaga raramu ka kandea narasa nipasadiana,
nemo-nemo pangande narasa haitu nipasadiana mompanavu iko.
Pepatuduki noto kapapituna
4 Nemo iko mompandasa gaga karomu mompasimbuku matuvu makalumana,
pakanotomo pompekirimu bo taamakamo dota raramu.
5 Sabana kakalumanamu aga sampida mata malipomo,
sampesanika eva neumba kapina bo nevoromo hau ri laerava mpo tonji love.
Pepatuduki kauvaluna
6 Nemo mangande nte tona nasina,
bo nemo maoge raramu ka kandeana narasa.
7 Rasalena iko, “Kamaimo mangande!”
tapi ledo ante rarana mpuu nosale iko
sabana nadea rekena.
8 Manggita inggu ntona nasina haitu, eva ledo maliu kandea muome,
bo tesa-tesa nabelo niulikamu ia, ledo ria gunana.
Pepatuduki noto kasasiona
9 Nemo mompatuduki tona nadoyo,
apa ia mombabanjereni tesa-tesa noto mpekiri niulikamu ia.
Pepatuduki noto kasapuluna
10 Nemo iko mombalinja panto pantaa nu tana anu nipakatantu ntotuamu nggaulu,
bara mangala tana ngana-ngana pailu.
11 Apa TUPU topesaliku naroso,
Iamo manjaliku ira mangeva iko.
Pepatuduki noto kasapulu sanguna
12 Parantaikamo pepatuduki,
bo pegurumo tesa ntona nanoto pompekirina.
Pepatuduki noto kasapulu randuana
13 Nemo mabasa raramu mompatuduki anamu.
Ia ledo mamate nau muboba tempo mompatuduki ia.
14 Pombabobamu haitu mompatuduki ia,
ala ia masalama bo ledo masalisa manggava janjina.
Pepatuduki noto kasapulu tataluna
15 Anaku, ane manoto pompekirimu,
masana mpuu raraku,
16 bo madamba muni raraku,
ane iko motesa anu nakana.
Pepatuduki noto kasapulu ampana
17 Nemo masiriati manggita katuvu ntona nadosa,
tapi peose njuumo nte TUPU,
18 ala katuvumu masana ri eo nggapurina,
bo nuapa nipodota raramu majadi ri katuvumu, madupa.
Pepatuduki noto kasapulu alimana
19 Anaku, epemo, ala iko manoto mompekiri,
bo parantaika mpuumo dala nggatuvumu.
20 Nemo iko mosimporoa nte topanginu panginu nelimpunosi,
bo tona najombe nangande bau,
21 sabana kaupuna ngena ira matuvu mapakasi.
Ane aga maturu-turu iko, masae-sae marantamo popakeamu.
Pepatuduki noto kasapulu aonona
22 Pariaramo pepatuduki ntuamamu, sabana ane ledo ria ia, ledo maria iko.
Bilamo tinamu, nau ia matuamo.
23 Pasimbuku mpuu manggava pepatuduki nakana, bo pegurumo mompekiri manoto ala rapahamiu batuana.
Ane mukava pura-pura haitu, nemo mukabasaka.
24 Masana rara ntotuana ane anana majadi tona mabelo,
madamba rarana ane maria noto mpekiri nu anana.
25 Kambou tuamamu bo tinamu madamba rarara,
bo mombine nompoanaka iko masana rarana.
Pepatuduki noto kasapulu papituna
26 Anaku, pariara pakabelo-belo nuapa niuliku ka iko,
bo parantaika mpuu berimbana pokaingguku.
27 Mombine mpobualo nasimbayu eva tolia nepakamate.
Mombine anu nompobalu karona eva lovu nandala, ane iko manavu riarana ledo mupakule mesore.
28 Ira eva topelava nonia nadaa nombalava iko,
bo nompakadea tona domo nioseakara janji pobereira.
Pepatuduki noto kasapulu uvaluna
29-30 Nisanimu nuapa majadi nte tona anu naoge gaga nanginu panginu nelimpunosi?
Ira mandasa bo masusa.
Ira masaro mosinggarau, mantangalu, matara malei bo karora mabaka-baka.
Kakanana pura-pura haitu mamala rapetalilikara.
31 Nemo mupalamba panginu haitu mompadidisi iko,
naupa mukanoto marasa mpuu muinu.
32 Apa panginu haitu eva ule mpobisa neteo
bo nombasuvuraka bisana.
33 Pangganotomu mavayuvu, pompekiri bo tesamu domo masiayu,
bo anu ledo nikava mpekiri nikitamu puramo.
34 Iko eva tona ri tatanga ntasi nobalumba,
matamu nalimpuno bo damo natetive-tive kadamu nolipa.
35 Iko motesa, “Yaku niboba ntona, tapi ledo nirasaiku duana.
Tempo yaku nisapa ntona, ledo muni nirasaiku.
Ane manotomo raraku,
hau manginu vai yaku.”