Petevai noto i Salomo
22
Sanga nabelo ri mata ntodea, noalipa pade kakalumana nadea.Noalipa pepotove ntona nte kita, pade bulava bo salaka.
2 Tona napakasi bo tona nakalumana nasimbayu,
ira pura-pura nipajadi nTUPU.
3 Tona natau nompekiri, nipetalilikana anu mompakasilaka ia,
tapi tona dopa nisanina gaga, nanjuruavu sampe ia nasala nggadunggu.
4 Tona neose nte TUPU bo naede rarana,
kana mandoe umuruna, masana katuvuna bo ia rabila ntona.
5 Dala nggatuvu ntona natenggo rarana, nasimbayu mpo dala nilava ntimpo bo tolia.
Isema nombajagai katuvuna, nombakavaosi tona ivehaitu.
6 Patudukimo ngana da nangura tuvuna, mangoseaka dala nggatuvu anu masipato raosena,
ala batena manoa dala raosena naupa ia matuamo.
7 Tona nakalumana nombakuasai katuvu ntona napakasi.
Topoinda majadi batua ntona nepopainda.
8 Isema mokainggu matenggo, silaka rakavana,
kakuasana nompandasa tona ntanina, malelakamo.
9 Tona nabelo rarana rapoporasi nTUPU,
sabana nibagina rasi nikavana ka tona napakasi.
10 Popalaimo topesayu, ala domo maria posinggarau,
bo metaa munimo posinjanai bo pesayu.
11 Tona nabelo tesana bo nompasimbuku rarana magasa
majadi roa nu magau.
12 TUPU nombajagai pepatuduki nakana,
tapi tesa ntopebagiu ledo nipakadupaNa.
13 Tona namau nanguli, “Naria singa, rapatesina yaku ri tatanga dala.”
Haitu akalana ala ia aga ri sou, namau rarana mokarajaa.
14 Tesa mombine mpobualo eva lovu ndala nepakasalanggadunggu.
Tona nompakarau rara nTUPU, manavu riara lovu haitu.
15 Ngana da nangura tuvuna da masipato madoyo,
tapi peboba mompatuduki ia mombabali pokaingguna.
16 Tona nompandasa tona ledo nompakule ala manggava kakalumana, aga mompakarugi karona mboto.
Ivesia muni majadi nte tona nombadekei pedekei ka tona nakalumana, ala ia makalumana.
Talu pulu pepatuduki noto dako nte tona natau nompekiri
17 Talingai bo epemo, kupatuduki ka iko pepatuduki noto dako nte Tupu anu nitesa ntona nanoto pompekirina.
Parantaikamo anu nipeguruku, kupatuduki ka iko.
18 Iko masana ane pura-pura haitu muboli riara ntaimu,
bo pura-pura haitu masadiamo mutesa ka tona ntanina.
19 Pepatuduki noto hitu kupatuduki ka iko,
ala iko manjarumaka TUPU.
20 Hitupa kutulisi ka iko talupulu pepatuduki noto,
anu mompangajari bo mompakatau iko,
21 ala musani umbana mpuu-mpuu nakana,
bo ane iko rapekutana ntona, mambela pesanamu.
Pepatuduki noto paratamana
22 Nemo mompakarugi tona ledo nompakule, apa nisanimu ia ledo mamala movia nuapa-nuapa,
bo nemo mompojejea tona napakasi riara mpotangara,
23 sabana TUPU mombasaliku ira riara mpotangara,
bo mompatesi tona mompandasa ira.
Pepatuduki noto karanduana
24 Nemo mosimporoa nte tona nasabilisi,
bo nemo movega nte tona nasalisa narau,
25 ala iko nemo matekeniaka nte pokaingguna,
apa pokaingguna ivehaitu mompakanavu iko.
Pepatuduki noto katataluna
26 Nemo mojanji mombayari bara manjimbuaka inda ntona.
27 Apa ane ledo mupakule mombayarina, nau ompa nipoompamu raalasi.
Pepatuduki noto kaampana
28 Nemo mpuu iko mombasoro panto pantaa nu tanamu,
anu nipakatantu ntotuamu nggaulu.
Pepatuduki noto kaalimana
29 Nipeintamiumo tona natau bo nasaveti nokarajaa?
Ira mokarajaa ka magau, bo ledo ka tona biasa.