Petevai noto i Salomo
21
TUPU nanggeniaka pompekiri magau, nangoseaka dotaNa,nasimbayu mpo manusia nompasiayu poili nu uve nangoseaka dotana.
2 Nisarumaka ntona, nanoamo dala nggatuvu niosena,
tapi TUPU nangisani rara ntai manusia.
3 Nipokonopa nTupu manusia mokainggu mabelo bo manoa,
pade mombadekei pesomba.
4 Tona nadaa nokainggu nasombo bo nalanga rarana,
haitumo pokainggu anu nanggeniaka ia novia dosa.
5 Tona natutu nokarajaa ante niana nabelo, manggava asele mpelabi-labi,
tapi tona nokarajaa ante sara nu rara, ledo madea asele rakavana.
6 Kakalumana nikava ante dala mebagiu,
masalisa maupu bo aga mompakapara janji.
7 Pokainggu nasese nipovia ntona nadaa mompakasusa karona mboto,
apa ia ledo nadota nokainggu nanoa.
8 Dala nggatuvu ntopebagiu natenggo,
tapi tona nanoa rarana nokainggu nanoa.
9 Aginamo maroo ri savaliku banua,
pade monturo rabanua ante mombine anu nipokonona nosinggarau.
10 Tona nadaa nipobiasanamo nokainggu nadaa,
bo ledo ria asi matana nanggita singgamanusiana.
11 Ane tona nanoto pompekirina nipatuduki, nantambai katau ri pekirina,
tapi tona dopa nisanina gaga, nipeintana ntani topesayu nihuku, pade nanoto pekirina.
12 Alatala mpuu-mpuu nanoa. NiparantaikaNa nuapa nipovia ntona nadaa riara banuara,
bo Ia mompakasala nggadunggu ira.
13 Isema ledo mombatalingai pekakai ntona ledo nompakule,
ia muni rapetibongoka tempo ia mekakai merapi tulungi.
14 Pedekei nidekei nggalino,
mompopanau gigi rara ntona nte kita.
15 Ane manoa potangara, madamba rara ntona nabelo,
tapi mompakaeka rara ntona nokainggu nadaa.
16 Tona ledo nangoseaka katauna nompekiri,
aga nompakapara janjina.
17 Tona aga natuvu masana-sana, mapakasi ngena,
bo tona nompesana-sana nangande bo nanginu panginu nasuli, ledo makalumana.
18 Tona nadaa bo topebagiu mboto mombarasai kasusa,
anu nipambelakana tona nabelo bo tona nanoa rarana.
19 Aginamo monturo saito ranggarava bai,
pade monturo singgani nte mombine aga pantangau bo karaumo karajaana.
20 Tona nanoto pompekirina naria mbara-mbara mpoali ri banuana,
tapi tona nadoyo nompakaupu doina nau sakuya kadeana nikavana.
21 Isema mompasimbuku mokainggu manoa bo mompotove tona ntanina, mandoe umuruna.
Ia ratoiya ntona, bo tona mokainggu manoa nte ia.
22 Tona nanoto pompekirina mamala mbasuaki ngata nobente anu nijagai tantara naroso,
bo mamala mombaombosaka bente anu nisarumaka ntupu ngata haitu.
23 Tona nombajagai posumbana,
kasusa ledo manggava ia.
24 Tona nasombo bo tona ledo nombabila tona ntanina, iamo topesayu.
Ia nokainggu ante langa rara ledo ria kasimbayuna.
25 Tona namau mamate maleto,
sabana ia ledo nadota nokarajaa.
26 Njumaeo ia aga nompekirika anu nipodota rarana.
Tapi tona nabelo namala nombadekei mpelabi-labi ka tona ntanina.
27 Navuu mata nTUPU nanggita pesomba ntona nadaa,
nelabipa vai kavuu mataNa ane radekeira pesomba ante nia nadaa.
28 Toposabi dava kana rahuku,
tapi tesa ntoposabi nanoa ratora njuu.
29 Tona nadaa ledo ria eya matana nokainggu nadaa,
tapi tona nanoa rarana nipekiri-kirina ntani pade nokainggu.
30 Noto, katau notimba parakara, bo kanipi rara nu manusia,
ledo ria batuana ri ngayo nTUPU.
31 Naupa tantara magana pareva mposievana,
tapi aga TUPU nompakatantu isema padagi riara mposieva.