Petevai noto i Salomo
20
Tona nipokonona nanginu panginu nelimpunosi, nadoyo bo novia kagado.Tona nanginu sampe nalimpuno, ledo ria noto mpekirina.
2 Magau narau, eva singa nompopaepe suarana.
Ane komiu mompakarau rarana, bara rahukuna mate komiu.
3 Tona nadoyo nipokonona nangelo posinggarau,
tapi tona nombakavaosi posisala, nitoiya ntona.
4 Tona namau ledo notuda tempo mpotuda,
tempo mposoreaka asele mpokarajaa, ia ledo manggava nuapa-nuapa.
5 Nia-nia naria riara ntai manusia eva uve nandala ledo namala nituvu kandalana,
tapi tona naria pompahana rakava mpekirina nia haitu.
6 Nadea tona nanguli, “Yaku tobelo rara,”
tapi nakaja mpuu mangelo tona anu mpuu-mpuu mamala raparasaya.
7 Tona nabelo bo nanoa pokaingguna,
masana muli-mulina.
8 Tempo magau nombatangara tona,
nitimbana ntani ruru, pade nisanina mbana nabelo bo mbana nadaa.
9 Isema mamala manguli,
nagasamo rarana bo ledo ria dosana?
10 Daci bo posuka neonta rapobagiu tona ntanina,
nipovuu mata nTUPU.
11 Inggu ntona mamala rasanita naupa ia da nangana,
rapeinta dako ri pokaingguna, ane ia mabelo bo manoa.
12 TUPU nombadekei talinga bo mata ka kita,
rapaketa meepe bo mekita.
13 Nemo aga maturu-turu, ala iko nemo mapakasi.
Pembangumo bo pokarajaamo, ala magana anu rakandemiu.
14 Topeali nasaro nanguli, “Nadaa buluna! Nasuli gaga alina.”
Tapi nidekei ntupunapa mbara-mbara haitu nialina, nitoiyana mbotomo karona apa nialina ante ali namura.
15 Nau madea bulava bara vatu mpoali,
tapi noalipa tesa-tesa ntona naria katau ri pekirina.
16 Alamo pakea ntona nojanji mombayari inda ntona ntanina.
Alasimo bara nuapa maria nte ia sampe inda ntona haitu rabayarina.
17 Anu nikava ante dala ledo nanoa,
nasimbayu eva kandea narasa nikande tapi nasae-sae nakarekemo eva bone.
18 Niata madupa ane ratimba ntani ruru,
sabana haitu, dopame hau mosieva, perapimo pepatotosi dako nte tona ntanina.
19 Isema nipokonona notesa tona ntanina, niulina pura anu nitabuniaka.
Sabana haitu, kavaosimo tona ivehaitu.
20 Ane komiu mombapindasi totuamiu,
komiu mamate dopame tempona,
nasimbayu eva poindo da tanga bongi napayamo.
21 Ane kakalumana anu raboli ka kita, raalata dopame tempona,
kakalumana haitu kaupuna ledo manggeni belo ka kita.
22 Pokainggu nadaa nemo rabalasi ante pokainggu nadaa,
sarumakamo TUPU, Ia mombatulungi iko.
23 Navuu mata nTUPU nanggita daci-daci neonta,
bo ledo nipokonoNa posuka ledo nanoa.
24 TUPU nompakatantu dala nggatuvu manusia,
tapi manusia ledo nisanina nuapa majadi ri dala nggatuvuna.
25 Pekirika ntani ruru pade movia janji nte TUPU,
mbelaka masala nggadunggu komiu ri eo nggapurina.
26 Magau nanoto pompekirina, rasanina isema tona nadaa,
bo ledo ria asi matana tempo ia mombahuku ira.
27 Pekiri bo rara ntai manusia nirapaka poindo nTUPU,
anu nompakalanto pura nia bo isi rara ntai manusia.
28 Ane magau mompotove todeana bo manoa momparenta,
Ia batena makuasa.
29 Kabilasa nitoiya sabana karosona,
bo totua nibila sabana buluana nauvamo.
30 Pehuku mompopenonto kita movia sala.
Kasusa bo kapari najadi ri karota mombabaliki rara ntaita majadi mabelo.