Petevai noto i Salomo
19
Nabelopa tona natuvu napakasi tapi pokaingguna manoa,pade topodava anu nadoyo.
2 Ledo ria gunana matutu mokarajaa ane ledo ria katau ri pekiri,
pokarajaa nikainggunaka njara-njara, ledo nasiayu.
3 Pokaingguta nadoyo nompakadaa katuvuta mboto,
tapi nadaapa katuvuta, TUPUmo nipakasalata.
4 Tona nakalumana nadea roana,
tapi tona napakasi aga nipalaisi roana.
5 Toposabi dava riara potangara natantu kana rahuku,
bo topodava ledo mamala mombakabasaka karona dako ri pehuku.
6 Nadea tona nekou nte tona najoi rarana.
Pura-pura tona madota mosimporoa nte tona anu nombadekei pedekei.
7 Tona napakasi nipandaente nu sampesuvuna,
nemopa aga roa-roana, ira nombakavaosi ia.
Nau nipasimbukuna mombakaparai bo madota motesa nte ira,
ledo ria gunana.
8 Isema nompasimbuku manggava noto mpekiri, nangelo belo ka katuvuna,
bo ane rakainggunakana, masana katuvuna.
9 Toposabi dava kana rahuku,
bo topotesa anu ledo nakana, mambela pehuku.
10 Ledo masipato tona nadoyo matuvu makalumana,
nemopa aga batua, ledo masipato ia momparenta tomaoge.
11 Tona nanoto pompekirina mpuu-mpuu nosabara,
ia ratoiya apa ia nombaampungi kasala ntona nte ia.
12 Karau rara magau, eva singa nompopaepe suarana,
tapi kabelo rarana, eva uda nombabanggasi tuda-tuda.
13 Ngana nadoyo nompakasalanggadunggu tomana.
Berei mombine anu nipokonona nangelo posisala, nasimbayu eva uve natiti anu ledo ria kaupu-upuna.
14 Banua bo mbara-mbara iamo anu niboli ntotuata ka kita,
tapi mombine nipobereita anu naria noto mpekirina, haitu rasi nabelo nidekei nTUPU.
15 Kamau rara nompakaluru kita namonjo,
bo tona nasanda mombarasai kaara.
16 Tona anu nangoseaka parenta nu Alatala mandoe umuruna,
tapi tona nombabanjereni tesa nu Alatala ia mamate.
17 Isema-sema nombatulungi tona napakasi, eva nompopainda doina ka TUPU.
TUPU mombalasi belo ka ia sabana pokaingguna nabelo haitu.
18 Patudukimo anamu dako ri kakodina apa da maria tempo ia mabali,
tapi nemo marau ka ia sampe maria pekirimu mompatesi ia.a
19 Tona nasalisa narau, ia mboto mbatarima vua mpokaingguna.
Apa ane ratulungita ia, aga mombatambai rau rarana.
20 Talingaimo pepatuduki bo tarimamo pepangajari,
ala manoto pompekirimu ri eo nggapurina.
21 Nadea nia riara mpekiri manusia,
tapi TUPU nompakatantu nuapa majadi.
22 Inggu nipokono ntona, iamo namala niparasaya.
Mabelopa majadi tona mapakasi pade majadi topodava.
23 Ane komiu meose nte Alatala mandoe umurumiu,
komiu matuvu matinonto bo ledo rakava nu silaka.
24 Tona namau, nasimbayu mpo tona ranjurayamo palena,
tapi namau pura rarana mombalinjo kandea hau rangangana.
25 Ane muboba topesayu, bara manotomo tona dopa nisanina gaga.
Ane tona nanipi rarana nipangajari, mantambai manoto pompekirina.
26 Ngana nompandasa bo nompopalai tinana bara tomana dako ri banua,
nepakaeya bo nadaa mpuu ingguna.
27 Ngana anu domo nadota nantarima pepangajari ntomana,
tantu domo raoseakana anu nipatuduki ka ia.
28 Toposabi dava nombabanjereni huku.
Tona nadaa niposana rarana nompanavu tona.
29 Pehuku nasadiamo ka topesayu,
bo tona nadoyo kana raboba.