Petevai noto i Salomo
18
Tona notani dako nte tona ntanina aga nomparantaika karona mboto,panggava mpekiri ntona natau, nisapuakana pura.
2 Tona nadoyo ledo nipokonona nombapaha nuapa-nuapa,
ia aga nompatolele isi mpekirina mboto.
3 Ane tona mokainggu madaa, ia domo rabila ntona,
ane pokaingguna ledo nabelo, natantu madaamo tesa ntona manguli ia.
4 Tesa nesuvu dako riara ntai ntona eva uve nandala, ledo namala nituvu kandalana,
tapi tesa-tesa noto nopuna dako nte Alatala eva uve noili ledo ria kaupu-upuna.
5 Ledo nabelo nosabinggaka tona nadaa
bo ledo muni nabelo mombahuku tona ledo nasala.
6 Posumba ntona nadoyo aga mompopeumba posinggarau,
nangepe tesa nisovadakana, tona madota mombaboba ia.
7 Posumba ntona nadoyo mompakadaa katuvuna mboto,
bo tesana mboto nompakanavu ia.
8 Tesa nompanavu tona ntanina
narasa niepe bo nesua riara ntai.
9 Tona namau nokarajaa, ledo nasiayu katuvuna
nasimbayu nte topegero.
10 Tupu nasimbayu eva bente naroso,
hamaimo rapetalendu ntona nanoa ala masalama.
11 Tona nakalumana nanjarumaka kakalumanana manjaliku ia,
nasimbayu eva tupu ngata nanjarumaka tembo nalanga bo naroso nombalenduti ngatara.
12 Tona nalanga rarana kana manavu,
tapi tona naede rarana, rabila ntona.
13 Tona nesanaka anu dopa niepena,
nadoyo bo nompakaeya karona mboto.
14 Rapakule ntona manjimbuaka kandasa ane maria njuu dota rarana.
Tapi ane maupu rarana, maupu munimo panjarumakana.
15 Tona nanipi rarana naoge rara mantambai katauna,
bo tona naria noto mpekirina madota mantambai anu rasanina.
16 Ane madota motesa nte tona nalanga nturona,
kenimo pedekei ka ia bo madamba ia motesa nte komiu.
17 Tona pamulana notesa riara potangara eva nakana pura tesana,
dopame balina nakava mombabali tesana.
18 Motende lomoro mamala mompakaupu posisala,
naupa posisala ntona nalanga nturona.
19 Nakajapa mompakabelo rara nu sampesuvuta nipakaduata, pade mombadagi ngata naroso.
Nasimbayu kakajana mpo moungge vamba nilava baloti mbasoa.
20 Vua ntesa anu nabelo nisovadaka ntona
ratarimana pura ri eo nggapurina.
21 Tesa manusia mamala mepatuvu bo mepakamate.
Ane madea gaga tesata, kita mboto mangande vua ntesata.
22 Tona nanggava mombine nabelo nipobereina, nauntu,
haitu rasi nabelo nidekei nte TUPU ka ia.
23 Tona napakasi netiasi-asi ane notesa,
tapi tona nakalumana nasese nesana.
24 Naria roa aga mompakadaa katuvuta,
tapi naria muni roa anu mpuu-mpuu nabelo niposimporoaka,
ia nabelopa pade sampesuvu koyo puse.