Petevai noto i Salomo
17
Aginapa mangande talebe nggoo, tapi matinonto rara,pade mangande marasa, ane aga mosinggarau-rau.
2 Batua naria noto mpekirina makuasapa pade ana nu madika anu nepakaeya,
bo batua haitu manggava bagia dako ri kakalumana nu madika mosinggani-nggani nte anana ntanina.
3 Bulava bo salaka nigonu ri apu rapompeinta kagasana,
Tapi TUPU nombauji rara nu manusia mompeinta kagasana.
4 Tona nokainggu nadaa nomparantaika tesa nadaa,
bo topodava nipokonona nangepe tesa-tesa mepakadaa.
5 Isema mompongeika tona napakasi, ledo nombabila Alatala Topompajadi ia,
bo isema madamba rarana manggita tona nanggava silaka, ia rahuku.
6 Totua nombatoiya mulina,
ngana-ngana nombatoiya totuana.
7 Tona nadoyo ledo masipato mombasovadaka tesa-tesa nabelo,
nemopa tona nibila manguli tesa-tesa dava.
8 Nisarumaka ntona doi mate mamala mompakaosa dota rarana,
apa ante doi haitu nipekirina nuapa nipodota rarana mamala madupa.
9 Isema nombaampungi roa, nombajagai posimporoa,
tapi isema nompopeumba posisala, nompopogaa posimporoa nabelo.
10 Nobatuapa sanggani petuenaka ka topompaha,
pade saatu nggani peboba ka tona nadoyo.
11 Tona nadaa nasaro novia kagado,
tapi pehuku nTupu mompandasa ia.
12 Aginamo mosintomu nte beruang mpoana anu nalipo anana,
pade mosinggava nte tona nadoyo ante kadoyona.
13 Isema mombabalasi kabelo ante kadaa,
maria njuu kadaa riara banuana.
14 Pompamula posinggarau eva nombabongga dala nu uve,
jadi popetaamo masalisa dopame majadi posinjanai.
15 Nompakakana tona nadaa bo nompakasala tona nakana,
haitu nompakavuu mata nTUPU.
16 Ledo ria gunana tona nadoyo mompakaupu doina mangelo noto,
sabana ledo ria noto mpekirina.
17 Roa batena nepotove,
bo sampesuvu nombatulungi kita riara kasusa.
18 Tona ledo ria noto mpekirina,
nojanji mombatanggu inda roana.
19 Tona nipokonona nosinjanai, nompokono posisala,
bo tona nompopakita kariana, nangelo kagerona mboto.
20 Topebagiu ledo masana katuvuna,
topodava manggava salanggadunggu.
21 Moanaka ngana nadoyo nompakabuku rara,
bo totua ngana anu nadoyo ledo masana rarara.
22 Rara nadamba pakuli nabelo,
tapi leo nu rara nompakalente buku.
23 Tona nadaa nantarima mpelino doi mate,
ala mbatenggoaka huku.
24 Patuju ntona nompaha iamo manggava noto,
tapi patuju ntona nadoyo ledo natantu.
25 Ngana nadoyo nompakadua bo nompakabuku rara,
ntinana bo tomana.
26 Ledo masipato mompopovaya tona nakana,
bo ledo muni masipato mombaboba tona nabelo.
27 Tona anu natau nompekiri, ledo nadea tesana.
Tona nompaha, natinonto bo ledo nasalisa narau.
28 Nau tona nadoyo rauli ntona nanoto pompekirina
ane ia ledo notesa.