Petevai noto i Salomo
16
Manusia mamala monia,tapi TUPU mompakatantu majadi bara ledo.
2 Pura-pura tona nompekiri pokaingguna mboto nabelo,
tapi TUPU nangisani rara manusia.
3 Sarumakamo TUPU riara mpoviamu,
ala pura-pura anu niponiamu, madupa.
4 Pura-pura anu nipovia nTUPU naria gunana,
Naupa tona nadaa nipakatantuNa rahuku ri eo pehuku.
5 Pura-pura tona nalanga rarana nipovuu mata nTUPU,
bo ira ledo rakabasaka dako ri pehuku.
6 Tona anu batena nompotove TUPU, raampungi,
bo tona neose nte TUPU, rakabasaka dako ri kadaa.
7 Ane komiu mompakasana rara nTUPU,
balimiu rapoposinggabeloNa nte komiu.
8 Aginapa asele sakide anu nikava ante dala nanoa,
pade asele nadea nikava ante dala natenggo.
9 Manusia mamala aga monia,
tapi TUPU nompakatantu dala nggatuvu raosena.
10 Magau nantarima kuasa dako nte Alatala,
jadi, pobotusina kana nanoa.
11 TUPU nompokono tona nogade nte rara nanoa.
Ia mboto nompakatantu posuka bo potimba.
12 Navuu mata nu magau nanggita pokainggu nadaa,
kamagaua maroso ane todeana manoa.
13 Tesa nakana nompakasana rara magau,
bo tona notesa nanoa, nipotovena.
14 Ane magau marau, mamala mombahuku mate tona,
tapi tona nanoto pompekirina, mompakaluu rau rara magau.
15 Kabelo rara magau mompakasana katuvu,
nasimbayu mpo uda nakava ri tempo mpotuda.
16 Mabelopa manggava noto pade manggava bulava,
bo mabelopa manggava pompaha pade manggava salaka.
17 Tona nanoa nombakavaosi pokainggu nadaa,
tona nomparantaika dala nggatuvuna, mbasaliku karona.
18 Tona nasombo mompakagero katuvuna,
bo tona nalanga rarana rapakanavu.
19 Aginapa maede rara bo monturo nte tona napakasi,
pade makalumana ante mbara-mbara anu niago.
20 Isema nomparantaika pepatuduki nabelo manggava belo,
bo masana mpuu tona nanjarumaka TUPU.
21 Tona nanoto pompekirina nisani dako ri katada mpekirina,
potesana nasana niepe, nompakadidi rara momparasayana.
22 Noto mpekiri puna katuvua ka tona anu naria noto mpekirina,
tapi tona nadoyo rapandasa nu kadoyona mboto.
23 Tona nanoto pompekirina nasaro nompekiri dopame ia notesa,
bo tesa-tesa nisovadakana namala niparasaya.
24 Tesa-tesa nabelo nasimbayu mpo manisa,
namomi nirasai bo nompakaroso pokaro.
25 Naria dala nisarumakata nanoa,
tano mai aga dala hau ri kamatea.
26 Tona kana mangande, jadi ia nompasimbuku nokarajaa,
sabana nitorana ara ntaina.
27 Tona nadaa mompakasala nggadunggu singgamanusiana,
tesa-tesana nadaa eva apu mepalabusi.
28 Tona najeko nompopeumba posinggarau,
toposintutu nompopogaa tona noroa belo.
29 Tona nasese nombabagiu roa-roana,
bo nanggeni ira ri dala nggatuvu ledo nabelo.
30 Isema nomongi-mongi nosikampida mata,
nonia madaa.
31 Tona natuvu nanoa nipakandoe umuruna,
buluana nauva najadi pebila ka ia.
32 Mabelopa mosabara pade majadi tantara naroso,
mabelopa mombataamaka dota rara pade mombadagi todea ngata.
33 Manusia namala nombatasere dala nggatuvuna,
tapi aga TUPU nompakatantu dala nggatuvu manusia.