Petevai-petevai noto ka i Lemuel dako nte tinana
31
Hitumo tevai noto lako nte Tupu nitesa Magau Lemuel, anu nipatuduki ntinana ka ia.2 Anaku, ana oteaku, ngana nijanji mokarajaa ka TUPU,
epemo anu kuuli ka iko.
3 Nemo mupakareso karomu mombaraga mombine anu nompakasusa katuvu nu magau,
bo nemo mosimporoa nte ira.
4 Epemo, Lemuel! Ledo masipato magau bo tomaogena manginu sampe malimpuno
bara mompokono panginu melimpunosi.
5 Nemo ngena sampe ia mombakalingasi atura anu nibotusi, sabana panginu nelimpunosi haitu,
bo nemo sampe ratenggoakana bagia masipato ka tona napakasi.
6 Panginu nelipunosi haitu noguna ka tona nadua anu domo masae mamate
bo ka tona anu nandasa mpuumo.
7 Panginu haitu rainura,
ala domo ratorara kapakasira bo kasusara.
8 Salikumo tona anu ledo nompakule mombasaliku karona mboto,
bo tona napakasi.
9 Salikumo ira bo kana manoa mombabotusi parakarara!
Dekeimo bagia masipato radekei ka tona nasusa bo napakasi katuvuna.
Mombine nabelo ratoiya
10 Nakaja manggava mombine nabelo rapoberei,
ia noalipa pade vatu mpoali.
11 Ia raparasaya nu bereina,
bo sabana haitu bereina langgai moasele njuu riara pompaelona.
12 Mombine haitu ledo sanggania nokainggu nadaa ka bereina langgai
sampe ri kaupu nggatuvuna, ia batena nokainggu nabelo.
13 Ia novia pakea rapake ri tempo napane bo tempo nanindi,
nikarajaana ante sana rara bo tutu rara.
14 Ia nasaro nanjili ri banua nanggeni nadea anu rakande
nasimbayu mpo kapala ntasi ntopogade nanggeni mbara-mbara dako ri ngata nakavao.
15 Da nalanda, ia nembangumo,
nompasiayu pangande ka ira sambanua,
bo mangulika batua-batuana mombine nuapa ratuira.
16 Ia nangali talua nipokonona,
bo nombatuda anggur ri talua haitu dako ri asele nikavana.
17 Ia ledo namau,
ia mombine naroso, bo natutu nokarajaa.
18 Nisanina pompaelona nompakauntu ia,
bo ia nokarajaa sampe nasae bongi.
19 Bana nikalorona rapodau baju
bo kaena nitanuna mboto.
20 Ia nombatulungi tona nandasa,
bo nombadekei anu naria nte ia ka tona napakasi.
21 Ledo nasesa rarana ane tempo ranindi,
sabana pakea nipake tempo ranindi naria nipasadiana ka ira sambanua.
22 Ia mboto novia buya mbaso rapolampi paturu,
bo pakeana nagaya nipovia lako ri kae linen nalusu.
23 Bereina langgai saito tomaoge ri ngata,
ia nibila bo nosisani belo nte todea.
24 Mombine haitu novia pakea bo pompou kope,
bo nipobaluna ka topobalu-balu.
25 Ia tona naroso bo nibila ntona,
ledo napari rarana nte katuvuna ri eo nggapurina.
26 Ia notesa ante noto mpekiri,
bo ante tesa nalusu, nompatuduki tona ntanina.
27 Ia nomparantaika nuapa niparaluu riara banuana,
bo ia natutu nokarajaa.
28 Ana-anana nombaoe ia,
bo bereina langgai nombatoiya ia, ivei,
29 “Nadea mombine nabelo,
tapi ikomo nabelopa pade ira pura-pura.”
30 Kagaya pokaro mombine mamala mompakanavu tona,
bo kagaya lenjena raenje nu eona malipo.
Tapi mombine neose nte TUPU masipato ratoiya.
31 Dekeimo anu masipato ka ia nasindara nte poviana nabelo haitu.
Ia masipato ratoiya ri ngayo ntodea sabana anu nipoviana.