Petevai noto i Salomo
14
Mombine nanoto pompekirina nompakaroso ponjambokona,tapi mombine nadoyo nompakagero ponjambokona ante pokaingguna mboto.
2 Tona natuvu ante rara nanoa, neose nte TUPU,
tapi tona nokainggu ledo nanoa, ledo nombabila TUPU.
3 Tesa ntona nadoyo mompakasusa karona mboto,
tapi tona nanoto pompekirina masalama sabana tesa-tesa nabelo nisovadaka ledo mompakanavu ia.
4 Ane ledo ria japi rapake mombakarajaa tana, ledo ria asele ntana haitu rasoreaka,
tapi ante karoso nu japi, tana haitu nadea aselena.
5 Sabi anu mamala raparasaya, natantumo ia ledo modava,
tapi tona notesa tesa ledo nakana, ia sabi mpodava.
6 Topesayu mangelo noto, ledo rakavana,
tapi topompaha ledo nakujere manggava pangisani.
7 Nemo mosimporoa nte tona nadoyo,
apa ledo ria anu mamala mupeguru dako nte ia.
8 Tona nanipi rarana, rasanina nuapa rakainggunakana,
tapi tona nadoyo rabagiu nu kadoyona mboto.
9 Tona nadoyo nipekirina ledo ria gunana mompakabelo pokaingguna nasala,
tapi tona nanoa rarana nompasimbuku mosinggabelo nte tona ntanina.
10 Ane rarata nasusa bara nasana, kita mboto nombarasaina,
ledo tona ntanina nombarasaina.
11 Pobanua ntona nadaa magero,
tapi pobanua ntona nanoa rarana, mantambai karosona.
12 Naria tona nisarumakana nambelamo dala niosena,
tano dala haitu aga manggeni ia hau ri kamatea.
13 Naupa nipeintata tona nongiri-ngiri, bara maria muni kasusa nirasaina,
bo kasana-sana nu rarana nipeintata, bara maria muni kabuku rara nirasaina.
14 Tona domo nomparasaya TUPU, mombatarima vua dako ri pokaingguna.
Tona nabelo, manggava tambo dako ri poviana nabelo.
15 Tona anu dopa nisanina gaga dala nggatuvu nomparasaya nuapa-nuapa niepena,
tapi tona natau nompekiri, nipekirikana ntani ruru dopame ia mokainggu.
16 Tona nokainggu nte noto mpekiri kana nainga bo nombakavaosi pokainggu nadaa,
tapi tona nadoyo ledo nainga bo ledo nompekiri ntani ruru pade nokainggu.
17 Isema-sema nasalisa narau, nokainggu nadoyo,
tapi tona nokainggu nte noto mpekiri, namala nombataha pekirinaa.
18 Tona dopa nisanina gaga dala nggatuvu, majadi madoyo,
tapi tona nanipi rara mantambai pangisanina.
19 Tona nokainggu nadaa kana radagi ntona nabelo,
ira kana merapi rakasiasi ntona nanoa.
20 Ledo nadea tona noroa nte tona napakasi,
tapi tona nakalumana nadea roana.
21 Isema natio matana nanggita singgamanusiana, madosa,
tapi tona anu naasi matana bo nantulungi tona nandasa, masana katuvuna.
22 Isema nompasimbuku mokainggu mabelo, rapotove bo raparasaya ntona.
Tapi tona nonia mokainggu madaa, nangose dala nggatuvu nasalandala.
23 Ane tona mokarajaa ante rara mpuu, ia manggava asele madea,
tapi ane tona aga tesana namamba ledo ria karajaana, ia aga mapakasi.
24 Tona nanoto pompekirina nitoiya sabana katauna,
tona nadoyo nisani ntona dako ri kadoyona.
25 Sabi notesa anu nakana, nompakasalama katuvu ntona,
tapi tona nompatolele tesa dava, ia topebagiu.
26 Ane kita meose nte TUPU, kita matuvu masana,
bo kita sambanua rajagai nTUPU.
27 Meose nte TUPU mompakabelo katuvu ntona,
bo haitu mompakasalama tona dako ri kamatea.
28 Kaoge bo karoso nu magau rasani dako ri kadea nu todea nikeniakana,
apa ane domo ria todeana, ia domo makuasa.
29 Tona nanoto pompekirina ledo nasalisa narau,
tapi tona nokainggu nadoyo ledo namala nombataamaka rau rarana.
30 Ane rara matinonto, pokaro maroso,
tapi ane nasiriati, eva dua mepakamate.
31 Isema nompandasa tona ledo nompakule, ledo nombabila Topomandu ia,
tapi isema naasi matana bo nantulungi tona napakasi, nompakaoge Alatala.
32 Tona nadaa rapakanavu sabana pokaingguna nadaa,
tapi tona nabelo rasaliku sabana kagasa nu rarana.
33 Noto mpekiri naria riara ntai ntona nompaha,
tapi ledo ria noto mpekiri riara ntai ntona nadoyo.
34 Ane todea ngata matuvu manoa, ira rabila bo majadi maroso,
tapi ane ira matuvu madosa, mompakaeya todea ngatara.
35 Madamba rara magau ane topokarajaa ka ia nanoto pompekirina,
tapi narau rarana ka topokarajaa anu nepakaeya.