Petevai noto i Salomo
13
Ngana anu nanoto pompekirina nomparantaika pepatuduki ntotuana,tapi topesayu, pokaingguna ledo namala nituenaka.
2 Tona nabelo tesana mantarima anu nabelo,
tapi anu nipodota ntona natenggo rarana aga movia anu nadaa.
3 Isema-sema nombajagai posumbana, matinonto katuvuna,
tapi isema kapola-polaka notesa, masurukavu.
4 Tona namau ledo ria manggava anu nipodota rarana,
tapi tona anu nompasimbuku nokarajaa manggava anu nipodota rarana.
5 Tona nabelo navuu matana ante dava,
tapi pokainggu ntona nadaa aga nompakaeya karona bo rasayu ntona.
6 Kanoa nu rara mombajagai dala nggatuvu ntona nagasa rarana,
tapi pokainggu nadaa mompakasala nggadunggu tona nadosa.
7 Naria tona nompopakita katuvuna eva tona nakalumana, tano ledoria nuapa-nuapana.
Naria muni tona natuvu mpo tona napakasi, tapi mbara-mbarana nadea.
8 Tona nakalumana mombasuvuraka doina ala katuvuna matinonto,
tapi tona napakasi ledo ria anu nompakakini rarana.
9 Katuvu ntona nabelo eva reme nevanta,
tapi katuvu ntona nadaa, eva poindo napaya.
10 Tona nasombo aga mompopeumba posinggarau,
tapi tona nanoto pompekirina, nompetalingai pepatuduki.
11 Kakalumana nasalisa nikava, nasalisa muni naupu,
tapi isema nompasiromuna sakide-sakide, ia majadi makalumana.
12 Ane anu nipodota rara dopa rakava, masusa pompekiri,
tapi ane anu nipokono nu rara rakava, masana pompekiri.
13 Tona nombabanjereni pepatuduki nTUPU, ia masala nggadunggu,
tapi tona anu nangoseaka atura nu Alatala, manggava tambo.
14 Pepatuduki ntona nanoto pompekirina nompakabelo katuvu ntona,
apa pepatuduki haitu mompakasalama tona dako ri tolia anu mompakamate ia.
15 Tona nanoto pompekirina rabila ntodea,
tapi dala niose ntona natenggo rarana mompakasala nggadunggu ira.
16 Tona natau nompekiri, nipekirikana ntani ruru pade nokainggu.
Tapi tona nadoyo namamba notesa, haitu nompopaisani kadoyona.
17 Suro nadaa, mompakanavu tona riara salanggadunggu,
tapi topanggeni kareba anu niparasaya, manggeni posinggabelo.
18 Tona anu ledo nadota nipatuduki, mapakasi bo maeya,
tapi tona anu ledo nakaa rarana nituenaka, ratoiya.
19 Masana rarata ane anu nipokono nu rarata rakavata,
aga tona nadoyo ledo madota metaa mokainggu madaa.
20 Isema mosimporoa nte tona nanoto pompekirina, majadi manoto pompekirina,
tapi tona nosimporoa nte tona nadoyo, ia masala nggadunggu.
21 Tona nadosa niraga-raga nu silaka,
tapi tona nabelo, rapakasana katuvuna.
22 Tona nabelo momboli kakalumanana ka muli nu mulina,
tapi kakalumana ntona nadaa raboli ka tona nanoa rarana.
23 Tana nikarajaa ntona napakasi, kakanana nadea aselena,
tapi aselena biasa niagosi ntona ledo nanoa rarana.
24 Isema ledo nombaboba anana mompatuduki ira, ledo nompotove anana,
apa tona nompotove anana, nombaboba ira tempo ira nasala.
25 Tona nokainggu nabelo kana nagana njuu kandea nikandera,
tapi tona nokainggu nadaa mapakasi mpuu katuvuna.