Petevai noto i Salomo
12
Tona nompokono pepatuduki, nipokonona muni pangisani,tapi tona ledo nadota nituenaka, iamo tona nadoyo.
2 Tona nabelo nompakasana rara nTUPU,
tapi tona nonia nadaa rahukuNa.
3 Ledo ria saitoa tona matinonto katuvuna ane pokaingguna madaa,
tapi tona nabelo, matuvu matinonto eva kayu nandala kalena ledo maubi.
4 Mombine nokainggu nabelo niposana rara nu bereina langgai.
Tapi mombine nepakaeya, mpuu-mpuu nompakagero rara bereina.
5 Tona nabelo, nanoa nia riara mpekirina,
tapi patuju ntona nadaa aga mebagiu.
6 Posumba ntona nadaa mompakamate tona ntanina,
tapi tesa-tesa ntona nanoa rarana mompakasalama tona ntanina.
7 Tona nadaa manggava silaka sampe maropu,
tapi tona nabelo kana batena matuvu sampe ri muli nu mulina.
8 Tona ratoiya nasinggeni nte noto mpekirina,
tapi tona natenggo rarana nipovuu mata ntona.
9 Aginapa kita majadi todea biasa, mokarajaa ka karo mboto,
pade kita mangoeka nturo nalanga tapi ledo nagana anu nikandeta.
10 Tona nabelo nomparantaika katuvu binata nipatuvuna,
tapi tona nadaa nompandasa binata nipatuvuna.
11 Isema nokarajaa tanana, kana magana anu rakandena,
tapi isema nokarajaa anu ledo noguna, ledo ria noto mpekirina.
12 Tona nadaa madota manggava untu dako nte topebagiu,
tapi katuvu ntona nabelo moasele nasimbayu eva kayu novua nadea.
13 Tona nadaa matetoliani ante tesa-tesana mboto,
tapi tona nabelo kana manggava dala makabasaka dako ri kasusa nanggava ia.
14 Tona nombatesa anu nabelo manggava katuvu mabelo,
tona nokarajaa nabelo manggava asele mabelo dako ri pokarajaana haitu.
15 Tona nadoyo nipekirina dala niosena nanoa,
tapi tona nantalingai pepatuduki, nanoto pompekirina.
16 Ane tona nadoyo nadua rarana, kaliu-liu nipopakitana dua rarana,
tapi tona natau nompekiri, ledo kaliu-liu narau ane nisalai.
17 Tona notesaki anu nakana, iamo toposabi nanoa.
Tapi toposabi dava, nombatesa anu ledo nakana.
18 Tona anu kapola-polaka tesana nompakadua rara ntona, eva ladi netosu.
Tapi tesa ntona nanoto pompekirina eva pakuli nompakabelo dua.
19 Tesa nakana ratora ntona njuu sampe kasae-saena,
tapi tesa ledo nakana ledo masae rasani ntona.
20 Tona nonia nadaa aga pebagiu naria riara mpekirina,
tapi tona nompasimbuku mompoposinggabelo tona, matuvu masana.
21 Tona nabelo ledo rakava nu silaka,
tapi tona nadaa kana rakava salanggadunggu.
22 Navuu mata nTUPU nangganoto topodava,
tapi nasana raraNa nte tona notesa nanoa.
23 Tona anu natau nompekiri ledo kaliu-liu nombatesa pura anu nisanina,
tapi tona nadoyo nangoe notesa, haitu nompopasani kadoyona.
24 Tona nokarajaa ante mpuu-mpuu rara manggava nturo nalanga,
tapi tona namau nokarajaa aga majadi batua.
25 Rara nonggai-nggai nompakaleo rara,
tapi tesa nabelo, nompakasana rara.
26 Tona nabelo manggava asele nabelo riara nggatuvuna,a
tapi dala nggatuvu niose ntona nadaa, mompakasalandala ia.
27 Tona namau ledo manggava anu nipodota rarana,
tapi tona anu natutu rarana nompaelo, ia manggava kakalumana anu nipaelona.
28 Ane tona mangoseaka dala nggatuvu nabelo, ia manggava katuvu masana,
tapi ane tona mangoseaka dala nggatuvu ledo nabelo, ia aga manggava kamatea.