Petevai noto i Salomo
11
Navuu mata nTUPU nangganoto tona nompake daci anu neonta,tapi nasana raraNa nte tona nompake daci nanoa.
2 Ane tona malanga rarana tantu rapakaeya,
tapi tona naede rarana naria noto ri pekirina.
3 Tona nanoa nokainggunaka kanoa nu rarana,
tapi topebagiu manggava silaka sabana pebagiuna.
4 Mbara-mbara domo ria gunana tempo kita mantingayo pehuku nu Alatala,
Tapi tona natuvu nanoa masalama.
5 Tona nagasa rarana masana dala nggatuvuna, sabana pokaingguna nanoa
tapi tona nadaa manavu sabana pokaingguna nadaa.
6 Tona nanoa rarana masalama sabana pokaingguna nakana,
tapi topebagiu manavu sabana kamamusana.
7 Ane tona nadaa mamate, pura-pura anu nisarumakana malipo,
ledo ria gunana manjarumaka karoso mboto.
8 Tona nabelo rapakasalama dako ri kasusa,
tapi tona nadaa batena mombarasai kasusa.
9 Ante tesa-tesa nisovadakana, tona nadaa nompanavu singgamanusiana,
tapi tona nabelo masalama sabana katau ri pekirina.
10 Ane tona nabelo manggava asele riara nggatuvuna, masana mpuu todea ngata,
tapi ane tona nadaa mamate, madamba mpuu rara ntodea.
11 Tona nokainggu nanoa mombadekei rasi ka todea ngata,
tapi posumba ntona nadaa mompakagero ngata.
12 Isema nompandaente singgamanusiana, ledo ria noto mpekirina,
tapi tona natau nompekiri ledoria nombatesa-tesa tona ntanina.
13 Tona aga natau nombatesa kadaa ntona ntanina, nombauvaraka anu natetabuniaka,
tapi tona namala raparasaya, mombatutui posisala.
14 Ane ledo ria topekeniaka, masalandalamo todea,
tapi ane topepatotosi madea, todea masalama.
15 Masurukavu mpuu tona anu nojanji mombayari inda ntona, ane ledo rapakulena mombayarina, aga eya mata bo panjoso rara rakavana,
tapi isema ledo nojanji, ia ledo makuya-kuya.
16 Mombine anu nabelo rarana manggava pebila,
tapi topepandasa aga nompasiromu kakalumana.
17 Tona najoi rarana novia belo ka karona mboto,
tapi tona nasese nompandasa karona.
18 Tona nadaa nangelo asele anu ledo noguna,
tapi isema novia belo, manggava tambo ledo ria kaupu-upuna.
19 Isema matutu movia belo, matuvu masana,
tapi isema batena mokainggu madaa, mamate.
20 TUPU nompovuu mata tona nadaa pekirina,
tapi tona nagasa rarana, nipotoveNa.
21 Tona nadaa kana rahuku,
tapi tona nabelo rapakasalama.
22 Kagaya mombine ledo ria gunana, ane ledo ria noto mpekirina,
haitu nasimbayu eva sinji bulava nidika ri onge nu bavu.
23 Anu nipodota rara ntona nabelo, noasele nabelo,
tapi panjarumaka ntona nadaa aga nompakarau rara.
24 Tona anu nasaro nombadekei mbara-mbarana nombatulungi tona ntanina, aga nantambai kakalumanana.
Tapi tona nasina, nasaro nakabu anu niparaluuna riara nggatuvuna.
25 Isema nasaro nombadekei anu naria nte ia ka tona ntanina, ia radekeika rasi mpelabi-labi.
Tona anu najoi rarana nombatulungi tona ntanina, ia muni ratulungi ntona.
26 Tona aga nombatambunaka kandea bo ledo rapobaluna ka tona ntanina paraluu pangande, ia rapindasi ntona.
Tapi tona nobaluna ka tona nomparaluu, ratoiya ntona.
27 Isema anu nompasimbuku movia anu nabelo, ia mompakadamba rara ntona,
tapi isema-sema nompasimbuku movia anu daa, ia aga manggava anu nadaa.
28 Tona aga nanjarumaka kakalumanana, ia manavu eva tava kayu natuamo,
tapi tona nabelo matuvu masana eva tuda-tuda metumbu njuu anu nompamulamo notava.
29 Isema-sema nompakagero ponjambokona, ledo manggava nuapa-nuapa.
Tona nadoyo majadi potudua ntona nanoto pompekirina.
30 Nuapa nikainggunaka ntona nabelo najadi puna nu katuvua ka tona ntanina
bo tona nokainggu nte noto mpekiri, mamala mangala rara ntona ntanina.
31 Ri dunia hitu nau tona nabelo manggava pehuku sabana dosa-dosara,
nemopa tona nadaa bo nadosa.