Petevai-petevai nitulisi i Salomo
10:1-22:16
10
Hitumo petevai-petevai noto dako nte Alatala nitulisi i Salomo:Ngana anu nanoto pompekirina nabelo, nompakasana rara ntinana bo tuamana.
Tapi ngana nadoyo nompakasusa rara ntotuana.
2 Kakalumana nikava ante dala ledo nabelo, ledo noguna ka iko
tapi ane mabelo pokainggumu, masalama katuvumu.
3 TUPU ledo mompalamba tona nokainggu nabelo mombarasai kaara,
tapi dota rara ntona nokainggu nadaa, ledo nipadupaNa.
4 Tona namau mapakasi katuvuna,
tapi tona nompasimbuku nokarajaa ante mpuu-mpuu rarana, majadi makalumana.
5 Tona nompasiromu asele mpoviana ri tempo pombasoreaka asele mpanggavia, ia tona natau nompekiri,
tapi tona aga notandodo bo naturu ri tempo pombasoreaka asele mpanggavia, nepakaeya.
6 Tona nabelo radekeika nTUPU rasi bo belo,
tapi tona nadaa nombatampunisi ingguna naseseraka, ante tesa-tesana nabelo.
7 Tona nokainggu nabelo batena nitora kabelona,
tapi tona nokainggu nadaa masalisa rakalingasi ntona.
8 Tona nanoto pompekirina nipokonona nipatuduki,
tapi tona notesa nadoyo rakava nu silaka.
9 Isema mokainggu manoa ia matuvu matinonto,
tapi isema mokainggu matenggo rasani nu Alatala.
10 Isema mosikampida mata madota mebagiu, aga mompakasusa tona ntanina,
bo isema nadoyo notesa rakava nu silaka.
11 Tesa-tesa ntona nabelo eva mata nu uve mombadekei katuvua,
tapi tona nadaa nompavunisi kaseserakana ante tesa-tesana nabelo.
12 Tona nosipovuu mata nompopeumba posisala,
tapi tona nambaso tovena, nombaampungi pura-pura kasala.
13 Tona nompaha, notesa noto dako nte Alatala.
Tapi tona ledo natau nompekiri, masipato rahuku.
14 Tona nanoto pompekirina mantambai anu rasanina,
tapi tesa ntona nadoyo, aga mompakasala nggadunggu.
15 Kakalumana ntona nasugi mamala mombajagai ia,
tapi kapepa ntona napakasi mompakandasa katuvuna.
16 Tambo pokarajaa ntona nabelo mompakasana katuvuna,
tapi asele mpokarajaa ntona nadaa aga rapakena mombatambai dosana.
17 Isema-sema madota rapatuduki, mombarasai katuvu mabelo
tapi isema ledo nompokono pepatuduki, ia masalandala.
18 Tona nombatabuniaka dua rarana nte tona, ia topodava,
bo tona nombatunturaka tona ntanina iamo tona nadoyo.
19 Tona nadea tesana kana maria tesana masala,
tapi tona namala nombajagai posumbana iamo tona natau nompekiri.
20 Tesa-tesa ntona nabelo eva salaka ledo ria galona,
tapi vua mpekiri ntona nadaa ledo ria gunana.
21 Tesa-tesa anu nisovadaka ntona nabelo manggeni belo ka todea,
tapi tona nadoyo mamate sabana ledo ria noto mpekirina.
22 Mokarajaa manjarumaka pompasimbuku mboto ledo mamala mantambai kakalumana.a
Sabana rasi bo belo dako nte TUPU mamala mompakakalumana tona.
23 Tona nadoyo niposana rarana nokainggu naruto
tapi tona natau nompekiri anu niposana rarana aga nompaelo noto dako nte Alatala.
24 Tona nabelo manggava anu nipokono nu rarana,
tapi tona nadaa, manggava anu nipokaeka nu rarana.
25 Tempo silaka mbaso mbarumpa tona, tona nadaa maropu,
tapi tona nabelo, batena maroso sampe kasae-saena.
26 Nemo mombatudu tona namau, ia aga nompakarau rara,
evamo anu mpoi nompakangilu ngisi bo unu nu apu nompakalaa mata.
27 Tona meose nte TUPU mandoe umuruna
tapi tona nadaa ledo masae katuvuna.
28 Tona nokainggu nabelo masana ri eo nggapurina, sabana panjarumakara rapakadupa,
tapi panjarumaka ntona nadaa ledo rapakadupa.
29 TUPU mombajagai tona anu nagasa rarana,
tapi niropusiNa tona nokainggu nadaa.
30 Tona nokainggu nabelo matinonto katuvuna,
tapi tona nadaa ledo monturo ri tana anu nijanji nTupu.
31 Tona nokainggu nabelo, notesa nangoseaka noto dako nte Alatala,
tapi sumba ntopodava rakapusiNa.
32 Posumba ntona nokainggu nabelo mombasovadaka tesa-tesa mompakasana rara,
tapi posumba ntona nadaa aga mombasuvuraka tesa-tesa mpebagiu.