Pegaga nu noto bo pegaga nu kadoyo
9
Noto dako nte Alatala nirapaka mombine nompopeangga banua naroso,bo nompakaroso papitu tinjana ante vatu.
2 Ia nirapaka tona nombakoyo-koyo bau raporiapu
bo nombagalo anggur rainu
bo nompasiayu anu rakande ntorata.
3 Nitudunamo mombine-mombine anu nokarajaa ka ia, hau mompongare tona
dako ri kalangana riara ngata mompopaepe tesa mpegaga.a
4 Dala mpegaga haitu ivei, “Isema-sema dopa natau gaga. Pesaimo tumai!”
Bo ka tona anu dopa ria noto mpekirina ia nanguli ivei,
5 “Kamaimo, kandemo kandea nipasadiaku,
bo inumo panginu anu nipasadiaku.
6 Kabasakamo pokainggu nadoyo
ala rakavamiu katuvu mabelo,
bo oseakamo dala ntona nanipi rarana.”
7 Ane iko mompatuduki topesayu aga rapongirikana iko,
bo ane iko mombatuenaka tona nadaa, aga rapakaduana iko.
8 Nemo mombatuenaka topesayu, ala nemo rapovuu nu matana iko,
ane iko motuenaka pokainggu ntona nanoto pompekirina, iko rapotovena.
9 Dekeimo pepatotosi ka tona nanoto pompekirina, ala mantambaipa noto mpekirina.
Patudukimo tona nabelo, ala mantambai anu nisanina.
10 Ane iko madota manoto pompekirimu,
iko kana meose nte ALATALA
bo ane iko mosisani nte ALATALA anu ledo ria kasimbayuna,
majadi manipi raramu.
11 Noto dako nte Alatala haitu
mompakandoe umurumu.
12 Ane iko manoto mompekiri, iko mboto mauntu,
tapi ane mupoara noto dako nte Alatala, iko mboto marugi.
13 Kadoyo nirapaka mombine natameme
anu dopa nisanina gaga
bo ledo ria eya matana.
14 Ia nonturo ri kalantona ri vamba banuana
ala rakita ntona riara ngata.
15 Dako rahaitu ia nompongare tona anu noliu ri dala
hau ri pokarajaana, niulina ivei:
16 “He komiu anu dopa natau gaga, pesaimo tumai!”
Bo ka tona ledo naria noto mpekirina ia nanguli:
17 “Narasapa nanginu uve nipelea,
bo narasapa nangande kandea ane nikande nggalino.b”
18 Tapi tona anu niulikana haitu ledo nisanira,
ane mesua ri banua mombine haitu ira mamate.
Apa tona nariamo nesua riara banua haitu,
sii-sii riara ponturo malaeka ntomatemo.