Noto dako nte Alatala nompopaepe pepatudukina
8
Noto dako nte Alatala bo katau nompekirinirapaka eva manusiaa anu nompopaepe suarana.
2 Ia neangga ri tana nobunti-bunti ri bivi nu dala
bo ri popenga-penga nu dala.
3 Ia neangga ri vamba bobaa pesua hau rangata
nompopaepe suarana.
4 Ante suara namangga ia nanguli,
“He pura-pura tona, kupopaepe ka komiu suaraku,
bo kuuli tesaku ka pura-pura toponturo ri dunia.
5 He komiu tona anu dopa natau gaga, pegurumo ala matada pekirimiu.
Hee komiu tona nadoyo, pakanotomo raramiu.
6 Epemo, apa yaku manguli tesa nakana,
bo motesa anu nanoa.
7 Apa sumbaku aga mombasovadaka anu nakana
bo ledo ntoto nipokonoku notesa dava.
8 Pura-pura anu nisovadakaku nanoa,
ledo ria anu ledo nakana bara mombabagiu tona ntanina.
9 Pura-pura tesaku haitu napanto ka tona natada unto,
bo nanoa ka tona anu nadea katau ri pekirina.
10 Kana mureke pepangajariku noalipa pade salaka
bo pepatuduki noalipa pade bulava anu ledo ria galona.
11 Apa noto dako nte Alatala noalipa pade vatu mpoali,
bo noalipa pade pura-pura nuapa nipokono nu manusia.”
12 [Noto nirapaka manusia notesa. Niulina ivei,] “Yaku nonturo singgani-nggani nte katau.
Naria muni kanipi rara, bo pangisani dako nte Tupu.
13 Tona meose nte TUPU natantumo navuu matana nanggita pokainggu nadaa,
yaku ledo ntoto nompokono kasombo, kalanga rara,
pokainggu nadaa, bo tesa mpebagiu.
14 Yakumo nombadekei pangajari bo katau nombatimba parakara.
Yaku natau nompekiri bo yaku naroso.
15 Yakumo nombadekei pompakule ka magau-magau nomparenta,
bo tona nakuasa nitulungiku ala ira momparenta manoa.
16 Yakumo nombatulungi madika-madika bo tomaoge-tomaoge ri dunia,
momparenta bo ledo mompelenje.
17 Yaku nompotove tona nompotove yaku,
bo tona anu natutu mangelo yaku rakavana yaku.
18 Yaku nompopoasele tona riara mpanggaviana, ala ira rabila ntona,
bo ira makalumana njuu bo matuvu manoa.
19 Nuapa mukava dako nte yaku, noalipa pade bulava bo salaka,
naupa bulava bo salaka haitu ledo ria galona.
20 Yaku nangose dala nakana,
dala haitu nanggeniaka yaku matuvu manoa.
21 Kakalumana kudekei ka tona anu nompotove yaku,
bo banuara kuisi ante mbara-mbara mpoali.
22 Yakumo pamula-mulana nipajadi nTUPU tempo Ia nompamula pokarajaaNa,
Yakumo asele mpokarajaaNa dako ri lamba pamulana.
23 Yaku nipajadi dako ri lamba pamulana,
tempo dopa ria dunia.
24 Yaku nariamo dopame nipajadi tasi luo
bo dopame naria mata nu uve.
25 Yaku nariamo dopame bulu nipajadi,
bo yaku nokolupa nipajadi pade bunti-buntina.
26 Yaku nariamo dopame Tupu nompajadi dunia bo karava,
bara sovu nu tana pamulana.
27 Tempo Tupu nompajadi langi bo nompatakana,
bo tempo Ia novia pantaa langi bo tasi,
ri sia yaku.
28 Ri sia munimo yaku
tempo Ia nombadika kulimu ri laerava
bo tempo Ia nompajadi mata nu uve oge noili hau ri tasi luo.
29 Ri sia munimo yaku tempo Ia nombadika pantaa ntasi
ala tasi nemo mombaliunaka parentaNa.
Tempo Ia nombadika polande dunia
ri sia munimo yaku.
30 Yaku naria njuu ri sinjoriNa, najadi ngana nipotoveNa,
eo-eo yaku nompakasana raraNa
bo nomore-more ri ngayoNa.
31 Nasana mpuu raraku ri bavo dunia nipoviaNa,
bo nadamba raraku nanggita manusia nipajadiNa.
32 Sabana haitu, he ngana-ngana, petalingaimo yaku.
Apa masana mpuu tona anu mangose dala nituduakaku ka ira.
33 Epemo pepatuduki ala manoto pompekirimiu.
Nemo komiu mombabanjereni pepatuduki haitu.
34 Masana mpuu tona meepe nte yaku
anu eo-eo nompopea yaku ri vamba bobaa,
bo nompopea yaku ri vamba banuaku.
35 Apa isema-sema manggava yaku, manggava katuvua,
bo masana rara nTUPU nte ia.
36 Tapi isema-sema ledo manggava yaku, mompakarugi karona mboto,
apa pura-pura tona anu nompovuu mata yaku, nompokono kamatea.”