Jonjo kabilasa nipadidisi mombine mpobualo
7
He anaku, tora anu niuliku,bo nemo mukalingasi parentaku ka iko,
2 toramo parentaku ala masana katuvumu,
jagaimo pakabelo-belo pepatudukiku eva iko nombajagai angu matamu.
3 Kana tora njuu pepatudukiku haitu,
bo boli pakabelo riara ntaimu.
4 Noto haitu eva sampesuvumu
bo pompaha haitu eva roa belomu.
5 Ala noto bo pompaha haitu mombajagai iko dako ri mombine nadaa gauna,
anu mompadidisi iko ante tesa-tesa namomi.
6 Naria sanggani yaku nangganoto
dako ri pelaba banuaku
7 nipeintaku bara sakondua kabilasa anu dopa nisanira gaga,
bo dako nte ira haitu naria saito anu ledo ria noto mpekirina.
8 Ia nolipa bo nesai ri soki poleko nu dala,
hau ri banua mombine nadaa gauna.
9 Tempo haitu naruyomo
apa nanggoviamo bo nasolomo eo.
10 Jadi naria mombine nombatomunaka ia
nopakea mpo bajinga
ante nia nadaa.
11 Ia nasantesa bo ledoria ea matana
bo ia ledo natetaa gaga ri banuana.
12 Ia njuu-njuu nesuvu ri dala bo ri karoana
bo neangga ri soso poleko nu dala nompopea langgai.
13 Mombine haitu nanggangisi bo nombaeki langgai anu da nangura tuvuna haitu,
bo ledoria ea matana. Ia nanguli,
14 “Eo hitu naria bau koyo ri banuaku
sabana pangane yaku nombadekei pesomba posinggabelo nte TUPU,
bo nibayarikumo pedekei anu nijanjiku ka Ia. a
15 Haitu sabana yaku nesuvu mosintomu bo mangelo iko
bo hitupa nikavakumo iko.
16 Paturuku nilampikumo
ante kae nobunga-bunga nasuli alina dako ri Mesir,
17 bo nipakavangikumo
ante lana-lana dupa, gaharu bo kanino.
18 Kamaimo rapakaosata posimpokonota,
bo mosinggani-nggani mombarasai kasana nu rarata sampe maeo.
19 Sabana bereiku ledo ria ri banua,
ia rou ri polipana nakavao.
20 Nadea doi nikenina,
ane aga rominggu ia dopa manjili.b”
21 Ivesiamo mombine haitu nompadidisi langgai anu da nangura tuvuna
ante tesa-tesana namomi anu nompakatekende rara.
22 Sampesanika langgai da nangura tuvuna nantuntuni mombine haitu.
Ia nasimbayu eva japi rakeni hau rasambale
bo eva tona nadoyo nibalanggu rakeni rahuku.
23 Mata nu pana mombatosu atena.
Ia nasimbayu eva tonji ledo nisanina, apa dala niosena dala ntolia.
Ivesiamo ngana da nangura tuvuna haitu, ledo nisanina masesa ngena katuvuna.
24 Sabana haitu anaku, epemo pepatudukiku,
bo parantaikamo tesa-tesa niuliku.
25 Nemo maluu raramu rapadidisi mombine eva haitu
nemo mompakasalandala katuvumu ri dala niosena.
26 Apa nadeamo langgai nandasa katuvura nipoviana
bo domo nisani rekena kadea ntona namate nipoviana.
27 Ane komiu hau ri banuana, nasimbayu eva komiu nangoseaka dala ntona namate
bo nanau hau ri ponturo malaeka ntomate.