Mpengaya-ngaya pepatuduki
6
Anaku, ane maria iko nojanjimanjimbuaka inda ntona,
2 iko natepoumo ante janji haitu,
bo tesa-tesa nisovadakamu nombapou iko.
3 Anaku, ane anu haitu majadi nte iko,
batuana iko nikuasai ntona haitumo.
Jadi koimo masalisa hau nte ia,
pantaputumo bo pasimbukumo merapi nte ia
mombakabasaka iko dako ri janjimu.
4 Nepa ruru maturu
bo nepa ruru mangosanaka.
5 Tapi pasimbukumo mombakabasaka karomu dako ri pojanji haitu,
nasimbayu eva rusa bo tonji nompasimbuku makabasaka dako ri tolia nombapou ia.
6 He tona namau, peintamo soyo!
Parantaikamo nuapa nipoviana,
bo pegurumo ala iko manoto pompekirimu.
7 Nau ledo ria tona nanggeniaka ira,
bara nompasiayu bo nombakuasai ira,
8 ira nompasiromu kandeara tempo da nadea kandea,
rabolira ri tempo nggaara.
9 He tona namau, sakuyapa kasaena iko aga maturu?
Maipia iko pade membangu?
10 Iko aga nompekiri, “Maturu sampalai, naroyo mata,
mangosanaka sakide.”
11 Ane aga maturu-turu iko,
aga kapakasi bo kapepa mukava
eva topesuu sampesanika nakava mombasuu iko.
12 Ledo ria gunana tona nadaa,
hau ri umba-umba nikalauna ia aga nodava.
13 Ia nombapidaraka mata bo nongguvi-ngguviraka koya nggada
nodekei tanda mebagiu.
14 Pekirina nadaa nompekirika nia mpebagiu
bo nompakagado tona ri umba-umba nikalauna.
15 Haitu sabana ia sampesanika nikava nu silaka
bo domo ntoto namala nipakabelo.
16 Naria papitu jonjo pokainggu ledo nipokono nTUPU,
bo nipovuu mataNa.
17 Pokainggu haitu iamo:
nalanga rara, nodava, nombapatesi tona ledo nasala,
18 rara nonia madaa, rara anu nadota mpuu movia pokainggu ledo nabelo,
19 nosabi dava anu nombatambai-mbai tesa anu ledo nakana,
bo pokainggu nompoposinggarau sampesuvu.
Pepatora nemo mobualo
20 Anaku, kainggunakamo anu niparenta ntomamu bo tinamu ka iko
bo nemo mombasema-sema pepatudukira.
21 Tora njuu pepatudukira haitu eva bili ri tambolomu,
bo bolimo riara ntaimu.
22 Apa pepatudukira haitu manggeniaka iko riara mpolipamu,
mombajagai iko tempo iko maturu,
bo mombadekei pepatotosi ka iko tempo iko membangu.
23 Sabana parenta haitu eva poindo
bo pepatudukira eva reme nombavanta dala nggatuvu.
Pepatuduki bo pepatora mompatotosi iko matuvu mabelo.
24 Parenta haitu mombajagai iko dako ri mombine nadaa
bo pepadidisi mombine berei ntona.
25 Nemo mario matamu manggita kagaya lenjena.
Nemo matekende raramu nte pekampida matana nepadidisi.
26 Apa mombine nompobalu karona mamala raali ante ali sanjuraya talebe,
tapi isema mosampaturu ante mombine berei ntona, rabayarina ante nyawana.
27 Mamala tona mombasulembu ruti nu apu
bo ledo mapapu bajuna?
28 Mamala tona molipa ri bavo ruti nu apu
bo ledo mapapu kadana?
29 Vesia muni ante tona nomperouka mombine berei ntona.
Ledoria saitoa novia vehaitu bo ledo mambela pehuku.
30 Vesia muni topangangga kana rapakaeya ane ia rakava mangangga,
naupa ia nangangga sabana naara taina.
31 Ane ia matesaka, ia kana mombayari pitu nggani kadeana anu nialana,
naupa vayana haitu madeapa pade isi nu banuana.
32 Isema nobualo ledo ria noto mpekirina,
bo isema nokainggu vehaitu nompakagero katuvuna.
33 Ia rapandasa bo rapakaeya
bo mavau sangana sampe kasae-saena.
34 Sabana posiri berei nu mombine anu niperoukana haitu mambaso mpuu,
ledo ria asi matana tempo ia mombabalasi pokainggu langgai haitu,
35 bo nau nuapa ledo maria mamala mompasau rau rarana
nau madea anu radekei ka ia.