Pepatuduki mombakavaosi pepadidisi mombine mpobualo
5
He anaku, epemo pakabelo-belo pepatudukikuanu mompakanoto pekirimu
bo mompakanipi raramu,
2 ala musani mompekiri manoto
bo motesa masinggeni nte katau ri pekirimu.
3 Apa posumba mombine nadaa gauna namomi mpo manisa,
bo tesa-tesa nisovadakana tesa mpepadidisi.
4 Tapi majadipa pura-pura pepadidisi haitu ri karomu
damo aga kandasa bo panjoso rara murasai.
5 Apa iko rakeniakanamo ri dala kamatea,
apa dala niosena, dala hau ri ponturo malaeka ntomate.
6 Ia ledo nangose dala anu nanggeni katuvua
bo ledo nisanina ia nasalandala.
7 Ana-anaku, sabana haitu epemo tesaku,
nee mpuu ledo muoseaka anu niuliku.
8 Nee mpuu mukaparai mombine nadaa gauna,
bo nemo manjayo hau ri banuana.
9 Nemo mpuu mukaparai ia, ala nee madaa sangamu,
bo nemo kakabilasamu da nagasaa raalasi ntona anu ledo ria asi nu matana.
10 Apa kakalumana nipasiromumu aga mompakasana tona ntanina,
bo asele pompaelomu nemo raalasi ntona anu ledo niposisanimu.
11 Kaupuna ngena iko mantangalu,
apa karo bo roso nggaromu naupu puramo.
12 Pade manguli iko, “Ah nakuya ruru yaku nompovuu mata pepatuduki,
bo raraku ledo nompokono petuenaka.
13 Yaku ledo nangepe guru-guruku,
bo ledo nipetalingaiku pepatudukira.
14 Sakidepa yaku manavumo riara silaka
bo rapakaeya ri ngayo ntodea.”
15 Sabana haitu pakarosomo ponjambokomu,
bo dekeimo pepokonomu ka bereimu mboto.
16 Apa ledo masipato iko mompakaosa dota nu raramu nadaa,
ante mombine ledo bereimu mboto.
17 Apa kasana haitu aga komiu njamboko mamala mombarasaina
ledo mamala tona ntanina anu ledo bereimu.
18 Sabana haitu, kana maosa raramu nte mombine nipobereimu tempo iko da namuda,
bo maosa raramu aga nte bereimu mboto.
19 Apa ia randaa nagaya bo nasaveti eva rusa rumandaa,
kana maosa raramu manggita kagayana
bo kana matekende njuu raramu ante pepokonona.
20 Anaku, mokuya maoge vai raramu nte mombine nadaa gauna,
bo momperouka mombine vehaitu?
21 Dala-dala nggatuvu manusia ledo ria natetabuniaka ri mata nTUPU,
bo hau riumbapa rakalaura kana nikanotoNa.
22 Dosa ntona nadaa
eva tolia mombaoru ia mboto.
23 Ia namate, apa ia ledo nadota natuvu nasiayu
bo kadoyona nompakasalandala ia.