Guna pepatuduki nu noto riara mpekirita
4
He ngana-ngana, epemo pepatuduki ntuamamiu,bo parantaikamo ala rapahamiu pepatuduki haitu!
2 Apa nabelo pepatuduki nidekeiku ka komiu
nemo mpuu mukalingasi pepatotosiku.
3 Tempo yaku da nakodi da nonturo ri banua ntotuaku,
yaku dopa naroso bo nipotove ntinaku mpo ngana saito-itona.
4 Yaku nipatuduki ntuamaku ivei, “Anaku, nemo mpuu mukalingasi tesa-tesaku.
Kainggunakamo pepatotosi nipatudukiku ka iko ala iko matuvu mabelo.
5 Pasimbukumo manggava noto bo pompaha dako nte Tupu
nemo mukalingasi tapi kainggunaka njuu pepatudukiku haitu.
6 Potovemo bo nemo mukalingasi noto haitu,
ala matinonto bo masiayu katuvumu.
7 Pamula-mulana iko kana mompasimbuku mangelo noto bo pompaha
sabana anu haitu nopokopa pade anu ntanina.
8 Bilamo noto dako nte Alatala, rapakambasona sangamu,
ane mpuu-mpuu musarumaka noto, iko rabila ntona.
9 Iko rapakaoge,
iko eva tona nipasuaka songgo magau ri ngayo ntodea, anu nirambaki nte bunga-bunga.”
Oseakamo pokainggu ntona nanoto bo petalilikamo pokainggu ntona nadaa
10 He anaku, epemo bo tarimamo anu niuliku ka iko
ala mandoe umurumu.
11 Nipatudukikumo noto ka iko
bo nikeniakakumo iko ri dala nggatuvu nanoa.
12 Ane iko matuvu mangoseaka noto, ledo ria mavusu dala nggatuvumu.
Iko eva tona anu nangova ledo ria matepasunu.
13 Kangisimo pepatuduki haitu bo nemo rakabasaka.
Jagai pakabelo, apa pepatuduki haitu mombadekei katuvua ka iko..
14 Nemo mupasiala pokainggu ntona nadosa
bo nemo muoseaka dala ntona nadaa.
15 Kavaosimo pokainggu ivehaitu nemo mupasiala,
petalilika bo papolamo polipamu.
16 Apa tona nokainggu nadosa dopa mamala mamonjo
ane dopa rapadupana pokaingguna nadaa.
Dopa mapiri matana
ane dopa mamala rapanavuna tona.
17 Apa pokainggu nadaa najadi kandearamo,
bo inggura naseseraka nipouvekaramo.
18-19 Dala nggatuvu ntona nadaa eva luona nalanda mpirika,
ledo nisanira nuapa nompakatepasunu ira.
Tapi dala nggatuvu ntona nabelo, nareme eva vanta nu eo mpadondona,
anu nantambai kareme pevantana sampe tongo eo.
20 He anaku, parantaika mpuu anu niuliku,
bo talingai pakabelo pepatuduki nisovadakaku.
21 Nemo mpuu mukalingasi anu niuliku,
tapi bolimo pakabelo-belo pepatuduki haitu riara ntaimu.
22 Sabana pura-pura anu niuliku haitu puna nu katuvua ka tona anu nombapahana,
bo majadi roso nggaro ka tona anu nangoseakana.
23 Jagai pakabelo mpuu pekirimu
sabana anu riara mpekirimu tutu mompakatantu dala nggatuvumu.
24 Nemo mpuu motesa anu ledo nakana
bo mombasovadaka tesa-tesa mpebagiu anu mompanavu tona.
25 Aginapa iko mangganoto dala nggatuvu mabelo muose,
ala musani hau riumba mukalau.
26 Dopame mokainggu, pekiri pakabelo-belo,
ala nuapa-nuapa mupovia moasele.
27 Nemo mesai-sai dako ri dala nggatuvu nanoa,
bo kavaosimo pokainggu nadaa.