Pepatuduki ka kabilasa bo randaa
3
Anaku, nee mukalingasi pepatudukiku,boli njuu parentaku riara ntaimu,
2 ala mandoe umurumu
bo masana katuvumu.
3 Iko kana matutu mompotove Alatala bo singgamanusiamu.
Pokainggu ivehaitu kana mutora njuu eva bili ri tambolomu,
bo kana muboli njuu riara ntaimu.
4 Ane pura-pura haitu mukainggunaka,
iko rabila bo rapotove nu Alatala bo manusia.
5 Sarumakamo TUPU ante mpuu-mpuu raramu
bo nemo mombasarumaka pompahamu mboto.
6 Nuapa-nuapa mupovia sarumaka mpuumo Ia.
Tantu ratuduakaNa ka iko dala nggatuvu nabelo.
7 Nemo malanga raramu nte kanotomu nompekiri,
tapi oseakamo TUPU bo kavaosimo pokainggu nadaa.
8 Ane iko mokainggu ivehaitu mompakaroso pokaromu
bo mompakasana raramu.
9 Toiyamo TUPU ante pedekei tobelona dako ri kakalumanamu
bo pesomba asele pamulana dako ri panggaviamu.
10 Ane haitu mupovia gampiri-gampirimu maponu ante asele panggaviamu,
bo uve anggurmu melabi kaogena bo ledo magana pombolina.
11 Anaku nemo mupoara pepangajari nTUPU
bo nemo masau raramu nte pepatoraNa.
12 Apa TUPU nompangajari tona nipotoveNa
eva totua langgai nompangajari anana anu nipotovena.
13 Masana mpuu tona anu nanoto nompekiri
bo tona nanggava pompaha,
14 apa kanoto nompekiri,
noaselepa pade salaka bo noalipa pade bulava.
15 Ia noalipa pade vatu mpoali
bo ledo ria kasimbayuna nte nuapa-nuapa nipokono nu raramu.
16 Apa tona natau nompekiri mandoe umuruna
bo ia manggava kakalumana bo rabila ntona.
17 Tona nanoto pompekirina matuvu masana bo matinonto,
bo magana pura-pura nuapa niparaluuna.
18 Noto dako nte Alatala nasimbayu mpo kayu nombadekei katuvuaa,
pura-pura tona nombasarumaka noto haitu, katuvura masana bo mabelo.
19 TUPU nompajadi dunia ante noto
bo ante pompahaNa Ia nompataka langi,
20 bo ante pangisaniNa, Ia nompopemata uve bo nompopoilina,
bo nompakapasa kulimu-kulimu ri laerava najadi leni.
21 He anaku, kana batena ratora noto bo katau notimba parakara,
bolimo pakabelo-belo riara ntaimu.
22 Jadi ane vesia mupovia,
masana bo mabelo katuvumu.
23 Iko mantinonto mangose dala nggatuvumu
bo iko ledo matepasunu.
24 Iko ledo maeka ri tempo maturu,
tapi iko maluru mamonjo.
25 Neemo iko maeka nte silaka anu sampesanika nakava,
manggava tona nadaa.
26 Apa TUPU kana nombajagai iko
Ia ledo mompalamba iko matetoliani.
Pepakeni mokainggu mabelo
27 Ane rapakulemiu movia mabelo ka tona anu masipato ratulungimiu,
nemo rapoaramiu perapina.
28 Nemo mangulika singgamanusiamu anu merapi tulungi, ivei,
“Panjilimo ruru bo tumai vai ngena,
maile pade kudekei anu niperapimu.”
Tano anu niperapina haitu naria nte iko.
29 Nemo monia madaa ka singgamanusiamu,
tano niparasayana komiu ledo movia madaa ka ia.
30 Nemo karai-raimo tona
ane ia ledo mokainggu madaa nte iko.
31 Nemo masiriati nte kakalumana ntona naseseraka
bo nemo muoseaka sangua pokaingguna.
32 Apa tona nadaa nipovuu mata nTUPU
tapi tona nanoa rarana niporoaNa.
33 TUPU mbapindasi pobanua ntona nadaa
tapi pobanua ntona nabelo rapoporasi nTUPU.
34 TUPU mompongeika tona nalanga rarana,
tapi nadamba raraNa nte tona naede rarana.
35 Tona nanoto pompekirina mambaso sangana
tapi tona nadoyo manggava pepakaeya.